AzTv - 27, Space

Bakı:

16 °C

82 %

3 m/s

Əlaqə

AZ RU EN

Ana səhifə / Xəbər lenti / AzTv - 27, Space - 1...

AzTv - 27, Space - 1...

14.04.2022 [10:13]

Vətən müharibəsinə neçə film həsr edilib?

Günel ABBAS

Vətən Müharibəsindən 2 ilə yaxın vaxt keçməsinə baxmayaraq samballı film layihələrinin sayı ya çox azdır, ya da heç yoxdur. Mətbuatın diqqətlə yanaşdığı bu mövzu son zamanlar sosial şəbəkədə də gündəmə çevrilib. Xüsusən televiziya şirkətlərinin hazırladığı filmlərin sayına və keyfiyyətinə nəzər yetirsək, söylənənlərin həqiqət olduğunu görərik. Sevindiricidir ki, bu işi layiqincə yerinə yetirən Bakı Media mərkəzi Vətən müharibəsinə həsr olunan keyfiyyətli filmlər ərsəyə gətirir, həmin filmlər də ekranlarda yayımlanır. Ancaq dövlət tərəfindən yerli televiziya kanallarının inkişafı üçün ayırdığı maliyyə yardımı qarşısında bu, yetərli deyil.

Xatırladaq ki, 2022-ci il dövlət büdcəsindən KİV və televiziya kanallarına 51,9 milyon manat subsidiya ayrılıb. Bununla yanaşı, 6,5 milyon manat kinomuzun inkişafı üçün hesablanıb. Bu isə o deməkdir ki, televiziya şirkətləri ayrılan vəsaitlərdən prioritet sayılan tarixi hadisələrin əbədiləşdirilməsi, işıqlandırılması üçün istifadə etməlidir. Ancaq külli miqdarda maliyyə yardımı alan televiziya şirkətlərinin bunu nə dərəcədə diqqətdə saxlaması sual altındadır. Məsələni aydınlaşdırmaq üçün çəkilən filmlərin sayı, mövzusu və formatı ilə bağlı telekanallara sorğu ünvanladıq.

Azərbaycan Dövlət Televiziyasından “Yeni Azərbaycan”a bildirildi ki, dövlət kanalı sənədli və bədii film olmaqla, ümumilikdə Vətən müharibəsindən bəhs edən 27 film ərsəyə gətirib. Qeyd edilib ki, filmlər I Qarabağ müharibəsindən bu günə qədər xalqımızın keçdiyi ağır günlərdən, Ali Baş Komandanın rəhbərliyi altında Ordunun əldə etdiyi Zəfərin təntənəsindən, qalib əsgərlərimiz və şəhid jurnalistlərdən bəhs edir.

İctimai Televiziyadan verilən məlumata görə, sənədli və bədii film, eləcə də serial formatında 16 film hazırlanıb. Filmlər müxtəlif qoşun növlərinin qəhrəman zabit və əsgər heyətinin 44 günlük müharibə müddətində keçdiyi şərəfli döyüş yolundan, Qarabağ müharibəsində ölkəmizdə yaşayan bütün xalqların nümayəndələrinin bir bayraq altında düşmənə qarşı yumruq kimi birləşməsindən, General Polad Həşimovun şəhadətindən və Şuşa zəfərindən bəhs edir.

Space Müstəqil Teleşirkəti bildirib ki, Vətən müharibəsi ilə bağlı 44 seriyadan ibarət “44 günün fatehi” adlı 1 film hazırlanıb.

Azad Azərbaycan televiziyasından verilən məlumata əsasən, şirkət Şuşa zəfərindən, qələbəyə gedən yoldan və şəhidlərin şərəfli şəhadətindən bəhs edən 6 film hazırlayıb.

Xəzər TV -dən bildirilib ki, keçmişdən bu günə tarixi mübarizəmizə, Ali Baş Komandanın hərb siyasətinə və müzəffər Ordumuza həsr olunmuş 5 film hazırlanıb.

ARB Media Qrupdan verilən məlumata görə, şirkət Vətən müharibəsi dövründə şəhid olanlar, qazilər, müharibənin ağrılı tərəfləri və qələbəmizdən bəhs edən 6 film hazırlayıb.

Real tv bildirib ki, Vətən müharibəsinin nəticələri, döyüşlərin çətinliyi və Qarabağın keçilməz sərhədlərini qəhrəmanlıqla azad edən hərbçilərə həsr olunan 20 sənədli film ərsəyə gətirib.

Paylaş:

Baxılıb: 688 dəfə