Yaxın günlərdə dağıdıcı zəlzələ gözlənilir?

Bakı:

17 °C

63 %

12 m/s

Əlaqə

AZ RU EN

Ana səhifə / Xəbər lenti / Yaxın günlərdə dağıdıcı zəlzələ gözlənilir?

Yaxın günlərdə dağıdıcı zəlzələ gözlənilir?

08.12.2021 [11:39]

Seysmoloq: Güclü zəlzələlərin vaxtı ilə bağlı dəqiq proqnoz verə bilmərik

Günel Abbas

Ölkəmizdə bütövlüklə 7 ballıq zəlzələ rayonu ilə yanaşı bir çox yerlər, o cümlədən, Abşeron yarımadası, Dağlıq Şirvan, Şəki-Zaqatala zonası 8 ballıq zəlzələ rayonuna aid edilir. XII, XVII, XX əsrlərdə Şamaxı şəhərində daha çox dağıdıcı zəlzələlər olub. Tarixə nəzər yetirəndə sözügedən rayonun bu cür fəlakətlərdən çəkdiyi ziyanları görmək çətin deyil. Ancaq respublikamızın digər bölgələrində də müəyyən qədər dağıntılara səbəb olan zəlzələlər baş verib. Qeyd edək ki, 2000-ci ilin əvvəllərində Bakıda baş verən və gücü 6,0 bala yaxın olan zəlzələ zamanı insan tələfatı və dağıntının az olmasına baxmayaraq əhali xeyli sarsılmışdı. Bu zəlzələdən sonra tikintilərdə baş verən çatlar, binaların zirzəmiləri və özüllərini qrunt sularının basması nəticəsində onların seysmik davamlılığı xeyli azalmışdı. Qısacası, eyni gücə malik olan növbəti zəlzələ daha böyük dağıntılara səbəb ola bilər.

Güclü zəlzələ təbii fəlakət olmaqla yanaşı, həm də arzu olunmayan ekoloji fəlakətdir. Son günlər ardıcıl olaraq ölkəmizin bir sıra bölgələrində zəlzələlər müşahidə olunur. Bu zəlzələlərin dağıdıcı gücü olmasa da, insanlar irəliləyən zamanda daha şiddətli təkanların ola biləcəyindən ehtiyat edirlər, hətta bu barədə təşvişə düşürlər. Təbii ki, cəmiyyətdə həmin düşüncələrin yaranmasında dezinformasiya tipli məlumatların rolu da böyükdür. Məsələni aydınlaşdırmaq üçün Respublika Seysmoloji Xidmət Mərkəzinin direktoru Qurban Yetirmişli ilə əlaqə saxladıq.

Seysmoloqun sözlərinə görə, gün ərzində Azərbaycanda 57-60 zəlzələ qeydə alınır. “Ancaq bu zəlzələlər çox aşağı ballı olduğu üçün hiss olunmur, açığı heç bir təsiri də yoxdur. Dünyanın hər yerində, hər gün bu proseslər gedir. Azərbaycanda da hər zaman seysmoloji aktivlik olub. Lakin bu zəlzələlər qorxulu deyil. Ümumilikdə götürəndə bu təkanlar üç bal gücündən çox olmur. Bunların da heç bir qorxusu yoxdur. Yaxın zamanlarda da Azərbaycanda güclü katostrofik zəlzələ ehtimalı yoxdur.

Baş seysmoloq zəlzələlərlə bağlı qabaqlayıcı proqnozların verilməsi məsələsinə də toxunub: “Bunun üçün xüsusi bir cihaz yoxdur. Xüsusən də güclü zəlzələlərin dəqiq yeri və vaxtı üçün qısamüddətli proqnoz vermək mümkün deyil. Lakin ortamüddətli və uzunmüddətli proqnozlar verilə, harada aktivliklərin olduğunu və zəlzələ gözlənildiyini demək mümkündür. Yaxın müddətdə Azərbaycanda dağıdıcı zəlzələ ehtimalı yoxdur. Onu da qeyd edim ki, zəlzələnin gücünü ölçmək üçün ixtira olunan cihazların heç birinin aktuallığı yoxdur. İndiyə qədər yeraltı təkanların baş verəcəyi haqqında görülən əlamətlər heç biri özünü doğrultmayıb”.

O bildirib ki, bu gün qurum ən müasir texnologiya ilə təmin olunub: “Hazırda Türkiyə Fövqəladə Hallar Nazirliyinin nümayəndələri ilə bu sahədə əməkdaşlıq barədə danışıqlar aparırıq. Amerika istehsalı olan seysmoloji aktivliyi ölçən ən müasir cihazlarla yeni proqramlar üzərində işlər görürük”.

Paylaş:

Baxılıb: 1303 dəfə