Qarsda “Qərbi Azərbaycan: Unudulmaz izlər” adlı beynəlxalq forum keçirilib

Bakı:

25 °C

53 %

2 m/s

Əlaqə

AZ RU EN

Ana səhifə / Xəbər lenti / Qarsda “Qərbi Azərbaycan: Unudulmaz izlər” adlı beynəlxalq forum keçirilib

Qarsda “Qərbi Azərbaycan: Unudulmaz izlər” adlı beynəlxalq forum keçirilib

15.05.2025 [10:04]

Mayın 14-də Türkiyənin Qars şəhərində fəaliyyət göstərən Qafqaz Universitetində “Qərbi Azərbaycan: Unudulmaz izlər” adlı beynəlxalq forum keçirilib.

AZƏRTAC xəbər verir ki, “İnkişafa və İslahatlara Dəstək” İctimai Birliyinin təşkilatçılığı və Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi reallaşan tədbirin əsas məqsədi Qərbi Azərbaycanın zəngin mədəni irsini, tarixi yaddaşını və kulinariya ənənələrini nümayiş etdirmək, bu irsi daha geniş auditoriyaya tanıtmaq və gənc nəslə ötürməkdən ibarət idi.

Azərbaycan-Türkiyə münasibətləri kontekstində ümumi tarix yaddaşının qorunması və gələcək nəsillərə ötürülməsi baxımından əhəmiyyət daşıyan tədbirdə çıxış edən Qafqaz Universitetinin Çağdaş Türk Ləhcələri və Ədəbiyyatları Bölümünün rəhbəri professor İlkin Gulusoy bildirib ki, “Qərbi Azərbaycan məsələsi yalnız bir regionun deyil, bütövlükdə türk dünyasının tarixi yaddaşıdır. “Bu kimi tədbirlər mədəni mirasın yaşadılması baxımından son dərəcə dəyərlidir”, - deyə İ.Gulusoy vurğulayıb.

“İnkişafa və İslahatlara Dəstək” İctimai Birliyinin sədri Ramil Əliyev öz növbəsində Qərbi Azərbaycanın irsinin dünyada tanıdılmasını “tarixi və mənəvi borc” adlandırıb. “Layihəmiz bu istiqamətdə mühüm addımlardan biridir”, - deyə o qeyd edib.

Daha sonra çıxış edən ölkəmizin Qarsdakı Baş konsulu Zamin Əliyev Azərbaycan və Türkiyə arasındakı qardaşlıq münasibətləri bu cür layihələrlə daha da möhkəmləndiyini deyib. “Qərbi Azərbaycan bizim milli kimliyimizin ayrılmaz hissəsidir”, - deyə diplomat vurğulayıb.

Əslən Qərbi Azərbaycandan olan Qars Bələdiyyə başçısı Ötüken Senger isə bu cür tədbirlərin şəhərin beynəlxalq mədəni platformaya çevrilməsinə də töhfə verdiyini ifadə edib.

Onun sözlərinə görə, Qərbi Azərbaycan məsələsi xüsusi əhəmiyyətə malikdir. O, tarixi ədalətin öz yerini tapacağına əmin olduğunu bildirib.

Naxçıvan Muxtar Respublikasının Ali Məclisinin deputatı Üzeyir Məmmədov çıxış edərək qeyd edib ki, Qərbi Azərbaycan torpaqları tariximizin qan yaddaşıdır. “Gənc nəsil bu həqiqətləri öyrənməli və gələcəyə daşımalıdır”, - deyə deputat vurğulayıb.

Qərbi Azərbaycanla bağlı layihələrin həm milli kimliyin möhkəmlənməsi, həm də beynəlxalq aləmdə Azərbaycan həqiqətlərinin tanıdılması baxımından böyük əhəmiyyət kəsb etdiyini ifadə edən Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin Müşahidə şurasının üzvü Zaur İbrahimli deyib ki, dövlət dəstəyi ilə həyata keçirilən bu tədbirlər gələcəyə yönəlib.

Daha sonra kürsüyə çıxan Azərbaycan-Türkiyə Qida Təhlükəsizliyi İctimai Birliyinin sədri Məhsəti Hüseynova qeyd edib ki, Qərbi Azərbaycanın kulinariya irsi tarixi yaddaşın ayrılmaz hissəsidir. “Biz bu irsi qorumalı və nəsildən-nəslə ötürməliyik”, - deyə M.Hüseynova bildirib.

Forum konsert proqramı ilə davam edib.

Sonda Qərbi Azərbaycan mətbəxinin incilərindən olan İrəvan kətəsi, şirin çörəyi, fəsəli və bir çox şirniyyatlar təqdim olunub. Həmçinin İrəvan şəhərinin dağıdılmış tarixi abidələrinin arxiv fotoları sərgilənib.

Paylaş:

Baxılıb: 520 dəfə