XV Beynəlxalq Multikulturalizm Məktəbinin iştirakçıları Ağdamda

Bakı:

29 °C

41 %

0 m/s

Əlaqə

AZ RU EN

Ana səhifə / Xəbər lenti / XV Beynəlxalq Multikulturalizm Məktəbinin iştirakçıları Ağdamda

XV Beynəlxalq Multikulturalizm Məktəbinin iştirakçıları Ağdamda

27.09.2024 [17:03]

Bakı Beynəlxalq Multikulturalizm Mərkəzinin təşkil etdiyi “Sülhün, dialoqun və tolerantlığın qorunmasında mədəni irsin rolu” adlı XV Beynəlxalq Multikulturalizm Məktəbi Ağdam şəhərində davam edir. Sentyabrın 27-də məktəb iştirakçılarının erməni vandalizminə məruz qalmış Ağdam şəhərinə ekskursiyası təşkil olunub. Tədbir iştirakçıları Ağdam Cümə məscidi, Şəhidlər xiyabanı, İmarət Kompleksini ziyarət ediblər, şəhərdə aparılan quruculuq işləri ilə tanış olublar.

Sonra tələbələr Azərbaycan Respublikasının Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin böyük məsləhətçisi Ləman Əliyevanın “Azərbaycan mədəni irsinə qarşı vandalizm aktları” mövzusunda mühazirəsini dinləyiblər. Mühazirəçi vurğulayıb ki, bəşəriyyət üçün ən ağır və ən dəhşətli dövr müharibələr, istilalar dövrüdür. Zəngin tarixi keçmişi və geniş mədəni irsi olan Azərbaycan zaman-zaman müharibə meydanlarına çevrilib. Azərbaycan xalqı müharibə dövrünü keçən əsrin sonlarında bir daha yaşadı. Xalqımızın tarixinə qanlı hadisələr, faciələr, misli görünməmiş soyqırımı yazıldı, torpaqlarımızın 20 faizdən çox hissəsi işğal edildi, ərazi bütövlüyümüz pozuldu, soydaşlarımız yurd-yuvalarından didərgin düşdü. Yaşı min illərə söykənən tarixi-mədəni abidələrimiz də Ermənistan tərəfindən Azərbaycana qarşı törədilən təcavüzkar əməllərin qurbanı oldu. Ləman Əliyeva ermənilərin Azərbaycanın tarixi-mədəni abidələrinə qarşı törətdiyi vandalizm aktları barədə geniş məlumt verib. Bildirib ki, 30 il ərzində ermənilər bizə məxsus olan tarixi abidələri, ziyarətgah və məscidləri, məzarlıqları dağıdıb, yüzlərlə mədəniyyət abidələrimizi yerlə-yeksan edib, Azərbaycana məxsus tarixi abidələrin adlarını dəyişdirib özününküləşdirib, tanınmış Azərbaycan ziyalılarının, şair və yazıçıların ev-muzeylərinin yerləşdiyi tarixi binaları tamamilə məhv edib, işğal etdiyi Azərbaycan ərazilərində mədəni irsin məhv edilməsinə və saxtalaşdırılmasına yönələn, beynəlxalq konvensiyalarda bəşəri cinayət hesab edilən əməllər törədiblər. O qeyd edib ki, Ermənistanın işğalı nəticəsində Qarabağ və ətraf rayonlarda dağıdılan muzeylər, məscidlər, abidələr tək Azərbaycan xalqının mədəni irsinə deyil, bütün İslam dünyasına, ümumilikdə isə, bəşər mədəniyyətinə qarşı törədilən vandalizm aktıdır.

Məruzəçi torpaqlarımız işğaldan azad olunandan sonar burada aparılan bərpa və təmir işləri haqqında da məlumat verib. Ərazilərin minalardan təmizləməsi, şəhər və kəndlərin yenidən qurulması və mədəni abidələrin bərpası prosesində qarşıya çıxan çətinliklərdən bəhs edib. Mədəni irsin bərpasında beynəlxalq əməkdaşlığın vacibliyini vurğulayıb.

Mühazirə XV Beynəlxalq Multikulturalizm Məktəbinin iştirakçıları tərəfindən maraqla qarşılanıb. Məruzəçi tələbələrin suallarını cavablandırıb.

Qeyd edək ki, XV Beynəlxalq Multikulturalizm Məktəbində 21 ölkədən - Azərbaycan, Rusiya, Türkiyə, Çin, Serbiya, Yaponiya, Qazaxıstan, Rumıniya, Moldova, Özbəkistan, Hindistan, Mərakeş, Bolqarıstan, Gürcüstan, Amerika Birləşmiş Ştatları, Qırgızıstan, İraq, Pakistan, Əlcəzair, Mozambik və Konqodan olan 30-a yaxın tələbə iştirak edir.

Xatırladaq ki, Mərkəz yarandığı gündən etibarən, Prezident İlham Əliyevin qarşıya hədəf kimi qoyduğu Azərbaycan multikulturalizminin dünyada tanıdılması, beynəlxalq arenada təbliği və təşviqi ilə bağlı bir sıra layihələr həyata keçirir. BBMM-in mühüm əhəmiyyət kəsb edən layihələrindən biri də artıq ənənə şəklini alan Beynəlxalq Multikulturalizm Məktəbləridir. Layihə BBMM-in “Azərbaycan multikulturalizmi fənninin xaricdə və ölkə universitetlərində tədrisi” layihəsinin məntiqi davamıdır. Tədris layihəsi çərçivəsində dünyanın və Azərbaycanın ali təhsil müəssisələrində Azərbaycan multikulturalizmini öyrənən tələbələr üçün ildə iki dəfə Beynəlxalq Multikulturalizm Yay və Qış Məktəbləri təşkil olunur. Burada məqsəd tələbə gənclərin nəzəri şəkildə öyrəndiklərini multikultural və tolerant dəyərlərin qorunub yaşandığı ölkəmizdə öz gözləri ilə görüb şahid olmasına şərait yaratmaqdır. Artıq dəyərli ənənəyə çevrilən multikulturalizm yay və qış məktəblərinin nəticəsi olaraq, xaricdə Azərbaycanın gənc dostlarının və onların yaxın çevrəsinin timsalında ölkəmizin haqq işini dəstəkləyən intellektual gənclərdən ibarət ünsiyyət platforması və güclü lobbisi formalaşıb. İntensiv şəkildə davam edən bu proses sübut edir ki, Prezident İlham Əliyevin Azərbaycanın dünyada tanıdılması istiqamətində müəyyənləşdirdiyi hədəflər uğurla reallaşmaqdadır.

Paylaş:

Baxılıb: 701 dəfə