Ümummilli Lider Heydər Əliyev qurtuluş missiyası həyata keçirərək milli dövlətçiliyimizin xilaskarı olub

Bakı:

25 °C

70 %

15 m/s

AZ RU EN

Ana səhifə / YAP xəbərləri / Ümummilli Lider Heydər Əliyev qurtuluş missiyası həyata keçirərək milli dövlətçiliyimizin xilaskarı olub

Ümummilli Lider Heydər Əliyev qurtuluş missiyası həyata keçirərək milli dövlətçiliyimizin xilaskarı olub

12.12.2022 [11:08]

Azərbaycan xalqı qarşısında göstərdiyi müstəsna xidmətləri ilə əbədilik qazanan Ümummilli Lider Heydər Əliyevin rəhbərliyi ilə qazandığımız mühüm tarixi nailiyyətlər hər ötən il daha mühüm önəm kəsb edir. Belə ki, müstəqilliyimiz məhz Ulu Öndər Heydər Əliyevin onun misilsiz xidmətləri sayəsində əbədi və dönməz xarakter alıb.

Birmənalı şəkildə demək olar ki, Ümummilli Lider Heydər Əliyevin əsasını qoyduğu daxili və xarici siyasət siyasət yalnız Azərbaycan xalqının maraqları üzərində qurulub. Ulu Öndər Heydər Əliyev bütün fəaliyyəti boyu müdrik və uzaqgörən siyasəti, nadir rəhbərlik keyfiyyətləri ilə seçilmiş, bilik və bacarığını daim bütün azərbaycanlıların qəlbində yaşayan milli dövlətçilik ideyalarının gerçəkləşməsinə yönəltmiş, müstəqil dövlətimizi və xalqımızı zamanın çətin sınaqlarından uğurla çıxarmış və dinamik inkişafını təmin etmiş BÖYÜK VƏTƏNPƏRVƏR idi.

Belə ki, istər keçmiş ittifaq dönəmində fəaliyyət göstərdiyi bütün sahələrdə, istərsə də müstəqillik dövründə Ulu Öndər Heydər Əliyev daim Azərbaycana ləyaqətlə xidmət etmiş, milli-mənəvi dəyərlərin, adət-ənənələrin qorunması, sağlam və intellektual gənc nəslin yetişdirilməsi istiqamətində misilsiz nailiyyətlər qazanmışdır.

Ümummilli Lider Heydər Əliyevin Azərbaycanın müstəqilliyinin möhkəmləndirilməsində və inkişaf yoluna çıxarılmasında da böyük xidmətləri olmuşdur. 1990-cı illərin əvvəllərində, hələ SSRİ-nin mövcud olduğu bir vaxtda Ulu Öndər Heydər Əliyev öz həyatını təhlükə qarşısında qoyaraq Moskvadan Azərbaycana qayıtmış, doğma Vətənində milli vətəndaş birliyinin yaradılması, ölkənin müstəqilliyinin bərpası istiqamətində əsl tarixi missiya həyata keçirmişdir.

Ulu Öndər Heydər Əliyevin 1990-1993-cü illərdəki fəaliyyəti Azərbaycan dövlətçiliyinin və milli tariximizin parlaq səhifələrini təşkil edir. 1993-cü ildə Azərbaycan dövlətçiliyinin çətin sınaqlar qarşısında dayandığı, məhvolma təhlükəsi ilə üz-üzə qaldığı bir zamanda Ümummilli Lider Heydər Əliyev xalqın çağırışına səs vermiş, onun təkidi və xahişi ilə yenidən ölkə rəhbərliyinə qayıtmış və xüsusi qurtuluş missiyası həyata keçirərək milli dövlətçiliyin xilaskarına çevrilmişdir.

Ümummilli Lider Heydər Əliyev güclü şəxsiyyət, fenomenal siyasətçi və dövlət xadimi idi. Siyasi və dövlətçilik fəaliyyəti sayəsində öz doğma xalqına sədaqətli xidmət edən və onun yolunda hər cür fədakarlığa hazır olan Ulu Öndərin öz dəyərini həmişə saxlayacaq uzaqgörən siyasəti, parlaq dühası və zəngin irsi Azərbaycanın uğurlu inkişafının təməlində dayanır. Ümummilli Lider Heydər Əliyevin Azərbaycan Respublikasına rəhbərlik etdiyi bir qərinə ərzində daim tərəqqisi üçün çalışdığı, zəngin mədəniyyəti, böyük tarixi keçmişi ilə həmişə qürur duyduğu və gələcək nəsillərin taleyini düşündüyü şəksizdir.

Müstəqil dövlətimizin başçısı olduğu 10 il ərzində (1993-2003-cü illərdə) Azərbaycan Respublikasında Ümummilli Lider Heydər Əliyevin rəhbərliyi ilə milli inkişafın əsasları yaradılmış, daxili sabitlik, milli həmrəylik təmin olunmuş, Azərbaycanın daxili və xarici siyasətinin, dövlət idarəçiliyinin, yeni iqtisadi, siyasi və sosial münasibətlərin, demokratik dövlət quruculuğu və vətəndaş cəmiyyətinin əsasları formalaşdırılmış, bütün sahələr üzrə ölkənin inkişaf strategiyası hazırlanmış və həyata keçirilmişdir. Ulu Öndər Heydər Əliyev bu mərhələdə həlledici tarixi xidmət və uğurlu fəaliyyət göstərərək müstəqil Azərbaycan dövlətinin qurucusu olmuşdur.

Ulu Öndər Heydər Əliyevin xilaskarlıq, quruculuq və liderlik missiyasının, milli dövlətçilik təfəkkürünün, peşəkar idarəçilik təcrübəsinin, zəngin siyasi irsinin, milli ideologiya səviyyəsinə qaldırılmış azərbaycançılıq məfkurəsinin dərindən öyrənilməsi, geniş təbliği və hərtərəfli inkişaf etdirilməsi Azərbaycan xalqı qarşısında dayanan əsas vəzifələrdəndir. Ona görə də Azərbaycan xalqı yaşadıqca onun şüurunda, təfəkküründə və yaddaşında Ümummilli Liderin özünəməxsus yeri olacaq. Ulu Öndər Heydər Əliyevin xalqımız və dövlətimiz qarşısındakı misilsiz xidmətləri hər zaman minnətdarlıqla xatırlanacaq.

Zamir Hüseynov,

YAP Göygöl rayon təşkilatının sədr müavini

Paylaş:

Baxılıb: 544 dəfə