YAP Bərdə rayon təşkilatının Seçki Qərargahında seçkilərə ciddi hazırlıq gedir

Bakı:

27 °C

69 %

4 m/s

Əlaqə

AZ RU EN

Ana səhifə / YAP xəbərləri / YAP Bərdə rayon təşkilatının Seçki Qərargahında seçkilərə ciddi hazırlıq gedir

YAP Bərdə rayon təşkilatının Seçki Qərargahında seçkilərə ciddi hazırlıq gedir

27.08.2015 [10:01]

Fəqət Şadlinskaya: Seçki Qərargahı partiyanın İcra Katibliyinin tövsiyə və tapşırıqlarına uyğun şəkildə öz işini davam etdirir
Ölkəmizdə keçiriləcək növbəti parlament seçkilərinə Yeni Azərbaycan Partiyası (YAP) yüksək hazırlıq şəraitində gedir. Seçki kampaniyasına partiyanın bütün strukturları səfərbər olunub. YAP-ın Bərdə rayon təşkilatı da bu prosesə mütəşəkkil qaydada qoşulub. Artıq təşkilatda 21 nəfərdən ibarət Seçki Qərargahı yaradılıb və onun fəaliyyət planı hazırlanıb, üzvlər arasında iş bölgüsü aparılıb. Qərargahın rəhbəri, YAP-ın Bərdə rayon təşkilatının sədri Fəqət Şadlinskaya bildirib ki, rayon təşkilatında partiya üzvlərinin sayı 10 min 720 nəfərdir. Onlardan 4325 nəfəri qadın, 3123 nəfəri gəncdir.
Onun sözlərinə görə, təşkilatın Seçki Qərargahında partiyanın fəalları təmsil olunurlar. Hazırda YAP Bərdə rayon təşkilatının Seçki Qərargahında Milli Məclisə növbəti seçkilərə çox ciddi hazırlıq işləri gedir. “Rayonda parlament seçkilərinin uğurlu keçirilməsi əsas məsələ kimi qarşıda durur. Seçkilər Bərdə rayonunda 2 Seçki Dairəsi üzrə 104 məntəqədə keçiriləcək. YAP-ın namizədləri üçün hər dairədə 10 nəfər olmaqla 20 nəfərdən ibarət imza toplayacaq şəxslər müəyyənləşdirilib. Hazırda hər bir dairə və hər bir məntəqə üçün müşahidəçi və məşvərətçi səs hüquqluların müəyyənləşdirilməsi prosesi gedir. Bərdə rayonu üzrə 87 min 591 nəfər seçici - 93 saylı Bərdə şəhər Seçki Dairəsindən 42 min 861 nəfər, 94 saylı Bərdə kənd Seçki Dairəsindən 44 min 730 nəfər seçici var”, - deyən F.Şadlinskaya qeyd edib ki, seçici siyahılarının dəqiqləşdirilməsi daim diqqət mərkəzində saxlanılır. Eyni zamanda, seçici fəallığının artırılması üçün də işlər mütəmadi olaraq aparılır.
“YAP ölkəmizin ən güclü, nüfuzlu partiyasıdır. Çünki partiyamız Ümummilli liderimiz Heydər Əliyevin ideyalarına əsaslanaraq fəaliyyət göstərir. Bu gün partiyamız Prezident İlham Əliyevin rəhbərliyi ilə yeni inkişaf mərhələsini yaşayır. Bütün bu amillər, YAP-ın həyata keçirdiyi siyasət xalqımız tərəfindən birmənalı olaraq dəstəklənir. Ona görə də YAP ümumxalq partiyası kimi səciyyələndirilir. Bu mənada hesab edirəm ki, bizim bu parlament seçkilərindəki namizədlərimiz də əhali tərəfindən etimadla qarşılanacaq”, - deyə təşkilat sədri vurğulayıb. F.Şadlinskaya onu da bildirib ki, təşkilatın Seçki Qərargahı partiyanın İcra Katibliyinin tövsiyə və tapşırıqlarına uyğun şəkildə öz işini davam etdirir. Bütün məsələlər seçki qanunvericiliyinə müvafiq olaraq yerinə yetirilir.
N.BAYRAMLI

Paylaş:

Baxılıb: 924 dəfə