YAP Gədəbəy rayon təşkilatı bələdiyyə seçkilərinə hazırlıq mərhələsini uğurla davam etdirir

Bakı:

24 °C

78 %

8 m/s

AZ RU EN

Ana səhifə / YAP xəbərləri / YAP Gədəbəy rayon təşkilatı bələdiyyə seçkilərinə hazırlıq mərhələsini uğurla davam etdirir

YAP Gədəbəy rayon təşkilatı bələdiyyə seçkilərinə hazırlıq mərhələsini uğurla davam etdirir

01.11.2014 [12:57]

Rüstəm Nağıyev: Rayon təşkilatında 17 nəfərdən ibarət seçki qərargahı yaradılıb, seçkilərdə iştirak edəcək müşahidəçilər də müəyyənləşdirilib
Bu ilin dekabrında keçirilməsi nəzərdə tutulan bələdiyyə seçkilərinə hazırlıq prosesinə start verilib. Azərbaycanda keçirilən seçkilərin şəffaflığı, demokratikliyi hər zaman bəyan edilib və istər yerli, istərsə də beynəlxalq müşahidəçilər ölkəmizdə çox mükəmməl bir seçki qanunvericiliyi olduğunu bildiriblər. Bu gün ölkəmizdə siyasi əqidəsindən asılı olmayaraq bütün siyasi qüvvələr, o cümlədən, vətəndaşlar fərdi qaydada seçkidə iştirak edirlər. Qanunvericilik ölkəmizdə şəffaf, ədalətli seçki prosesinin keçirilməsini şərtləndirir. Bu isə ilin sonunda baş tutacaq bələdiyyə seçkilərinin də beynəlxalq standartlara uyğun, ədalətli və demokratik şəraitdə keçiriləcəyini söyləməyə əsas verir.
Artıq seçkilərdə iştirak edəcəyini bəyan edən siyasi qüvvələr hazırlıqlara start veriblər. Yeni Azərbaycan Partiyasının (YAP) rayon və şəhər təşkilatları da bələdiyyə seçkilərinə hazırlıqla bağlı işləri uğurla davam etdirirlər. Bələdiyyə seçkiləri ilə bağlı keçirilən ümumrespublika müşavirəsində partiyanın İcra Katibliyi tərəfindən verilən tövsiyə və tapşırıqlar tam məsuliyyətlə yerinə yetirilməkdədir. Eyni zamanda, yerlərdə partiyanın rayon təşkilatları tərəfindən seçkilərlə bağlı intensiv işlər aparılır, seçki qərargahları yaradılır.
YAP-ın digər şəhər və rayon təşkilatları kimi partiyanın Gədəbəy rayon təşkilatı da seçkilərə ciddi şəkildə hazırlaşır. Rayon təşkilatında seçkilərə hazırlıqla bağlı Seçki Qərargahı, o cümlədən, təbliğat-təşviqat qrupu yaradılıb və onlar işlərini yüksək keyfiyyətlə həyata keçirməkdədir. YAP Gədəbəy rayon təşkilatının sədri Rüstəm Nağıyev bildirib ki, rayon təşkilatında bələdiyyə seçkilərinə hazırlıqla əlaqədar İcra Katibliyinin tövsiyə və tapşırıqlarının birinci mərhələsi başa çatdırılıb. R.Nağıyev deyib ki, hazırda YAP Gədəbəy rayon təşkilatının 79 ilk ərazi partiya təşkilatında 5693 üzv birləşib. Onlardan 2014 nəfəri gənclər, 1890 nəfəri isə qadınlardır. İki dairə üzrə YAP-ın irəli sürdüyü namizədlərin sayı isə 211 nəfərdir.
Ümumiyyətlə, Seçki Qərargahının işi ilə tanışlıq zamanı burada ciddi, operativ fəaliyyətin getdiyinin şahidi olduq. Vurğulamaq yerinə düşər ki, rayonda iki seçki dairəsi fəaliyyət göstərir. 103 saylı Gədəbəy Seçki Dairəsində 41211 nəfər, 104 saylı Gədəbəy-Tovuz Seçki Dairəsi üzrə isə 20629 seçici qeydiyyatdadır. YAP-ın 103 saylı Gədəbəy Seçki Dairəsi üzrə 184, 104 saylı Gədəbəy-Tovuz Seçki Dairəsi üzrə isə 27 namizədi bələdiyyələrə seçilmək uğrunda mübarizə aparacaq.
R.Nağıyev bildirib ki, artıq namizədlərin sənədləri hazırlanıb. Onların namizədliyi təsdiq edildikdən sonra isə imzatoplama kampaniyası başlayacaq. Bu məqsədlə 17 nəfərdən ibarət Seçki Qərargahı yaradılıb. Bundan başqa, artıq rayon təşkilatı seçki məntəqələrində seçkini müşahidə edəcək və komissiyaların işində fəaliyyət göstərəcək nümayəndələrini də müəyyənləşdirib. Belə ki, seçki günü YAP Gədəbəy rayon təşkilatı tərəfindən müəyyənləşdirilən 330 nəfər seçkiləri müşahidəçi edəcək. Bundan başqa, seçkidə 66 nəfər məşvərətçi səs hüquqlu komissiya üzvü də iştirak edəcək.
R.Nağıyev onu da vurğulayıb ki, Yeni Azərbaycan Partiyasının Gədəbəy rayon təşkilatının Seçki Qərargahında bələdiyyə seçkiləri ilə əlaqədar çevik, operativ, ciddi işlər aparılır. Təbii ki, bu prosesin nəticəsinin uğurlu olacağını da indidən demək mümkündür.
Pərviz SADAYOĞLU

Paylaş:

Baxılıb: 1107 dəfə