Tarixi Qələbə günlərinin əbədiləşdirilməsi

Bakı:

25 °C

73 %

6 m/s

Əlaqə

AZ RU EN

Ana səhifə / YAP xəbərləri / Tarixi Qələbə günlərinin əbədiləşdirilməsi

Tarixi Qələbə günlərinin əbədiləşdirilməsi

16.10.2026 [12:34]

Səyyad Mirzəyev

YAP Ağdam rayon təşkilatının əməkdaşı

Vətən müharibəsi zamanı ən ağır döyüşlər Füzuli uğrunda getdi. Çünki 30 il ərzində düşmən təmas xəttində elə bir möhkəm istehkam qurmuşdu ki, onu yarmaq böyük güc və zaman tələb edirdi. Lakin Azərbaycan Ordusu bunun öhdəsindən gəlməyi bacardı. Bu gücün qarşısında düşmən öz silahlarını yerə qoyub torpaqlarımızdan qaçdı. Füzuli işğalçılardan təmizləndi. Azərbaycan qürur duyulası bir qələbəyə imza atdı. Qələbə ilə başa çatan Vətən müharibəsindən sonra bütün dünya qalib Azərbaycanın uğurlarına şahidlik edir. Artıq hər gün ölkəmizin, dövlətimizin ,xalqımızın yaddaşına əlamətdar hadisələrlə yazılır. Tarixi Qələbə günlərinin əbədiləşdirilməsi də dövlət siyasətinin tərkib hissəsidir. Prezident İlham Əliyevin 31 iyul 2023-cü il tarixli Sərəncamı ilə Azərbaycan Respublikasının işğaldan azad edilmiş əraziləri üzrə şəhər günləri təsis edilmişdir. Sözügedən Sərəncama əsasən 17 Oktyabr - Füzuli Şəhəri Günü kimi müəyyən olunub. Xalq olaraq bu günü qürurla qeyd edirik. Lakin ötən illər ərzində baş verənləri, Füzuli rayonunun necə işğal olunduğunu da unutmuruq. Prezident, Müzəffər Ali Baş Komandan İlham Əliyevin sərəncamları ilə Füzuli rayonunun işğaldan azad edilməsi uğrunda aparılmış döyüş əməliyyatlarında iştirak edərək şəxsi igidlik və şücaət nümayiş etdirmiş Azərbaycan Silahlı Qüvvələrinin 25 min 301 hərbi qulluqçusu “Füzulinin azad olunmasına görə” medalı ilə təltif edilib.

Füzulini büsbütün dağıdılmış, viran qoyulmuş, ən pisi isə demək olar, tamamilə minalanmış bir vəziyyətdə geri aldıq. Füzuli faktiki olaraq azad edilmiş rayonlar arasında minaların sayına görə ən çox çirkləndirilmiş rayondur. İlkin hesablamalara görə rayonda yüz mindən çox mina basdırılıb. Bu böyük fəlakətdir. Minaların təmizlənməsi zaman və zəhmət tələb edir. Bu faktın dəhşəti bizə işğalın tarixini, onun doğurduğu acı nəticələri heç cür unutdura bilməz. Hazırda Füzuli rayonunda böyük quruculuq işləri həyata keçirilir. Bu işlər cənab Prezidentin şəxsi nəzarətindədir. Bu möhtəşəm işlər nəticəsində Füzuli şəhəri və rayonun kəndləri bərpa olunur və insanlar öz doğma yurdlarına qayıdırlar.

İşğaldan azad edilmiş ərazilərimizdə, o cümlədən Füzuli şəhərində qısa bir zamanda reallaşan infrastruktur layihələri, abadlıq və quruculuq işləri Azərbaycanın iqtisadi gücünü bir daha nümayiş etdirir. Bu gün Füzuli şəhəri yenidən quruculuq və inkişaf mərhələsini yaşayır. Şəhərdə müasir yaşayış kompleksləri, yollar, sosial obyektlər və digər infrastruktur layihələri həyata keçirilir. İnsanların doğma yurdlarına qayıtması, ailələrin öz evlərində məskunlaşması Füzulinin dirçəlişinin ən sevindirici göstəricilərindəndir. 2023-cü il avqustun 18-dən etibarən şəhərə keçmiş məcburi köçkünlərin qayıdışı başlayıb. Füzuli Şəhəri Günü qeyd olunarkən torpaqlarımızın azadlığı uğrunda canlarından keçən şəhidlərimizin əziz xatirəsi dərin ehtiramla yad edilir. Onların qəhrəmanlığı, qazilərimizin fədakarlığı və Azərbaycan əsgərinin misilsiz şücaəti bu gün əldə etdiyimiz Zəfərin təməlində dayanır. Bu gün biz yalnız qələbəmizi qeyd etmirik, həm də gələcək nəsillər qarşısında tarixi yaddaşımızı qorumaq məsuliyyətimizi dərk edirik. Füzulinin azadlığı uğrunda aparılan mübarizə Vətən sevgisinin, birliyin və milli iradənin nə qədər böyük qüvvə olduğunu bir daha sübut etdi.

Paylaş:

Baxılıb: 32 dəfə

Xəbər lenti

Hamısına bax