Azərbaycan–Özbəkistan münasibətlərində yeni səhifə

Bakı:

25 °C

73 %

11 m/s

Əlaqə

AZ RU EN

Ana səhifə / YAP xəbərləri / Azərbaycan–Özbəkistan münasibətlərində yeni səhifə

Azərbaycan–Özbəkistan münasibətlərində yeni səhifə

28.08.2026 [12:50]

Ölkə başçısı cənab İlham Əliyevin Özbəkistana dövlət səfəri Azərbaycan-Özbəkistan münasibətlərinin inkişafında mühüm hadisə kimi yadda qaldı. Səfər çərçivəsində keçirilən görüşlər və aparılan müzakirələr iki qardaş ölkə arasında əlaqələrin yeni istiqamətlər üzrə daha da genişləndirilməsi baxımından mühüm əhəmiyyət daşıyır. Avqustun 23-də Daşkənddə mətbuata bəyanatla çıxış edən cənab İlham Əliyev Azərbaycanla Özbəkistan arasında münasibətlərin mahiyyəti, əldə olunan nəticələr və gələcək əməkdaşlığın əsas istiqamətləri barədə ətraflı fikirlərini bölüşdü.

Dövlət başçısının səsləndirdiyi fikirlərdən bir daha aydın oldu ki, Azərbaycan və Özbəkistan arasında münasibətlər möhkəm siyasi iradə, qarşılıqlı etimad və xalqlarımızın tarixi-mədəni yaxınlığı üzərində qurulub. İki ölkəni birləşdirən ortaq dəyərlər əlaqələrin inkişafı üçün möhkəm zəmin yaradır. Son illərdə münasibətlərin bütün istiqamətlər üzrə sürətlə inkişaf etməsi də məhz bu möhkəm təmələ söykənir.

Cənab İlham Əliyev Özbəkistanın son illərdə əldə etdiyi böyük sosial-iqtisadi nailiyyətləri yüksək qiymətləndirdi. Ölkənin sürətli inkişafı, həyata keçirilən genişmiqyaslı infrastruktur layihələri və iqtisadiyyatın müxtəlif sahələrində aparılan islahatlar Özbəkistanın regional mövqeyini daha da gücləndirib. Azərbaycanla Özbəkistan arasında iqtisadi əməkdaşlığın genişləndirilməsi, qarşılıqlı investisiyaların artırılması və yeni birgə layihələrin həyata keçirilməsi isə iki ölkənin iqtisadi potensialından daha səmərəli istifadə etməyə imkan verir.

Nəqliyyat və logistika sahəsində əməkdaşlıq xüsusi əhəmiyyət daşıyır. Azərbaycanın Avropa ilə Asiyanı birləşdirən mühüm nəqliyyat qovşaqlarından biri kimi mövqeyi, Özbəkistanın isə Mərkəzi Asiyada mühüm iqtisadi və coğrafi imkanlara malik olması iki ölkə arasında tranzit əlaqələrinin genişləndirilməsi üçün əlverişli şərait yaradır. Trans-Xəzər beynəlxalq nəqliyyat marşrutunun inkişafı Azərbaycan və Özbəkistanın regional əməkdaşlığını daha da gücləndirən əsas istiqamətlərdən biridir.

Özbəkistanın Azərbaycanın işğaldan azad edilmiş ərazilərinin bərpasında iştirakı iki ölkə arasındakı qardaşlığın əməli ifadəsidir. Füzulidə Mirzə Uluqbəy adına məktəbin inşa edilməsi və Xankəndidə həyata keçirilən layihələr Özbəkistanın Azərbaycanın ərazi bütövlüyünün bərpasından sonra Qarabağda aparılan quruculuq işlərinə verdiyi dəstəyin bariz nümunəsidir. Bu həm də xalqlarımız arasında dostluğun yalnız siyasi bəyanatlarla deyil, konkret əməllərlə təsdiqləndiyini göstərir.

Mədəni-humanitar əlaqələrin inkişafı da Azərbaycan - Özbəkistan münasibətlərinin mühüm istiqamətidir. Nizami Gəncəvi və Əlişir Nəvai kimi böyük şəxsiyyətlərin irsi iki xalqın ortaq mənəvi dəyərlərinin zənginliyini nümayiş etdirir. Təhsil, mədəniyyət və humanitar sahələrdə həyata keçirilən birgə layihələr xalqlarımız arasındakı əlaqələrin gələcək nəsillər arasında da davamlı olmasına xidmət edir.

Ümumilikdə, cənab İlham Əliyevin Daşkənddə mətbuata verdiyi bəyanat Azərbaycan-Özbəkistan münasibətlərinin yüksək səviyyəsini və gələcək inkişaf perspektivlərini bir daha ortaya qoydu. Bu gün iki ölkə arasında əməkdaşlıq artıq yalnız ikitərəfli münasibətlər çərçivəsində deyil, Cənubi Qafqazla Mərkəzi Asiya arasında əlaqələrin möhkəmləndirilməsi baxımından da mühüm əhəmiyyət daşıyır. Qarşılıqlı etimad, möhkəm siyasi iradə və qardaşlıq münasibətləri Azərbaycan və Özbəkistan arasında strateji tərəfdaşlığın bundan sonra da uğurla inkişaf edəcəyinə əminlik yaradır.

Elşən Səfərov

YAP Ağcabədi rayon təşkilatının əməkdaşı

Paylaş:

Baxılıb: 171 dəfə