Azərbaycan dili milli kimliyimizin və dövlətçiliyimizin əbədi dayağıdır

Bakı:

30 °C

54 %

8 m/s

Əlaqə

AZ RU EN

Ana səhifə / YAP xəbərləri / Azərbaycan dili milli kimliyimizin və dövlətçiliyimizin əbədi dayağıdır

Azərbaycan dili milli kimliyimizin və dövlətçiliyimizin əbədi dayağıdır

29.07.2026 [12:04]

Toğrul Zeynalov

YAP Ağdam rayon təşkilatının əməkdaşı

Hər bir xalqın milli varlığını yaşadan, onun tarixini, mədəniyyətini və mənəvi irsini gələcək nəsillərə çatdıran ən mühüm dəyər ana dilidir. Azərbaycan dili də əsrlər boyu xalqımızın milli kimliyini qoruyub saxlamış, zəngin ədəbi və elmi irsin formalaşmasına xidmət etmişdir. Müstəqillik illərində dövlət dilinin inkişafı və qorunması dövlət siyasətinin prioritet istiqamətlərindən birinə çevrilmiş, bu sahədə ardıcıl və məqsədyönlü addımlar atılmışdır. 1 Avqust – Azərbaycan əlifbası və Azərbaycan dili günü məhz ana dilimizin milli dövlətçilik tariximizdə tutduğu müstəsna yeri, onun xalqımızın birlik və həmrəyliyinin əsas rəmzlərindən biri olduğunu bir daha xatırladır. Bu əlamətdar gün Azərbaycan dilinin zənginliyinin, saflığının və inkişafının qorunmasının hər bir vətəndaşın mənəvi borcu olduğunu ön plana çıxarır.

Azərbaycan dilinin dövlət dili kimi möhkəmləndirilməsi və onun hüquqi əsaslarının yaradılması Ümummilli Lider Heydər Əliyevin uzaqgörən siyasətinin ən mühüm istiqamətlərindən biri olmuşdur. Ulu Öndər ana dilini milli dövlətçiliyin ayrılmaz atributu hesab edir, onun bütün sahələrdə tətbiqini ardıcıl şəkildə təmin edirdi. Bu siyasi kurs bu gün Prezident İlham Əliyev tərəfindən uğurla davam etdirilir. Dövlət dilinin tətbiqinin genişləndirilməsi, Azərbaycan dilinin saflığının qorunması, latın qrafikalı əlifbanın inkişafı, milli terminologiyanın zənginləşdirilməsi, rəqəmsal informasiya məkanında Azərbaycan dilinin mövqeyinin gücləndirilməsi istiqamətində həyata keçirilən tədbirlər ana dilimizin müasir dövrün tələblərinə uyğun inkişafını təmin edir. Təhsil, elm, mədəniyyət və media sahələrində Azərbaycan dilinin nüfuzunun artırılması milli-mənəvi dəyərlərimizin qorunmasına və dövlətçiliyimizin daha da möhkəmlənməsinə xidmət edir.

Qloballaşma və sürətlə inkişaf edən informasiya texnologiyaları dövründə milli dillərin qorunması hər bir dövlət üçün strateji məsələdir. Azərbaycan dili də bu prosesdə öz zənginliyini və ifadə imkanlarını qoruyaraq inkişaf edir. Bununla yanaşı, dilimizin saflığının qorunması, xarici təsirlərin mənfi nəticələrinin qarşısının alınması, gənc nəslin ana dilində səlis danışması və yazması cəmiyyət qarşısında mühüm vəzifələr olaraq qalır. Hər bir ailə, hər bir müəllim, hər bir ziyalı və hər bir vətəndaş ana dilinə sahib çıxmaqla milli kimliyimizin qorunmasına töhfə verir. Azərbaycan dili yalnız ünsiyyət vasitəsi deyil, xalqımızın tarixi yaddaşı, milli qüruru və müstəqil dövlətçiliyimizin ən mühüm sütunlarından biridir. Bu müqəddəs dəyərin yaşadılması və gələcək nəsillərə olduğu kimi çatdırılması Azərbaycanın gələcək inkişafının və milli birliyinin etibarlı təminatıdır.

Paylaş:

Baxılıb: 352 dəfə