Türkmənistan Prezidentinin Azərbaycana rəsmi səfəri və qardaşlıq münasibətlərinin yeni üfüqləri

Bakı:

26 °C

57 %

4 m/s

AZ RU EN

Ana səhifə / YAP xəbərləri / Türkmənistan Prezidentinin Azərbaycana rəsmi səfəri və qardaşlıq münasibətlərinin yeni üfüqləri

Türkmənistan Prezidentinin Azərbaycana rəsmi səfəri və qardaşlıq münasibətlərinin yeni üfüqləri

25.06.2026 [16:37]

Azərbaycan ilə Türkmənistan arasında çoxəsrlik tarixə söykənən dostluq və qardaşlıq əlaqələri bu gün özünün ən yüksək inkişaf mərhələsini yaşayır. Xəzər dənizinin birləşdirdiyi bu iki qardaş dövlət həm ikitərəfli formatda, həm də beynəlxalq arenada hər zaman bir-birinin maraqlarını dəstəkləyir və vahid mövqedən çıxış edir. Türkmənistan Prezidenti Sərdar Berdiməhəmmədovun 2026-cı il iyunun 22-də Azərbaycana rəsmi səfəri bu münasibətlərin dinamik və çoxşaxəli xarakterini bir daha təsdiq etmişdir. Səfər çərçivəsində keçirilən ali səviyyəli görüşlərdən sonra mətbuata bəyanatla çıxış edən Azərbaycan Respublikasının Prezidenti İlham Əliyev iki ölkə arasındakı strateji tərəfdaşlığın, siyasi dialoqun və mənəvi birliyin ən mühüm məqamlarına toxunmuşdur.

Prezident İlham Əliyev öz bəyanatında ilk növbədə Türkmənistanın son illərdə qazandığı böyük nailiyyətləri yüksək qiymətləndirmişdir. Dövlətimizin başçısı bildirmişdir: "Biz dostlarınız və qardaşlarınız olaraq Türkmənistanın beynəlxalq uğurlarına sevinirik." Azərbaycan Prezidenti vurğulamışdır ki, Türkmənistanın neytrallıq siyasəti çərçivəsində qlobal miqyasda irəli sürdüyü sülhməramlı təşəbbüslər, eləcə də ölkədə həyata keçirilən genişmiqyaslı sosial-iqtisadi islahatlar Azərbaycanda böyük rəğbətlə qarşılanır. Qardaş ölkənin qüdrətlənməsi və beynəlxalq müstəvidə nüfuzunun artması bütövlükdə Türk dünyasının güclənməsinə xidmət edir.

Müasir dünyada coğrafi mövqeyin mühüm üstünlüklər yaratmasına baxmayaraq, dövlətlər arasında möhkəm siyasi iradənin olmasının həlledici rol oynadığı bəyanatda xüsusi qeyd edilmişdir. Prezident İlham Əliyev bu barədə danışarkən bildirmişdir: "Siyasi qarşılıqlı fəaliyyət olmasaydı, heç bir coğrafi şərait səylərimizi birləşdirməyə imkan verməzdi." Dövlət başçısı qeyd etmişdir ki, Azərbaycan və Türkmənistan Şərq-Qərb və Şimal-Cənub nəqliyyat dəhlizlərinin mərkəzində yerləşən strateji coğrafi mövqeyə malikdirlər. Lakin bu coğrafi üstünlüyü real iqtisadi və logistik uğurlara çevirən əsas amil məhz iki ölkə rəhbərliyi arasındakı yüksək səviyyəli siyasi etimad, qarşılıqlı anlaşma və strateji koordinasiyadır. Bu siyasi iradə sayəsində bu gün Xəzər dənizi regionda nəqliyyat, energetika və ticarət sahələrində ən təhlükəsiz və səmərəli əməkdaşlıq məkanına çevrilmişdir.

Bəyanatın ən emosional və əlamətdar məqamlarından biri isə Türkmənistanın işğaldan azad edilmiş Azərbaycan torpaqlarında aparılan yenidənqurma işlərinə verdiyi qardaşlıq dəstəyi ilə bağlı olmuşdur. Prezident İlham Əliyev bu nəcib addımı xüsusi minnətdarlıqla qeyd edərək demişdir: "Qarabağın bərpasında köməyə görə Türkmənistana, əziz qardaşım Arkadağ Qurbanqulu Məlikquliyeviç Berdiməhəmmədova bir daha təşəkkürümü bildirmək istərdim." Türkmən xalqının milli lideri, Türkmənistan Xalq Məsləhətinin Sədri Qurbanqulu Berdiməhəmmədovun təşəbbüsü ilə Qarabağda həyata keçirilən humanitar və quruculuq layihələri, o cümlədən uşaqlar üçün inşa edilən incəsənət məktəbi iki xalqın bir-birinə olan saf sevgi və sadiqliyinin əbədi rəmzidir. Bu addım bir daha nümayiş etdirir ki, Türkmənistan təkcə yaxşı gündə deyil, həm də tarixi ədalətin bərpası və torpaqlarımızın dirçəldilməsi dövründə də hər zaman Azərbaycanın yanındadır.

Prezident İlham Əliyev Türkmənistan Prezidenti Sərdar Berdiməhəmmədovun bu rəsmi səfərinin və aparılan səmərəli danışıqların ölkələrimiz arasında formalaşmış sarsılmaz platformanı daha da möhkəmləndirəcəyinə və gələcək birgə regional layihələrin icrasına güclü təkan verəcəyinə əminliyini ifadə etmişdir.

Nicat Quliyev

YAP Laçın rayon təşkilatının məsləhətçisi

Paylaş:

Baxılıb: 281 dəfə