Azərbaycan regionda sülhə və sabitliyə töhfə verən ölkədir

Bakı:

29 °C

45 %

3 m/s

Əlaqə

AZ RU EN

Ana səhifə / YAP xəbərləri / Azərbaycan regionda sülhə və sabitliyə töhfə verən ölkədir

Azərbaycan regionda sülhə və sabitliyə töhfə verən ölkədir

27.04.2026 [12:09]

Cari ilin aprel ayının 25-də Ukrayna Prezidenti Volodimir Zelenskinin Azərbaycana işgüzar səfəri çərçivəsində Azərbaycan Prezidenti cənab İlham Əliyev ilə keçirilən görüş və ardınca verilən birgə mətbuat bəyanatları mühüm siyasi hadisə kimi yadda qaldı. Bu səfər Ukrayna prezidentinin son illərdə Azərbaycana ilk rəsmi gəlişi olmaqla yanaşı, iki ölkə arasında münasibətlərin yeni mərhələyə qədəm qoyduğunu nümayiş etdirdi. Görüş zamanı dövlət başçıları həm ikitərəfli əlaqələrin hazırkı vəziyyətini, həm də regional və beynəlxalq məsələləri geniş şəkildə müzakirə etdilər.

Möhtərəm Prezident cənab İlham Əliyev mətbuata bəyanatında bildirdi ki, Azərbaycan ilə Ukrayna arasında münasibətlər qarşılıqlı hörmət, etimad və dostluq prinsiplərinə əsaslanır. Bu iki ölkə arasında siyasi dialoq yüksək səviyyədədir və bu səfər həmin dialoqu daha da gücləndirəcək.

Bəyanat zamanı cənab Prezident xüsusilə iqtisadi və enerji sahəsində əməkdaşlığın əhəmiyyətinə də toxundu. O qeyd etdi ki, Azərbaycanın enerji şirkətləri uzun illərdir Ukrayna bazarında uğurla fəaliyyət göstərir və gələcəkdə bu istiqamətdə birgə layihələrin, investisiyaların və yeni təşəbbüslərin həyata keçirilməsi üçün geniş imkanlar mövcuddur. Azərbaycanın qlobal enerji təhlükəsizliyində mühüm rol oynadığını vurğulayan Dövlət başcısı, Ukrayna ilə enerji sahəsində əməkdaşlığın təkcə iki ölkə üçün deyil, bütövlükdə region üçün strateji önəm daşıdığını bildirdi.

Ölkə rəhbərinin bəyanatında diqqət çəkən əsas məqamlardan biri də hərbi-texniki və müdafiə sənayesi sahəsində əməkdaşlıq perspektivləri oldu. O bildirdi ki, həm Azərbaycan, həm də Ukrayna son illərdə öz hərbi sənaye komplekslərini inkişaf etdirən ölkələrdir və bu istiqamətdə birgə istehsal, təcrübə mübadiləsi və texnoloji əməkdaşlıq üçün ciddi imkanlar mövcuddur. Cənab Prezident bu sahədə əməkdaşlığın hər iki dövlətin təhlükəsizliyinə və müdafiə qabiliyyətinin güclənməsinə xidmət edəcəyini xüsusi vurğuladı

Dövlət başçısı humanitar əlaqələrə də toxunaraq bildirdi ki, Azərbaycan çətin dövrdə Ukrayna xalqına dəstəyini davam etdirir. Xüsusilə, müharibədən zərər çəkmiş uşaqların Azərbaycanda qəbul olunması, onların reabilitasiyası və sosial dəstək proqramlarına cəlb edilməsi dostluq münasibətlərinin humanist tərəfini ortaya qoyur.

Volodimir Zelenskinin Azərbaycana səfəri zamanı mətbuata verilən bəyanat Azərbaycan-Ukrayna münasibətlərində yeni əməkdaşlıq səhifəsinin açıldığını nümayiş etdirdi. Siyasi dəstək, iqtisadi tərəfdaşlıq, enerji təhlükəsizliyi, müdafiə sənayesi və humanitar sahələr üzrə səsləndirilən fikirlər göstərdi ki, iki ölkə arasında əlaqələr gələcəkdə daha da dərinləşəcək. Bu bəyanat həm də, Azərbaycanın regionda etibarlı tərəfdaş, sülhə və sabitliyə töhfə verən nüfuzlu dövlət kimi rolunu bir daha təsdiqlədi.

Nazim Bünyatov

YAP Ağcabədi rayon təşkilatının sədr müavini

Paylaş:

Baxılıb: 589 dəfə