Fransa xüsusi xidmət orqanları xəbərdarlıq edir: Hibrid müharibənin məqsədi döyüşmədən ölkələri təslim etdirməkdir

Bakı:

24 °C

60 %

6 m/s

AZ RU EN

Ana səhifə / Dünya / Fransa xüsusi xidmət orqanları xəbərdarlıq edir: Hibrid müharibənin məqsədi döyüşmədən ölkələri təslim etdirməkdir

Fransa xüsusi xidmət orqanları xəbərdarlıq edir: Hibrid müharibənin məqsədi döyüşmədən ölkələri təslim etdirməkdir

03.08.2026 [09:17]

Fransa Milli Assambleyasının Milli müdafiə və silahlı qüvvələr komissiyasında keçirilən dinləmələrdə Daxili Təhlükəsizlik Baş İdarəsinin (DGSI) rəhbəri Selin Berton və Müdafiə Kəşfiyyatı və Təhlükəsizliyi İdarəsinin (DRSD) direktoru, ordu korpusu generalı Aymerik Bonmezon ölkənin üzləşdiyi hibrid təhlükələr barədə xəbərdarlıq ediblər. Onların çıxışları Fransanın öz ərazisində mümkün hibrid hücumlara hazırlıq gördüyü dövrə təsadüf edir.

AZƏRTAC xəbər verir ki, dinləmələr zamanı hər iki qurumun rəhbəri hibrid müharibənin müasir təhlükəsizlik mühitinin əsas çağırışlarından birinə çevrildiyini vurğulayıb. Onların sözlərinə görə, mülki və hərbi əks-kəşfiyyat xidmətləri casusluğun, xarici müdaxilələrin və milli təhlükəsizliyə yönəlmiş fəaliyyətlərin qarşısının alınmasında əsas rol oynayır.

Bertonun sözlərinə görə, hibrid müharibənin məqsədi birbaşa silahlı qarşıdurmaya girmədən üstünlük qazanmaq, rəqibi qorxutmaq və ya onun sabitliyini pozmaqdır. Bu fəaliyyətlər qəsdən qeyri-müəyyən formada həyata keçirilir ki, onların arxasında duran tərəfi müəyyən etmək mümkün olmasın və ya bunu sübut etmək çətinləşsin.

General Aymerik Bonmezon da oxşar mövqe sərgiləyərək bildirib ki, hibrid müharibənin məqsədi klassik hərbi döyüşə girmədən rəqibi öz iradəsinə tabe etdirməkdir. O qeyd edib ki, bunun üçün dövlət təhlükələri vaxtında aşkar etməli, onları müəyyənləşdirməli, qarşısını almalı və cəmiyyətin davamlı maarifləndirilməsini təmin etməlidir.

DRSD rəhbərinin sözlərinə görə, son illərdə hərbi obyektlər üzərində pilotsuz uçuş aparatlarının müşahidə olunması və müdafiə sənayesi zonaları üzərində kəşfiyyat xarakterli uçuşların artması artıq hibrid fəaliyyətin nümunələri kimi qeydə alınıb. Lakin belə hallarda əsas çətinlik təhlükənin mənbəyini dəqiq müəyyənləşdirməkdir.

Fransa təhlükəsizlik qurumları hesab edir ki, hibrid təhdidlərə qarşı mübarizənin əsas şərti mülki və hərbi strukturlar arasında əməkdaşlığın gücləndirilməsidir. Məhz bu məqsədlə 2026-cı ilin əvvəlində DGSI və DRSD Fransa ərazisində Soyuq müharibədən bəri keçirilən ən iri hərbi təlim – Orion manevrlərində fəal iştirak edib. Təlim proqramına xarici müdaxilə, casusluq, kiberhücumlar, informasiya manipulyasiyası və həssas infrastrukturun müşahidəsinə qarşı mübarizə ssenariləri daxil edilib.

Paylaş:

Baxılıb: 296 dəfə