Azərbaycanın beynəlxalq siyasətdə artan rolu

Bakı:

17 °C

72 %

8 m/s

Əlaqə

AZ RU EN

Ana səhifə / YAP xəbərləri / Azərbaycanın beynəlxalq siyasətdə artan rolu

Azərbaycanın beynəlxalq siyasətdə artan rolu

16.03.2026 [16:23]

Müasir dövrdə beynəlxalq münasibətlər sistemində baş verən dəyişikliklər, geosiyasi gərginliklər və yeni çağırışlar dövlətlər arasında əməkdaşlığın əhəmiyyətini daha da artırır. Bu baxımdan, Qlobal Bakı Forumu dünyanın aparıcı siyasi xadimlərini, ekspertlərini və beynəlxalq təşkilatların nümayəndələrini bir araya gətirən mühüm beynəlxalq platforma kimi xüsusi rol oynayır. Forum çərçivəsində Azərbaycan Respublikasının Prezidenti İlham Əliyevin çıxışı həm regional, həm də qlobal məsələlərə dair mühüm mesajları ilə diqqət çəkmişdir. Dövlət başçısı çıxışında Azərbaycanın beynəlxalq siyasətdə mövqeyini, regionda sülh və əməkdaşlıq təşəbbüslərini, həmçinin dünyada baş verən proseslərə münasibətini ətraflı şəkildə təqdim etmişdir. Prezident İlham Əliyev çıxışında vurğulamışdır ki, Bakı artıq uzun illərdir ki, beynəlxalq dialoq və əməkdaşlıq üçün mühüm mərkəzlərdən birinə çevrilmişdir. Müxtəlif qlobal tədbirlərin və beynəlxalq forumların paytaxtımızda keçirilməsi Azərbaycanın beynəlxalq nüfuzunun artdığını göstərir. Dövlət başçısı qeyd etmişdir ki, Qlobal Bakı Forumu qlobal problemlərin müzakirəsi üçün mühüm intellektual platformadır və burada irəli sürülən ideyalar beynəlxalq siyasətdə mühüm rol oynayır.Forumun təşkilində xüsusi rol oynayan Nizami Gəncəvi Beynəlxalq Mərkəzinin fəaliyyəti də Prezident tərəfindən yüksək qiymətləndirilmişdir. Qeyd edilmişdir ki, bu mərkəz qlobal dialoqun təşviq olunması, müxtəlif ölkələr arasında əməkdaşlığın genişləndirilməsi və dünya miqyasında sülh təşəbbüslərinin dəstəklənməsi istiqamətində mühüm işlər görür. Prezident İlham Əliyev çıxışında regionda sülh və sabitliyin təmin olunmasının Azərbaycanın əsas prioritetlərindən biri olduğunu bildirmişdir. O qeyd etmişdir ki, uzun illər davam edən münaqişələr regionun inkişafına ciddi maneələr yaratmışdır. Azərbaycanın ərazi bütövlüyünün bərpa olunması isə regionda yeni siyasi reallıqlar yaratmışdır, Azərbaycan bölgədə davamlı sülhün təmin olunması üçün konstruktiv mövqe nümayiş etdirir və qonşu ölkələrlə əməkdaşlığın genişləndirilməsinə xüsusi önəm verir. Sülh müqaviləsinin imzalanması istiqamətində aparılan danışıqların region üçün yeni imkanlar yaradacağı qeyd olunmuşdur.

Azərbaycan bu gün Avropanın enerji təhlükəsizliyində mühüm rol oynayan ölkələrdən biridir. Azərbaycanın zəngin enerji resursları və həyata keçirilən böyük enerji layihələri bir çox ölkələrin enerji təminatında mühüm əhəmiyyət daşıyır.Dövlət başçısı qeyd etmişdir ki, Azərbaycan təkcə ənənəvi enerji resurslarının ixracı ilə kifayətlənmir, eyni zamanda yaşıl enerji sahəsinin inkişafına da böyük önəm verir. Xüsusilə bərpa olunan enerji layihələri və beynəlxalq tərəfdaşlarla əməkdaşlıq bu istiqamətdə yeni perspektivlər açır. Dövlət başçısı dünyada artan siyasi gərginliklər, iqtisadi böhranlar və təhlükəsizlik məsələləri kimi qlobal problemlərə də toxunmuşdur. O vurğulamışdır ki, müasir dövrdə dövlətlər arasında qarşılıqlı hörmət, beynəlxalq hüquqa əsaslanan əməkdaşlıq və dialoq mühüm əhəmiyyət kəsb edir.Azərbaycan daim beynəlxalq hüququn prinsiplərinə sadiq qalmış və beynəlxalq təşkilatlarla əməkdaşlığa böyük önəm vermişdir. Bu siyasət ölkəmizin beynəlxalq nüfuzunun artmasına və müxtəlif platformalarda etibarlı tərəfdaş kimi tanınmasına səbəb olmuşdur.

Azərbaycan Respublikasının Prezidenti İlham Əliyevin himayəsi altında və Nizami Gəncəvi Beynəlxalq Mərkəzinin təşkilatçılığı ilə “Keçid dövründə olan dünyada fikir ayrılıqlarının aradan qaldırılması” mövzusunda XIII Qlobal Bakı Forum bir daha göstərdi ki, Bakı artıq qlobal problemlərin müzakirə olunduğu mühüm beynəlxalq mərkəzlərdən biridir. Azərbaycanın həyata keçirdiyi siyasət isə regionda sabitlik, əməkdaşlıq və inkişafın təmin olunmasına xidmət edir.

Azər Ağayev

YAP Tərtər rayon təşkilatının sədr müavini

Paylaş:

Baxılıb: 419 dəfə