Davosdan dünyaya ünvanlanan strateji mesajlar

Bakı:

10 °C

87 %

5 m/s

Əlaqə

AZ RU EN

Ana səhifə / YAP xəbərləri / Davosdan dünyaya ünvanlanan strateji mesajlar

Davosdan dünyaya ünvanlanan strateji mesajlar

22.01.2026 [15:41]

Yanvarın 20-də İsveçrənin Davos şəhəri yenə də qlobal siyasi və iqtisadi düşüncənin mərkəzinə çevrilmişdi. Dünya liderləri, beynəlxalq təşkilatların rəhbərləri, aparıcı media qurumları dəyişən dünya nizamının konturlarını müzakirə edərkən bu mötəbər platformadan səslənən fikirlər xüsusi diqqətlə dinlənirdi. Məhz belə bir zamanda Prezident İlham Əliyevin Euronews televiziyasına verdiyi müsahibə təkcə Azərbaycanın deyil, bütövlükdə regionun və qlobal proseslərin dərin təhlili kimi yadda qaldı.Bu müsahibə sadəcə sual-cavab formatında aparılan bir söhbət deyildi. O, müasir dünyanın reallıqlarına açılan bir pəncərə, yeni geosiyasi mərhələdə Azərbaycanın mövqeyini əks etdirən strateji manifest idi.

Prezident İlham Əliyev müsahibəsində müasir beynəlxalq münasibətlərin artıq əvvəlki qaydalarla işləmədiyini açıq şəkildə ifadə etdi. Dövlət başçısının fikrincə, dünya yeni bir mərhələyə qədəm qoyub burada güc balansı, milli maraqlar və praqmatik siyasət ön plana çıxır. Beynəlxalq hüququn selektiv tətbiqi, ikili standartlar və siyasi riyakarlıq qlobal sistemin etibarlılığını zəiflədib. Bu reallıq fonunda Azərbaycan öz yolunu aydın görür. Prezident İlham Əliyev vurğuladı ki, ölkəmiz yalnız öz milli maraqlarına söykənən, müstəqil və balanslaşdırılmış siyasət yürüdür. Bu siyasət isə emosiyalara deyil, real gücə, iqtisadi dayaqlara və beynəlxalq nüfuza əsaslanır.

Müsahibənin əsas xəttlərindən biri Cənub Qafqaz regionunun gələcəyi idi. Uzun illər münaqişələr və qarşıdurmalarla yadda qalan bu coğrafiya bu gün tamamilə yeni bir mərhələyə qədəm qoyur. Prezident İlham Əliyev qeyd etdi ki, Azərbaycan öz ərazi bütövlüyünü və suverenliyini bərpa etməklə regionda yeni reallıq yaradıb. Bu reallıq müharibə yox, sülh çağırışıdır. Dövlət başçısı açıq şəkildə bildirdi ki, Azərbaycan regionda davamlı sülhün, iqtisadi əməkdaşlığın və nəqliyyat əlaqələrinin qurulmasında maraqlıdır. Cənub Qafqazın artıq qarşıdurma yox, inkişaf və əməkdaşlıq məkanı olmasının vaxtı çatıb.

Davosdan səslənən mühüm mesajlardan biri də enerji təhlükəsizliyi ilə bağlı idi. Prezident İlham Əliyev Azərbaycanın bu sahədəki rolunu faktlarla ortaya qoydu. Prezident İlham Əliyevin müsahibəsində səsləndirdiyi fikirlər bir daha göstərdi ki, Azərbaycan yalnız enerji ixrac edən ölkə deyil, eyni zamanda enerji təhlükəsizliyinin təminatçısı, etibarlı və məsuliyyətli tərəfdaşdır.

Müsahibədə regional təhlükəsizlik məsələləri də diqqət mərkəzində oldu. Prezident İlham Əliyev qeyd etdi ki, mürəkkəb geosiyasi proseslərin fonunda Azərbaycanın daxili sabitliyi, ictimai-siyasi həmrəyliyi mühüm üstünlükdür. Bu sabitlik təsadüfi deyil, illərlə aparılan məqsədyönlü siyasətin nəticəsidir. Azərbaycan bu gün təkcə öz vətəndaşları üçün deyil, region üçün də sabitlik mənbəyidir. Dövlət başçısının Davosdan verdiyi mesajlar bir daha göstərdi ki, Azərbaycan gələcəyə inamla baxan, riskləri düzgün qiymətləndirən və çağırışlara hazır olan dövlətdir.

Prezident İlham Əliyevin Euronews televiziyasına verdiyi müsahibə Davosun gurultulu müzakirələri arasında xüsusi çəkisi ilə seçildi. Bu müsahibə Azərbaycanın dəyişən dünyada tutduğu mövqeyi, regional liderlik iddiasını və qlobal proseslərdə artan rolunu aydın şəkildə ortaya qoydu. Davosdan səslənən bu sözlər təkcə bugünün deyil, sabahın da mesajları idi. Azərbaycanın yolu bəllidir: müstəqil siyasət, güclü dövlət, etibarlı tərəfdaş və davamlı inkişaf.

Gündüz Alıkişiyev

YAP Tərtər rayon təşkilatının məsləhətçisi

Paylaş:

Baxılıb: 344 dəfə