Azərbaycan və Qazaxıstanın qarşılıqlı etimadı möhkəmlənir

Bakı:

15 °C

88 %

0 m/s

Əlaqə

AZ RU EN

Ana səhifə / YAP xəbərləri / Azərbaycan və Qazaxıstanın qarşılıqlı etimadı möhkəmlənir

Azərbaycan və Qazaxıstanın qarşılıqlı etimadı möhkəmlənir

23.10.2025 [23:14]

2025-ci il oktyabrın 21-də Astanada Azərbaycan Respublikasının Prezidenti İlham Əliyevin Qazaxıstana rəsmi səfəri çərçivəsində mətbuata verdiyi bəyanat iki qardaş ölkə arasında sarsılmaz dostluq və qarşılıqlı etimad münasibətlərini bir daha nümayiş etdirdi. Prezident İlham Əliyevin çıxışında səsləndirdiyi fikirlər Azərbaycanın və Qazaxıstanın beynəlxalq aləmdə hər zaman bir-birinə dəstək verməsi, ortaq mövqedən çıxış etməsi və qarşılıqlı etimada əsaslanan əlaqələrin dərinləşməsi baxımından mühüm siyasi məna daşıyır.

Dövlət başçısı vurğuladı ki, Azərbaycan və Qazaxıstan yalnız regionda deyil, qlobal miqyasda da bir-birinin mövqelərini daim dəstəkləyirlər. Ölkə Başçımızın sözlərinə görə, bu dəstək həm beynəlxalq təşkilatlarda aparılan işlərdə, həm də ikitərəfli əməkdaşlıq münasibətlərində özünü göstərir. Cənab Prezident qeyd etdi ki, Qazaxıstan Azərbaycanın suverenliyi və ərazi bütövlüyünün bərpası məsələsində daima prinsipial mövqe nümayiş etdirib. Bu, qardaş ölkələr arasındakı dostluğun səmimiliyini və dayanıqlığını sübut edir.

Azərbaycan və Qazaxıstan arasında münasibətlərin əsasını ortaq tarixi köklər, mədəni və mənəvi dəyərlər təşkil edir. Hər iki xalq türkdilli dünyaya mənsub olmaqla yanaşı, oxşar ənənələrə, ortaq baxışlara və eyni hədəflərə sahibdir. Cənab Prezident İlham Əliyevin bəyanatında da bu məqam xüsusi vurğulandı: iki ölkənin əməkdaşlığı yalnız siyasi və iqtisadi sahələrlə məhdudlaşmır, həm də ortaq mənəvi irsin qorunması və inkişafına xidmət edir.

Astanada keçirilən görüş zamanı tərəflər arasında iqtisadi, ticarət, nəqliyyat və enerji sahələrində əməkdaşlığın genişləndirilməsinə dair yeni razılaşmalar əldə olundu. Cənab Prezident Əliyev qeyd etdi ki, bu əməkdaşlıq bölgənin inkişafı, Orta Dəhliz layihəsinin səmərəliliyinin artırılması və Avrasiya məkanında inteqrasiya proseslərinin möhkəmlənməsi üçün böyük əhəmiyyət kəsb edir. Qazaxıstanla Azərbaycanın strateji tərəfdaşlığı artıq real layihələr və əməli nəticələrlə möhkəmlənir.

Ölkə Başçımızın bəyanatı həm də iki ölkə arasında münasibətlərin gələcək istiqamətlərini müəyyənləşdirən siyasi mesaj xarakteri daşıyır. Cənab Prezident vurğuladı ki, qarşılıqlı etimad və dostluq üzərində qurulan bu əlaqələr zamanın sınaqlarından keçib və bundan sonra da regionda sabitliyin və tərəqqinin əsas dayaqlarından biri olacaq. Onun sözlərinə görə, “Azərbaycan və Qazaxıstan bir-birinə etibar edən, bir-birini dəstəkləyən, gələcəyə birlikdə baxan ölkələrdir.”

Bu bəyanat bir daha göstərdi ki, müasir beynəlxalq münasibətlərdə ən etibarlı tərəfdaşlıq modeli məhz qarşılıqlı hörmət və səmimi dostluq üzərində qurulan əlaqələrdir. Azərbaycan və Qazaxıstan bu modelin parlaq nümunəsi kimi, təkcə öz xalqları üçün deyil, bütün türk dünyası və region üçün də sabitlik, əməkdaşlıq və inkişaf nümunəsi yaradırlar.

Elşən Səfərov

YAP Ağcabədi rayon təşkilatının məsləhətçisi

Paylaş:

Baxılıb: 492 dəfə