Füzuli – Zəfərin və dirçəlişin rəmzi

Bakı:

25 °C

78 %

3 m/s

Əlaqə

AZ RU EN

Ana səhifə / YAP xəbərləri / Füzuli – Zəfərin və dirçəlişin rəmzi

Füzuli – Zəfərin və dirçəlişin rəmzi

16.10.2025 [21:09]

Tarixin tozlu səhifələrində bəzən bir gün bir əsrə bərabər olur. Azərbaycan üçün 17 oktyabr da məhz belə günlərdəndir, unudulmaz, qürurlu, zəfər dolu bir gün. 2020-ci ilin həmin payız səhərində Azərbaycan əsgərinin ayaq səsləri illərlə susmuş Füzuli torpaqlarında azadlıq nəğməsi kimi səsləndi. Bu səslər yalnız düşməni torpaqdan deyil, illərlə ürəklərdə yığılıb qalmış nisgili də qovdu.

Füzuli, Yalnız bir coğrafi ərazi, bir şəhər deyil. O, illərlə sinəsi dağlı ana torpağın gözlərində donmuş yaşdır. Və o yaşlar 17 oktyabrda sevincə çevrildi. Füzuli torpağı nəhayət ki, övladlarını bağrına basa bildi. Vətənin mərd oğulları, sinəsində şəhidlik medalı kimi daşıdığı arzuları gerçəyə çevirdilər.

Füzuli uğrunda gedən döyüşlər təkcə hərbi əməliyyat deyildi bu, həm də haqqla nahaqqın, işıqla qaranlığın savaşında ədalətin zəfəri idi. Azərbaycan əsgəri dağları, dərələri, səngərləri keçərək, illərlə düşmənin "keçilməz" dediyi müdafiə xəttini çökdürdü. Bu qələbə sübut etdi ki, vətən eşqi ilə döyünən ürəklərin qarşısında heç bir sədd dayana bilməz.

İllərlə düşmən tapdağında qalan Füzuli yerlə-yeksan edilmişdi. Şəhərin küçələri viran, divarları susqun, yolları isə göz yaşı kimi səssiz idi. Lakin bu səssizlik arxasında böyük bir intizar, böyük bir ümid yatırdı. Və nəhayət, o gün gəldi, Füzuli azad olundu! Və o gündən sonra bu torpağın taleyi dəyişdi, bu yerlərdə həyat yenidən cücərməyə başladı.

İndi Füzuli dirçəlir. Hər daşında, hər küçəsində, ucalan hər binasında bir ümid var. Burada tikilən hər ev, salınan hər yol təkcə infrastruktur deyil, bu, həm də milli ruhun, tarixi yaddaşın bərpasıdır. Füzuli Beynəlxalq Hava Limanının tikintisi isə dünyanın diqqətini bu qəhrəman torpağa yönəldən, onun strateji və simvolik əhəmiyyətini bir daha vurğulayan mühüm bir addımdır.

Bu gün Füzuli nəinki azaddır, o həm də doğmadır. O, xalqımızın yaddaşında igidliyin və yenilməzliyin simvoludur. Hər qarışı şəhid qanı ilə sulanmış bu torpaq, indi azad nəfəs alır. Burada artıq bayrağımız dalğalanır, azan səsi eşidilir, uşaq gülüşü havaya qarışır.

17 oktyabr bu tarix indi qəlblərdə şəhidlərin xatirəsi ilə yanaşı, qürurla yaşayır. Bu gün təkcə bir şəhərin deyil, bir xalqın, bir millətin haqq savaşında əldə etdiyi möhtəşəm zəfərin tarixidir. Və bu zəfər, zaman keçdikcə daha da böyüyəcək, nəsildən-nəslə ötürüləcək, Füzuli isə daim azad, abad və əbədi yaşayacaq.

Elşən Səfərov

YAP Ağcabədi rayon təşkilatının məsləhətçisi

Paylaş:

Baxılıb: 616 dəfə