"Yeni dünya nizamında Azərbaycanın yeri və mövqeyi danılmazdır"

Bakı:

25 °C

78 %

3 m/s

Əlaqə

AZ RU EN

Ana səhifə / YAP xəbərləri / "Yeni dünya nizamında Azərbaycanın yeri və mövqeyi danılmazdır"

"Yeni dünya nizamında Azərbaycanın yeri və mövqeyi danılmazdır"

14.04.2025 [09:42]

Azər Süleymanov,

YAP Nəsimi rayon təşkilatının sədri

9 aprel 2025-ci il tarixində ADA Universitetində keçirilən “Yeni dünya nizamına doğru” adlı beynəlxalq forum, dünya gündəminin aktual məsələlərinin müzakirə edildiyi mühüm platformaya çevrildi. Forumda çıxış edən Azərbaycan Respublikasının Prezidenti İlham Əliyev, ölkənin beynəlxalq siyasətdə artan roluna, regional təhlükəsizlik və əməkdaşlıq məsələlərinə, eləcə də postmünaqişə dövründəki yeni çağırışlara dair bir sıra mühüm fikirlər səsləndirdi.

Prezidentin çıxışı zamanı xüsusi vurğulanan məqamlardan biri, artıq yeddinci dəfədir ki, müxtəlif ölkələrdən olan beynəlxalq ekspertlərin Azərbaycanda toplaşaraq qlobal gündəliyin əsas məsələlərini müzakirə etmələri oldu. Bu, Azərbaycanın artan beynəlxalq nüfuzunun və dialoq mərkəzi kimi qəbul edilməsinin bariz göstəricisidir.

Dövlət başçısı çıxışında, Azərbaycanın ərazi bütövlüyünün və suverenliyinin bərpası istiqamətində atılan son addımlara da toxundu. Bir il yarım əvvəl, cəmi 24 saatdan az davam edən antiterror tədbirləri ilə ölkə daxilində separatizmin kökünün kəsildiyini xatırladan Prezident, bu əməliyyatın suverenlik uğrunda döyüşün son nöqtəsi olduğunu qeyd etdi.

“Xəritəyə baxmaq kifayətdir ki, Azərbaycanın strateji əhəmiyyətini və nəzərə alınmamasının mümkünsüz olduğunu anlamaq olsun,” deyə vurğulayan Prezident İlham Əliyev, ölkənin coğrafi mövqeyinin, enerji resurslarının və nəqliyyat imkanlarının regional və qlobal əhəmiyyətini bir daha diqqətə çatdırdı.

O, həmçinin bildirdi ki, Azərbaycan qarşılıqlı hörmət və maraq prinsiplərinə əsaslanan xarici siyasəti nəticəsində bir çox ölkələrlə güclü münasibətlər qurub. Bu münasibətlərin əsasında bərabərlik, qarşılıqlı etimad və əməkdaşlıq dayanır.

Prezident çıxışında Azərbaycanın Ermənistanla davam edən normallaşma prosesinə də toxundu. Bildirdi ki, sülh sazişi imzalandıqdan sonra tərəflər arasında əməkdaşlığın başlanmasına heç bir maneə qalmayacaq. O qeyd etdi ki, müharibə bütün beynəlxalq hüquq normalarına və humanitar dəyərlərə uyğun şəkildə aparılıb və bu fakt beynəlxalq ictimaiyyət tərəfindən də qəbul edilməlidir.

Minsk qrupuna toxunan Prezident, bu qurumun artıq öz funksiyasını itirdiyini və hüquqi olaraq buraxılmaması üçün heç bir əsasın qalmadığını bildirdi. Onun sözlərinə görə, Ermənistan uzun illər ərzində dırnaqarası dostlarından yanlış və zərərli məsləhətlər alıb ki, bu da regionda sülhün və əməkdaşlığın qarşısını alıb.

“Biz hələ də Azərbaycanın Ermənistana qarşı guya yeni təcavüz planlaşdırdığına dair əsassız ittihamlarla üzləşirik,” deyə bildirən dövlət başçısı, bu kimi iddiaların heç bir hüquqi və faktiki əsası olmadığını vurğuladı. “Biz 30 illik işğalı unutmamalıyıq və bu yaddaş, gələcəkdə eyni səhvlərin təkrarlanmaması üçün əsas dərsdir,” – deyə o əlavə etdi.

Prezident Əliyev, Azərbaycanın atdığı bütün addımların tamamilə legitim olduğunu və beynəlxalq hüquqa əsaslandığını bir daha bəyan etdi. Ölkənin dost və müttəfiqləri ilə münasibətlərindən danışan Prezident, Türkiyə və İsraili Azərbaycanın yaxın dostları kimi təqdim etdi. O, müttəfiq Türkiyə və dost İsrailə regionda yeni reallıqlar fonunda əlaqələrini qurmaqda yardım göstərmək istədiklərini də bildirdi.

Azərbaycanın beynəlxalq təhlükəsizlik sahəsindəki aktiv rolu da çıxışda yer aldı. Prezident qeyd etdi ki, ölkəmiz NATO üzvü olmasa da, Əfqanıstan və İraqda beynəlxalq əməliyyatlara ilk qoşulan qeyri-NATO ölkələrindən biri olub. Bu, Azərbaycanın qlobal təhlükəsizliyə verdiyi töhfənin göstəricisidir.

“Dünyanın ən güclü ölkəsi olan ABŞ ilə hər zaman yaxşı münasibətlərimizin olmasını istəmişik,” deyə çıxışını tamamlayan Prezident İlham Əliyev, Azərbaycanın gələcəkdə də beynəlxalq əməkdaşlıq, sabitlik və inkişaf prinsiplərinə sadiq qalacağını vurğuladı.

Paylaş:

Baxılıb: 701 dəfə