ABŞ-Azərbaycan tərəfdaşlığı Cənubi Qafqaz üçün çox önəmlidir

Bakı:

19 °C

88 %

3 m/s

Əlaqə

AZ RU EN

Ana səhifə / YAP xəbərləri / ABŞ-Azərbaycan tərəfdaşlığı Cənubi Qafqaz üçün çox önəmlidir

ABŞ-Azərbaycan tərəfdaşlığı Cənubi Qafqaz üçün çox önəmlidir

17.03.2025 [14:01]

Natiq Quluzadə,

YAP Zəngilan rayon təşkilatının sədri

Bu gün Azərbaycanın dünya dövlətləri birliyində mövqeyi möhkəmləndikcə, ölkəmizin təşəbbüsü ilə yaradılmış beynəlxalq təsisatların da nüfuzu durmadan artır. O cümlədən mövcud regional və qlobal problemlərin ətraflı müzakirəsi və bütün digər istiqamətlərdə məhsuldar fikir mübadilələrinin aparılması üçün son dərəcə əverişli beynəlxalq iqtisadi-siyasi platforma olan Bakı Qlobal Forumunun getdikcə daha böyük əhəmiyyət kəsb etməsi də artıq inkar olunmayacaq bir faktdır. Təsadüfi deyil ki, martın 13-də Bakıda, “Gülüstan” sarayında Azərbaycan Respublikasının Prezidenti cənab İlham Əliyevin himayəsi altında və Nizami Gəncəvi Beynəlxalq Mərkəzinin təşkilatçılığı ilə öz işinə başlamış “Dünya düzəninin yenidən düşünülməsi: Çağırışların fürsətə çevrilməsi” mövzusunda keçirilən XII Qlobal Bakı Forumu tədbirin açılış mərasimində iştirak edən möhtərəm dövlət başçımız tərəfindən yüksək qiymətləndirilmişdir. Cənab Prezident Nizami Gəncəvi Beynəlxalq Mərkəzini belə bir mühüm beynəlxalq tədbiri yüksək səviyyədə təşkil etdiyinə görə təbrik etmişdir.

Hər zaman olduğu kimi, öz çıxışlarını obyektiv təhlillər və prinsipial yanaşmalar üzərində quran cənab Prezident İlham Əliyev bu dəfəki nitqində də beynəlxalq ictimaiyyəti son dərəcə narahat edən bir çox problemlərə toxundu. Dövlət başçımızın çıxışında diqqət mərkəzinə çəkilən əsas məqamlardan biri bu oldu ki, bu gün dünyada getdikcə sayı artan münaqişə ocaqlarının əsasında hansı ziddiyyətlərin durduğunu araşdırsaq, bu zaman onların əksəriyyətinin münaqişə tərəfləri olan ölkələrin deyil, onların daxili işlərinə müdaxilə etməyə çalışan böyük dövlətlərin apardıqları siyasət nəticəsində yarandığını görərik. Əlbəttə ki, bu, ilk növbədə ikili standartlar siyasəti təcrübəsinin və beynəlxalq hüququn pozulmasının nəticələridir.

Bu gün Fransa prezidentinin ofisi, cənab Makron, onların “Le Monde”, “Fiqaro” və digər bu kimi saxta xəbər mətbuatı ölkəmizə qarşı apardıqları qarayaxma kampaniyalarını səngitmək bilmirlər. Əksinə Fransa hər vəchlə Ermənistanı yeni müharibəyə təhrik etməyə çalışır. Fransa və onun Prezidentinin Ermənistanı təchiz etdiyi məhvedici silahlar bizə qarşı yönəlir. Bu gün başqa yerdə lazım ola biləcək “Sezar” haubitsaları Ermənistana göndərilir. Avropanın Sülh Fondu bu ölkəyə məhz silahlanma məqsədlərinə milyonlarla dollar pul göndərir. Fransa Ermənistana məhvedici silahlar göndərir. Onlar bunu niyə edirlər? Onlar nəyə hazırlaşırlar? Əlbəttə ki, bu suallar ətrafında XII Qlobal Bakı Forumunda geniş müzakirələrin aparılması da son dərəcə məqsədəuyğun olardı.

Forumda birmənalı olaraq müzakirə ediləcək məsələlərdən biri də yeni geosiyasi vəziyyətla bağlı olacaq. Bu gün bütün dünya ABŞ-də gedən prosesləri diqqətlə izləyir. Azərbaycanın da bu proseslərə marağı xüsusidir. Səbəb də budur ki, cənab Antoni Blinkenin Azərbaycana aid siyasəti, əslində, 30 ilə qurulmuş ABŞ-Azərbaycan münasibətlərini heçə endirdi. Ölkəmiz hər zaman ABŞ-ın çox etibarlı, yaxın tərəfdaşı olmuşdur. O cümlədən 2001-ci ildə Əfqanıstanda əməliyyatlara qoşulan ilk qeyri-NATO ölkələrindən biri də məhz Azərbaycan idi. Lakin qoşunlarımız ordan çıxandan sonra ABŞ ölkəmizə yenidən sanksiya tətbiq etdilər. Bu əlbəttə ki, iki ölkə arasında münasibətlərə böyük zərbə oldu. Lakin Azərbaycan hökuməti Dövlət Departamentinin bütün səylərinə baxmayaraq, ABŞ-Azərbaycan münasibətlərinin tam uçuruma yuvarlanmasına yol vermədi. Hazırda böyük ümidlər var ki, yeni Administrasiya ilə Cənubi Qafqaz, sülh, təhlükəsizlik, antiterror əməliyyatları, regionumuzun müasir inkişafı üçün hər zaman vacib olmuş güclü tərəfdaşlıq əlaqələri yenidən qurulacaq.

Paylaş:

Baxılıb: 358 dəfə