Azərbaycan-Gürcüstan münasibətləri: Regional əməkdaşlıq nümunəsi

Bakı:

22 °C

60 %

8 m/s

Əlaqə

AZ RU EN

Ana səhifə / YAP xəbərləri / Azərbaycan-Gürcüstan münasibətləri: Regional əməkdaşlıq nümunəsi

Azərbaycan-Gürcüstan münasibətləri: Regional əməkdaşlıq nümunəsi

24.01.2025 [15:07]

Meydanəli Yolçiyev,

YAP Daşkəsən rayon təşkilatının sədri

Yanvarın 17-də Azərbaycan Prezidenti İlham Əliyev və Gürcüstanın Baş naziri İrakli Kobaxidze Bakıda mətbuata bəyanatlarla çıxış etdilər. Bu görüş iki dövlət arasındakı strateji tərəfdaşlıq əlaqələrinin möhkəmləndirilməsi və regional layihələrin gələcək perspektivlərinin müzakirəsi baxımından mühüm əhəmiyyət kəsb edir.

Prezident İlham Əliyev çıxışında Gürcüstan-Azərbaycan əlaqələrinin tarixi köklərinə və bu münasibətlərin region üçün xüsusi əhəmiyyətinə toxundu. İki ölkənin əsrlər boyu mehriban qonşuluq və qardaşlıq şəraitində yaşadığı vurğulandı. Bu ənənələr hazırda siyasi-iqtisadi və enerji sahələrində sıx əməkdaşlıqla daha da güclənir.

Enerji sahəsində iki ölkənin birgə həyata keçirdiyi Bakı-Tbilisi-Ceyhan, Bakı-Tbilisi-Ərzurum və Bakı-Tbilisi-Qars kimi strateji layihələr regionun enerji təhlükəsizliyində həlledici rol oynayır. Prezident İlham Əliyev qeyd etdi ki, Gürcüstan vasitəsilə Azərbaycan hazırda 11 ölkəyə təbii qaz ixrac edir və bu ixrac ildən-ilə artır. Gürcüstanın təbii qaz tələbatının 80 faizindən çoxunun Azərbaycan tərəfindən təmin olunması iki dövlətin qarşılıqlı iqtisadi əlaqələrinin nə qədər vacib olduğunu göstərir. Bununla yanaşı, yaşıl enerji layihələrinin icrası da iki ölkənin müasir enerji strategiyasının prioritetlərindən biridir.

Orta Dəhliz layihəsi isə Gürcüstan və Azərbaycanın tranzit potensialını daha da artıracaq. Hər iki ölkənin nəqliyyat infrastrukturu sahəsindəki rəqəmsallaşma layihələri və koordinasiyalı fəaliyyəti bu dəhlizin uğurla başa çatdırılmasını təmin edəcək.

Görüşdə Gürcüstanda keçirilən parlament seçkilərindən sonra Baş nazir İrakli Kobaxidzenin ilk xarici səfərini Azərbaycana etməsi xüsusi vurğulandı. Bu, iki ölkə arasında siyasi münasibətlərin yüksək səviyyəsini göstərir. Prezident İlham Əliyev “Gürcü Arzusu” Partiyasının seçkilərdəki qələbəsini təbrik edərək, bu uğurun regionda sabitliyin möhkəmləndirilməsi baxımından əhəmiyyətini qeyd etdi.

Azərbaycanın Gürcüstan iqtisadiyyatına 3,6 milyard dollar sərmayə qoyması hökumətlər arasında qarşılıqlı etimadın və sərmayə mühitinin müsbət olmasının göstəricisidir. Bu yatırımlar təkcə iki ölkənin iqtisadi inkişafına deyil, həm də regionun iqtisadi inteqrasiyasına böyük töhfə verir.

İkitərəfli əlaqələrin inkişafında bu dövlətlərin Xarici İşlər nazirlikləri arasında siyasi məsləhətləşmələr, iqtisadi əməkdaşlıq üzrə birgə hökumətlərarası komissiya və parlamentlərarası əlaqələr üzrə İşçi Qrupu platformaları vacib rol oynayır. Azərbaycan-Gürcüstan əlaqələri beynəlxalq təşkilatlar çərçivəsində də uğurla inkişaf edir. BMT, ATƏT, GUAM, QDİƏT və digər beynəlxalq platformalarda ölkərimiz bir-birinin milli maraqları ilə bağlı məsələlərə hər zaman həssaslıqla yanaşır və dəstək nümayiş etdirirlər.

Görüşdə, həmçinin Cənubi Qafqaz regionunda sabitliyin qorunub saxlanılması və gələcəkdə daha geniş əməkdaşlıq imkanlarının araşdırılması məsələləri müzakirə olundu. Prezident İlham Əliyev iki dövlət arasındakı əlaqələrin digər qonşular üçün də nümunə olduğunu vurğuladı.

Azərbaycan və Gürcüstan arasındakı münasibətlər təkcə iki ölkə üçün deyil, bütövlükdə region üçün strateji əhəmiyyət daşıyır. Enerji, nəqliyyat və siyasi sahələrdə sıx əməkdaşlıq bu əlaqələrin davamlı inkişafını təmin edir. Gürcüstan Baş nazirinin Azərbaycana səfəri, dostluq münasibətlərinin gələcəkdə daha da möhkəmləndiriləcəyinə işarədir. Bu əlaqələr Avropa ilə Asiya arasında strateji körpü rolunu oynayan iki ölkənin regional və qlobal əhəmiyyətini daha da artıracaq.

Paylaş:

Baxılıb: 514 dəfə