Azərbaycan-Rusiya münasibətləri müttəfiqlik xarakteri daşıyır

Bakı:

24 °C

57 %

2 m/s

Əlaqə

AZ RU EN

Ana səhifə / YAP xəbərləri / Azərbaycan-Rusiya münasibətləri müttəfiqlik xarakteri daşıyır

Azərbaycan-Rusiya münasibətləri müttəfiqlik xarakteri daşıyır

21.08.2024 [10:34]

Rusiya Federasiyasının Prezidenti Vladimir Putinin avqustun 18-19-da Azərbaycana etdiyi rəsmi dövlət səfəri ölkələrimiz arasında münasibətlərin inkişafına böyük töhfə olacaq. Avqustun 19-da iki ölkənin dövlət başçıları arasında keçirilən görüşlərdən və sənədlərin imzalanmasından sonra mətbuata bəyanatla çıxış edən Azərbaycan və Rusiya prezidentləri yekdil rəy ifadə edərək bildirdilər ki, bu səfər xüsusi xarakter daşıyır və dövlətlərarası münasibətlərin yüksək səviyyəsindən xəbər verir.

Cənab Prezident İlham Əliyev öz çıxışında xüsusi olaraq vurğuladı ki, qəbul edilən sənədlər, prezidentlərin Birgə Bəyanatı Azərbaycan ilə Rusiya arasında münasibətlərin dostluq və müttəfiqlik xarakterini bir daha təsdiqləyir. Qeyd olundu ki, 2022-ci ilin fevralında imzalanmış qarşılıqlı müttəfiqlik fəaliyyəti haqqında Bəyannamənin müddəaları uğurla həyata keçirilir. Ölkələrimiz müttəfiqlər, dostlar, yaxın tərəfdaşlar və qonşular kimi fəaliyyət göstərir.

Rusiya Prezidenti öz növbəsində qeyd etdi ki, Rusiya Azərbaycanla çoxplanlı dostluq münasibətlərinin inkişafına böyük əhəmiyyət verir. Bu münasibətlərin əsasını bərabərlik, bir-birinin maraqlarını nəzərə almaq və əlbəttə, əsrlər boyu xalqlarımızı birləşdirən sıx insani və mədəni bağlar təşkil edir.

Qəbul edilən Birgə Bəyanatda ikitərəfli əlaqələrin bütün kompleksi üzrə gələcək dinamik inkişafın yeni genişmiqyaslı vəzifələri qarşıya qoyuldu. İmzalanan sənədlər də onların həllinə kömək edəcək. Azərbaycan və Rusiya prezidentləri arasında aparılan danışıqlarda qarşılıqlı faydalı iqtisadi-ticari əməkdaşlığın inkişafına diqqət yetirildi. Bu, qanunauyğundur, çünki Rusiya və Azərbaycan bir-biri üçün mühüm iqtisadi tərəfdaşlardır. Dövlət başçımızın dediyi kimi, dövlətlərarası münasibətlər üçün də müstəsna əhəmiyyətə malik olan, həmçinin regional nəqliyyat dəhlizləri, nəqliyyat yolları, “Şimal-Cənub” layihəsinin həyata keçirilməsi ilə bağlı məsələlər ətraflı müzakirə olunub. Diqqətə çatdırılıb ki, Azərbaycanın ərazisində “Şimal-Cənub” dəhlizinin həm dəmir yolu, həm də avtomobil yolu seqmentləri tam şəkildə reallaşdırılıb və uğurla fəaliyyət göstərir.

Cənab Prezident İlham Əliyevin çıxışında yer alan ən vacib məqamlardan biri də əlbəttə ki, regional təhlükəsizlik məsələləri ilə bağlı aparılmış fikir mübadiləsinə aid idi. Dövlətimizin başçısı bildirdi ki, ötən ilin sentyabrından sonra regionda tamamilə yeni şərait yaranıb. Azərbaycan öz suverenliyini və ərazi bütövlüyünü tam şəkildə bərpa edib və bu yeni şərait Cənubi Qafqazda möhkəm və uzunmüddətli sülhün bərqərar olması üçün yeni imkanlar açır. Bütün Cənubi Qafqaz regionunda sabitlik və təhlükəsizlik isə bir çox hallarda Rusiya ilə Azərbaycan arasında sıx qarşılıqlı fəaliyyətdən asılıdır. Cənubi Qafqazda sülh və sabitlik bu regionun bütün dövlətlərinin və xalqlarının köklü maraqlarına tam şəkildə cavab verməlidir.

Natiq Quluzadə

YAP Zəngilan rayon təşkilatının sədri

Paylaş:

Baxılıb: 540 dəfə