Paşinyan nazirini niyə cəzalandırdı?

Bakı:

26 °C

60 %

6 m/s

Əlaqə

AZ RU EN

Ana səhifə / Xarici siyasət / Paşinyan nazirini niyə cəzalandırdı?

Paşinyan nazirini niyə cəzalandırdı?

16.11.2021 [10:20]

Ermənistanın Baş naziri Nikol Paşinyan avqust ayından ölkənin müdafiə naziri postunu tutan Arşak Karapetyanın müdafiə naziri vəzifəsindən azad edilməsi və onun əvəzinə Baş nazirin müavini Suren Papikyanın təyin edilməsi haqqında qərar qəbul edib. Bu barədə Ermənistanın Nazirlər Kabinetinin mətbuat xidməti məlumat yayıb.

Paşinyan Karapetyanın vəzifəsindən azad edilməsinin səbəblərini açıqlayıb. Təhlükəsizlik Şurasının iclasında məsələ ilə bağlı çıxış edən hökumət başçısı bildirib ki, A.Karapetyanın fəaliyyəti ilə bağlı təhlil aparıb.

Baş nazir qeyd edib ki, müdafiə nazirinin işdən çıxarılması Azərbaycanla sərhəddə baş verən hadisələrlə bağlıdır: “Qeyd etmək istəyirəm ki, Arşak Karapetyanın müdafiə naziri vəzifəsindən azad edilməsi və onun əvəzinə Baş nazirin müavini Suren Papikyanın təyin edilməsi haqqında qərar qəbul etmişəm. Bu qərar dünəndən etibarən baş verən hadisələrin təhlili nəticəsində qəbul edilib. Hazırkı vəziyyət məni nazirin dəyişdirilməsi qərarına gətirib çıxardı”.

Baş verənlər Ermənistanın siyasi və hərbi rəhbərliyi arasında qarşıdurmanın olduğuna dair fikirlər yaradır. Karapetyanın Xankəndiyə qanunsuz səfəri də onun nazir postundan uzaqlaşdırılmasına səbəb ola bilər. Belə olan halda, Paşinyan nazirini cəzalandıraraq, Azərbaycanın diktə etdiyi qayda-qanunla hesablaşdığını bildirir. Maraqlıdır, Ermənistan hakimiyyəti keçmiş müdafiə nazirini cəzalandırıb, yoxsa əksinə, yeni siyasi fiqurla müharibəyə start verməyə hazırlaşır?

A.Karapetyanın vəzifəsindən azad edilməsi və onun yerinə S.Papikyanın təyin olunmasını şərtləndirən səbəbləri “Yeni Azərbaycan”a dəyərləndirən “Atlas” Araşdırmalar Mərkəzinin rəhbəri, politoloq Elxan Şahinoğlu bildirib ki, Ermənistan Müdafiə Nazirliyindəki kadr dəyişikliyi Azərbaycan hərbçilərinin Ermənistanla sərhəddə qazandığı üstünlüklə bağlıdır.

Azərbaycan sərhədçilərinin qışa qədər strateji mövqelərdə möhkəmlənməyə davam etdiklərini vurğulayan politoloq qeyd edib ki, Ermənistan Müdafiə Nazirliyi əvvəlcə bu növ xəbərləri təkzib etməyə çalışırdı, ancaq internetdə yayımlanan görüntülər real durumu əks etdirdiyinə görə bundan sonra nazirlikdən etiraf dolu açıqlmalar gəldi:

“Arşak Karapetyan nə sərhədi qoruya bildi, nə də reallığı əks etdirən açıqlamalar verdi. Nikol Paşinyan də elə buna görə onu istefaya göndərdi. Paşinyan anlayır ki, erməni ictimaiyyətini aldatmaqla problem həll olunmayacaq. Ancaq onun Arşak Karapetyanın yerinə müdafiə naziri postuna Suren Papikyanı təyin etməsi Ermənistan üçün problemin həllini yaxınlaşdırmayacaq. Suren Papikyan Paşinyanın inandığı bürokrat olsa da, Müdafiə Nazirliyi sistemində yaddır. Görünür, Paşinyana müdafiə sistemində artıq generallar yox, gənc menecerlər lazımdır. Bu, Paşinyanın Ermənistan ordusunda yeni eksperimentidir və şübhəsiz Qarabağ klanının simasında radikal müxalifətin növbəti mitinqi üçün əsas yaradacaq. Biz öz işimizi davam etdirməliyik. Sərhədin strateji yüksəkliklərində nəzarətimizi gücləndirməli, o cümlədən sərhədin tərkib hissəsi olan Laçın dəhlizinin nəzarətə götürülməsinə addım-addım yaxınlaşmalıyıq. Ermənistan Zəngəzur dəhlizinin açılmasının yubadılmasının hesabını bu şəkildə ödəməlidir. Ancaq evin içində də tədbirlərimizi gücləndirməli, Qarabağ separatçıları ətrafında çəmbəri daraltmalıyıq. Azərbaycan hərbçilərinə qumbara atanlar və onları himayə edənlərin ödəyəcəyi hesab barədə də düşünməliyik”.

Yeganə Bayramova

Paylaş:

Baxılıb: 1368 dəfə