Saf və təmiz fidanlar...

Bakı:

24 °C

54 %

1 m/s

Əlaqə

AZ RU EN

Ana səhifə / Sosial / Saf və təmiz fidanlar...

Saf və təmiz fidanlar...

18.11.2023 [12:05]

Ümumdünya Uşaq Günüdür

Yeganə BAYRAMOVA

Onlar gülüşü ilə güldürən, göz yaşı ilə ürəkləri sızladan, saf baxışları ilə düşündürən, qucaqları isidən, sevildikcə sevilən fidanlardır. Nəfəslərində bir həyat, bir dünya, bir aləm yaşayır. Ailənin könül meyvəsi, ruh qaynağı sayılan uşaqlar dünyaya gəlişi ilə qəlbləri həyəcanlandırır, evlərə sevinc bəxş edir. Ən saf, ən dəyərli, ən gözəl varlıqlar olan uşaqlar bu günümüz, gələcəyimiz və həyatımıza anlam verən varlıqlardır.

Uşaqlara qayğı, onların sağlam böyüməsi, yüksək təhsil, təlim-tərbiyə alaraq layiqli vətəndaş kimi yetişdirilməsi hər bir cəmiyyətin başlıca vəzifələrindən biridir. Uşaqlar ailədən başqa hər bir dövlətin və xalqın da qiymətli sərvətidir. Bu qiymətli sərvəti fiziki və mənəvi cəhətdən sağlam, cəmiyyətə faydalı vətəndaş kimi böyütmək çətin və məsuliyyətli olduğu qədər də şərəflidir. Gələcəyimizi bu günün uşaqlarına əmanət ediriksə, onların düzgün tərbiyə olunması, hansı ideyalara qulluq etməsi hər birimizi ciddi düşündürməlidir.

34 il öncə...

Noyabrın 20-si Ümumdünya Uşaq Günüdür. Birləşmiş Millətlər Təşkilatının (BMT) Uşaq Hüquqları Konvensiyasını qəbul etməsindən 34 il keçir. Belə ki, 1954-cü ildə BMT Baş Məclisi bütün dünyada uşaqların rifahının yaxşılaşdırılması məqsədilə bu günü bütün dünya ölkələrinə qeyd etməyi məsləhət görüb. 1959-cu il noyabrın 20-də Baş Məclis Uşaq hüquqları Bəyannaməsini qəbul edib.

Lakin bu bəyannamənin hüquqi qüvvəsi və nəzarət mexanizmi yox idi. Bu sənəd dövlətlərin üzərinə məsuliyyət və öhdəlik qoymurdu. Uşaqların hüquqlarını qorumağa dair ən mükəmməl beynəlxalq sənəd 1989-cu il noyabrın 20-də qəbul edilmiş Uşaq Hüquqları Konvensiyası oldu.

11 milyon uşaq 5 yaşına çatmadan...

Beynəlxalq statistikaya əsasən, 11 milyon uşaq beş yaşına çatmadan ölür. Normal böyümək, yaşamaq və inkişaf etmək imkanı olmayan on milyonlarla uşaq isə fiziki və əqli xəstə olur. Uşaqlar arasında ölüm hallarının çoxuna qarşısı alınan və ya asanlıqla müalicə olunan xəstəliklər, digərlərinə yoxsulluq, cahillik, ayrı-seçkilik və zorakılıq hallarının ağır nəticələri səbəb olur. Bu səbəblərin hamısı birlikdə ailə, icma və dövlətlərə və bütün dünyaya ağır itkilər gətirir.

Milli strategiyalarımızdan biri

Ümumdünya Uşaq Günü ölkəmizdə də qeyd olunur. Azərbaycan Uşaq Hüquqları Konvensiyasını 1992-ci ildə ratifikasiya edib. Gələcəyimiz olan uşaqların hüquqlarının təmin edilməsi, uşaq problemlərinin ardıcıl həlli ölkəmizdə bu sahədə həyata keçirilən dövlət siyasətinin prioritet istiqamətlərindən birini təşkil edir. Azərbaycanın sürətli iqtisadi inkişafı sosial problemlərin həlli üçün etibarlı zəmin yaradır. Ölkə başçısının uşaq siyasəti artıq milli strategiya kimi formalaşıb. Son illər uşaqların sağlamlıqlarının möhkəmləndirilməsi, onların müasir tələblər səviyyəsində təlim-tərbiyəsinin daha da yüksəldilməsi üçün lazımi şərait yaradılır, bu istiqamətdə mühüm tədbirlər reallaşdırılır. Elə bu baxımdan, son illərdə uşaqların sağlamlığının möhkəmləndirilməsi, onların müasir tələblər səviyyəsində təhsil alması üçün lazımi şəraitin təmin edilməsinə yönəlmiş mühüm addımlar atılmaqdadır.

Paylaş:

Baxılıb: 829 dəfə