Pandemiyadan sonra ilk Həcc ziyarəti...

Bakı:

19 °C

88 %

2 m/s

Əlaqə

AZ RU EN

Ana səhifə / Sosial / Pandemiyadan sonra ilk Həcc ziyarəti...

Pandemiyadan sonra ilk Həcc ziyarəti...

07.07.2022 [10:57]

MÜŞFİQƏ

İki illik fasilədən sonra, iyulun 6-da koronavirus pandemiyasından sonra ilk böyük Həcc ziyarəti başlayıb. Sonuncu Həcc ziyarəti 2019-cu ilə təsadüf edir. O vaxt Azərbaycandan 1400 zəvvar müqəddəs şəhərlərə getmək şansı qazanmışdı. Azərbaycandan Həcc ziyarətinə gedənlər 4285 dollar ödəniş etmişdilər. Bu qiymətə təyyarə biletləri, otel xərcləri, gündəlik yemək, nəqliyyat, Ərəfat və Minada qurulan çadırların pulları daxil idi. 2020 və 2021-ci illərdə məlum koronavirus pandemiyası səbəbindən Səudiyyə hökuməti Həcc, eləcə də Ümrə ziyarətini dayandırmışdı.

Pandemiya dövründə Həcc ziyarətinə ciddi məhdudiyyət tətbiq edildi. 2020-ci ildə pandemiyanın ən şiddətli dövründə Həcc ziyarətinə təxminən 10 min nəfər gedə bildi. 2021-ci ildə isə Səudiyyə Ərəbistanı vətəndaşları və bu ölkədə daimi yaşayan əcnəbilər arasında 60 000 nəfərə ziyarət nəsib oldu.

Statistika göstərir ki, cari ildə şərtlər yumşaldılsa da, zəvvar sayı pandemiyadan əvvəlki həddə çatmayıb. 2019-cu ildə Məkkəni ziyarət etməyə 2,5 milyon nəfər gəlmişdi.

680 zəvvar Həccə yollanıb

Bu il isə Səudiyyə Ərəbistanı peyvənd olunmuş 1 milyon zəvvarın Məkkəyə gəlməsinə icazə verib. Əlbəttə, bunun üçün həm Səudiyyə Ərəbistanının özünə, həm də ayrı-ayrı xarici ölkələrə müəyyən kvota təyin edilir. Hər bir ölkəyə müsəlman əhalisinin sayına uyğun təyin olunan kvota, görəsən, ikiillik pandemiyadan sonra - bu il necə müəyyənləşib? Konkret olaraq, Azərbaycandan bu il neçə zəvvar Həccə gedib, tələb olunan vəsait nə qədərdir?

Builki Həcc ziyarətinə Azərbaycan zəvvarları üçün 680 nəfərlik kvota ayrılıb. Ziyarətin qiyməti 9 106 manat müəyyən olunub. Həcc ziyarətinə gedənlər Səudiyyə Ərəbistanı Krallığına daxil olmazdan 72 saat əvvəl PCR test veriblər.

Zəvvarların ziyarət proqramı

Həcc ziyarətini Azərbaycanda Qafqaz Müsəlmanları İdarəsi (QMİ) təşkil edir. QMİ Xarici əlaqələr şöbəsinin müdiri Vüsal Cahangirli bildirib ki, ümumən Azərbaycandan gedən zəvvarlar üçün Həcc ziyarəti 20 iyul tarixinə kimi təyin edilib. Sonuncu təyyarə Mədinə şəhərindən Bakıya 20 iyul tarixində uçacaq: “Həcc ziyarətinin proqramına gəlincə, zəvvarlar Ciddəyə endikdən sonra ehram bağlanılan yerə, oradan Məkkəyə gedirlər. Onların ilk əməlləri Ümreyi-təməttödür, Kəbə evi ətrafında təvaf etmək, İbrahim məqamı arxasında 2 rükət təvaf namazı qılmaq, Səfa və Mərvə dağları arasında səy etmək, sonda təqsir etmək, yəni saçdan və dırnaqdan bir qədər kəsməkdir. Daha sonra Zülhiccə ayının 9-?a kimi (8 iyul) vacibi ayin yoxdur. Zəvvarlar sərbəst şəkildə Kəbəyə gedib, namaz qılıb dua edirlər. Zülhiccə ayının 9-da Ərəfata çıxacaq, Zülhiccənin 9-dan 10-a keçən gecə Müzdəlifəyə gedib orada vüquf edirlər. Zülhiccənin 10-u, Qurban bayramı günü Müzdəlifədən Minay gedirlər, əşyalarını çadırlarda qoyub Böyük Şeytana daş atmağa gedirlər. Şeytanı daşladıqdan sonra qurban kəsirlər. Qurbandan sonra saçlarını kəsdirib Hacı olurlar”.

Qeyd olunub ki, Zülhiccənin 10-u, 11-i də Şeytangaha gedib 3 Şeytanı, kiçik, orta və böyük şeytanı daşlayacaqlar. Zülhiccənin 11-dən sonra Kəbəyə gedib qalan vacibi ayinləri tamamlayacaqlar. Məkkədə ayinləri bitirdikdən sonra Mədinə şəhərinə, Peyğəmbər rövsəninin ziyarətinə gedəcəklər. Mədinədə 3 gün qaldıqdan sonra zəvvarlar Vətənə geri dönəcəklər. Azərbaycanda iyulun 9-10-u Qurban bayramı qeyd olunacaq. Qurban kəsmək əsasən Məkkədə Həcc ziyarətində olan zəvvarlara vacibdir.

Qeyd edək ki, Azərbaycana geri dönüş 19-20 iyulda planlaşdırılıb.

Paylaş:

Baxılıb: 717 dəfə