Narkotik asılılığı problemi: nəyi bilməli, necə davranmalı?

Bakı:

23 °C

73 %

12 m/s

Əlaqə

AZ RU EN

Ana səhifə / Sosial / Narkotik asılılığı problemi: nəyi bilməli, necə davranmalı?

Narkotik asılılığı problemi: nəyi bilməli, necə davranmalı?

22.04.2021 [08:23]

Psixoloq Zərinə Əliyeva: Unutmamalıyıq ki, güclü iradəyə malik olan və yetərli dəstək alan insanlar bu bəlanın pəncəsindən gec də olsa, yaxa qurtara bilirlər
Narkomaniya “cəmiyyətin bəlası” adlandırılan ciddi sosial problemdir. Təəssüf ki, bu bəlanın qurbanları bütün dünyada hər keçən gün artır. Mütəxəssislərin vurğuladıqları kimi, narkomaniya birbaşa intihar halı olmasa da, onun insanları tədricən məhv etdiyi, ölümə sürüklədiyi danılmazdır.
Psixoloq Zərinə Əliyeva qəzetimizə açıqlamasında bildirib ki, ümumiyyətlə, gənclər və uşaqlar arasında asılılıqlara meyillilik çoxdur: “Asılılıq deyəndə internet, narkotik, yaxud alkoqol içki asılılıqlarını və digərlərini nəzərdə tuturam. Ümumiyyətlə, deyə bilərəm ki, ailədaxili sevgi, valideyn-övlad münasibətləri güclü olan ailələrdə böyüyən uşaqlar adətən belə asılılıqlara meyil etmirlər. Asılılıqların yaranması bir çox hallarda ailədaxili bağlarda olan boşluqlardan irəli gəlir”.
Zərinə Əliyeva onu da bildirib ki, narkotikin aludəçisi olanlarla aparılan sorğular göstərir ki, ailədə və işdə yaranan problemlər, psixoloji zəiflik, düzgün seçilməyən mühit və digər müxtəlif səbəblər onları narkotikdən istifadəyə istiqamətləndirib.
“Son dövrlər narkomaniyadan istifadənin yaş həddi olduqca aşağı düşüb. Buna görə də məktəblərdə psixoloqlar, eyni zamanda, sosioloqlar bu barədə daim maarifləndirmə işləri aparmalıdırlar. Narkotik maddələrin insanların sağlamlığına uzun və qısa müddətdə gətirəcəyi fəsadlar mütləq maarifləndirmə yolu ilə şagirdlərə çatdırılmalıdır. Bu işdə valideynlərin üzərinə də böyük məsuliyyət düşür. Dediyim kimi, övladlarımızın zərərli vərdişlərdən uzaq olmasını istəyiriksə, ilk öncə onlarda möhkəm, sağlam, güvənli sevgi dolu bağlar yaratmalıyıq və onlarla bacardığımız qədər maraqlanmalı, eyni zamanda, müəyyən azadlıq verməliyik ki, şəxsiyyət kimi formalaşsınlar. Şəxsiyyət kimi formalaşmayan bir gənc müəyyən yaşdan sonra çox asanlıqla təsir altına düşüb yanlış formalaşa bilər”, - deyə Z.Əliyeva əlavə edib.
Mütəxəssis deyir ki, bu bəladan əziyyət çəkənləri yenidən cəmiyyətə qazandırmaq üçün onların reabilitasiyasına çalışmaq və narkotik asılılığını bir xəstəlik kimi qəbul etmək lazımdır: “Unutmamalıyıq ki, güclü iradəyə malik olan və yetərli dəstək alan insanlar bu bəlanın pəncəsindən gec də olsa, yaxa qurtara bilirlər”.
Aynur PƏNAHQIZI

Paylaş:

Baxılıb: 673 dəfə