Yeni tədris ilində hansı yeniliklər gözlənilir?

Bakı:

22 °C

53 %

3 m/s

Əlaqə

AZ RU EN

Ana səhifə / Sosial / Yeni tədris ilində hansı yeniliklər gözlənilir?

Yeni tədris ilində hansı yeniliklər gözlənilir?

11.09.2020 [23:32]

Respublikamızın ümumi təhsil məktəblərində yeni dərs ilinə hazırlıq işləri yekunlaşmaq üzrədir. Belə ki, təhsil müəssisələrində dərslər təhsilalanların sayından asılı olaraq təsdiq edilən qrafikə uyğun şəkildə səhər saat 8-dən başlayaraq növbəli qaydada həyata keçiriləcək. Bu, Nazirlər Kabinetinin “Xüsusi karantin rejimi dövründə Azərbaycan Respublikasında fəaliyyət göstərən təhsil müəssisələrində tədris və təlim-tərbiyə prosesinin təşkilinin müvəqqəti Qaydaları”nın təsdiq edilməsi barədə Qərarında öz əksini tapıb.

Dərslər 45 dəqiqə olacaq

Qərara əsasən, ümumi təhsil müəssisələrində dərs (təlim) və dərsdənkənar (praktiki) məşğələ saatları məktəbəhazırlıq mərhələsində 30 dəqiqə, ibtidai və ümumi təhsil səviyyələrində 45 dəqiqə olmaqla müəyyən edilir. Peşə təhsili müəssisələrində dərslərin davametmə müddəti 30 dəqiqədir. Uşaq musiqi, incəsənət, rəssamlıq məktəb və mərkəzlərində dərslər 45 dəqiqəlik olacaq. Orta ixtisas və ali təhsil müəssisələrində bir akademik saatın davametmə müddəti 45 dəqiqədir. Akademik saatlararası fasilə olmadıqda dərsin müddəti 80 dəqiqə müəyyən edilir.

1 milyon 574 mindən çox şagird təhsil alacaq

2020-2021-ci tədris ilinin əvvəlinə olan proqnoz göstəricilərinə əsasən, respublikanın ümumi təhsil müəssisələrində ümumilikdə 1 milyon 574 min 206 şagirdin təhsil alacağı gözlənilir. Təhsil Nazirliyindən qəzetimizə verilən məlumata görə, şagirdlərin ümumi sayından 733 min 279 nəfəri qız, 840 min 927 nəfəri isə oğlandır. Ümumtəhsil məktəblərinin I sinfində 165 min 511, IX sinfində 132 min 734, XI-XII siniflərində isə 85 min 44 şagirdin təhsil alacağı proqnozlaşdırılır.

Proqnoz üzrə 2020-2021-ci tədris ilinin əvvəlinə respublikada 317 ibtidai məktəb, 783 ümumi orta məktəb, 3319 tam orta məktəb, 16 xüsusi tipli məktəb və 5 əyani-qiyabi (axşam) tam orta məktəb, o cümlədən 60 məktəb-lisey, 50 lisey, 15 gimnaziya və 14 inteqrasiya təlimli internat tipli gimnaziya olmaqla, ümumilikdə 4 min 440 məktəbin fəaliyyət göstərəcəyi gözlənilir.

Yeni tədris ilində 121 min 696 uşağın ümumi təhsil müəssisələrinin məktəbəhazırlıq qruplarında təhsil alacağı proqnozlaşdırılır.

Eləcə də Bakı Şəhəri üzrə Təhsil İdarəsinin (BŞTİ) tabeliyində fəaliyyət göstərən ümumi təhsil müəssisələri üzrə ümumilikdə 434 971 şagirdin təhsil alacağı gözlənilir. Bu barədə BŞTİ-dən məlumat verilib. Bildirilib ki, BŞTİ-nin tabeliyindəki ümumi təhsil məktəblərinin IX sinfində 35 min 794, X sinfində 25 min 611, XI sinfində 19 min 794, XII sinfində 170 şagirdin təhsil alacağı proqnozlaşdırılır. Təhsil İdarəsinin tabeliyindəki ümumi təhsil müəssisələrində 27 min 132 müəllim çalışır.

Qeyd edək ki, BŞTİ-nin tabeliyində 308 ümumi təhsil, 3 xüsusi ümumi orta və 5 əyani-qiyabi axşam məktəbləri olmaqla, cəmi 316 məktəb və 5 Uşaq-Gənclər İnkişaf Mərkəzi fəaliyyət göstərir.

47 yeni məktəb binası şagirdlərin istifadəsinə veriləcək

Hazırda təmir-tikinti prosesi yekunlaşmış məktəblərdə son tamamlama işləri görülür, avadanlıqların quraşdırılması həyata keçirilir. Təhsil Nazirliyindən bildirilib ki, yeni tədris ilinin əvvəlində Təhsil Nazirliyi tərəfindən təmir-tikinti işləri yekunlaşdırılmış 47 məktəb binası şagirdlərin istifadəsinə veriləcək. Onlardan 8-i yeni tikilən, 5-i əsaslı təmir olunan, 34-ü isə modul tipli məktəbdir.

Bununla yanaşı, 2020-ci ilin sonuna kimi Təhsil Nazirliyi tərəfindən təmir-tikinti işləri yekunlaşdırılmış 100-ə yaxın məktəb binası şagirdlərin istifadəsinə veriləcək, onlardan 60-ı modul tipli məktəbdir.

MÜŞFİQƏ

Paylaş:

Baxılıb: 531 dəfə