Birinci respublika virtual debat çempionatının açılışı olub

Bakı:

29 °C

45 %

3 m/s

Əlaqə

AZ RU EN

Ana səhifə / Sosial / Birinci respublika virtual debat çempionatının açılışı olub

Birinci respublika virtual debat çempionatının açılışı olub

15.08.2020 [00:54]

Azərbaycan Respublikası Gənclər Fondunun maliyyə dəstəyi və “Vətəndaş Cəmiyyətində Debat” İctimai Birliyinin təşkilatçılığı ilə I respublika virtual debat çempionatının açılış mərasimi keçirilib.

İctimai Birlikdən AZƏRTAC-a bildiriblər ki, açılış mərasimində Gənclər və İdman nazirinin müavini İntiqam Babayev, Gənclər Fondunun icraçı direktoru Fərid Cəfərov, Milli Məclisin deputatları Ramin Məmmədov, Vüqar İsgəndərov, Müşfiq Cəfərov və Şahin Seyidzadə, “Vətəndaş Cəmiyyətində Debat” İctimai Birliyinin sədri Ülviyyə Axundova, gənclər təşkilatlarının nümayəndələri və 200-dən çox gənc iştirak edib.

Onlayn tədbirdə çıxış edən “Vətəndaş Cəmiyyətində Debat” İctimai Birliyinin sədri Ülviyyə Axundova təşkilatın fəaliyyəti, proqramları, eləcə də bu layihənin məqsədi və istiqamətləri barədə məlumat verib. O, 11 şəhər və 42 rayonu təmsil edən 450 gəncin bu layihədə iştirak üçün seçildiyini qeyd edib, yüksək fəallığa görə onlara təşəkkürünü bildirib.

Gənclər və İdman nazirinin müavini İntiqam Babayev debatın gənclərin inkişafındakı rolundan, “Vətəndaş Cəmiyyətində Debat” İctimai Birliyi ilə birgə həyata keçirilən proqram və layihələrdən danışıb və əməkdaşlığın uğurlu olduğunu vurğulayıb.

Gənclər Fondunun icraçı direktoru Fərid Cəfərov debat, natiqlik istiqamətində keçirilən tədbirlərə verilən dəstək, fond tərəfindən gənclərin inkişafı üçün həyata keçirilən layihələr barədə məlumat verib və layihə iştirakçılarına uğurlar arzulayıb.

Milli Məclisin deputatları pandemiya dövrünün çağırışlarına uyğun olaraq gənclərin iştirakı ilə keçirilən tədbirlərin önəmi, onların inkişafının təmin olunmasının vacibliyi və təşkilatın fəaliyyətinin gənclərin həyatında əhəmiyyətindən bəhs ediblər.

Layihənin məqsədi pandemiya şəraitində debat vasitəsilə gənclərin biliklərinin artırılmasına, araşdırma qabiliyyətlərini, natiqlik bacarıqlarını inkişaf etdirmək, onlarda komanda ruhu formalaşdırmaqdan ibarətdir.

Onlayn çempionatda peşəkar təlimçilərin iştirakı ilə debat və natiqlik təlimləri, ekspertlər ilə müzakirələri baş tutacaq. Yekunda isə respublikanın müxtəlif şəhər və rayonlarından olan gənclərdən ibarət komandaların iştirakı ilə debat turniri keçiriləcək.

Layihənin tərəfdaşları Milli Debat Proqramı və gənclər üçün müxtəlif faydalı imkanlar, xidmətlər, tədbir və layihələr barədə məlumatları özündə birləşdirən “GencApp” mobil tətbiqidir.

Paylaş:

Baxılıb: 549 dəfə