Azərbaycan dövləti daim öz vətəndaşlarının qayğısına qalır, onların sağlamlığının qorunmasını diqqət mərkəzində saxlayır

Bakı:

32 °C

39 %

4 m/s

AZ RU EN

Ana səhifə / Sosial / Azərbaycan dövləti daim öz vətəndaşlarının qayğısına qalır, onların sağlamlığının qorunmasını diqqət mərkəzində saxlayır

Azərbaycan dövləti daim öz vətəndaşlarının qayğısına qalır, onların sağlamlığının qorunmasını diqqət mərkəzində saxlayır

19.03.2020 [09:17]

İtaliyada təhsil alan azərbaycanlı tələbələrin Vətənə təxliyə edilmələri bunun daha bir bariz nümunəsidir
Hazırda 160-dan çox ölkədə yayılmış yeni növ koronavirus - COVİD-19 infeksiyası ilə mübarizə məsələsi aktual müzakirə predmetinə çevrilib. Ümumdünya Səhiyyə Təşkilatının (ÜST) tövsiyələrində həm ümumi, həm də ölkələrin yerli spesifikasına uyğun müəyyən olunmuş qaydalara riayət edilməsi ilə yanaşı, məhdudlaşdırıcı tədbirlərin zəruriliyi diqqətə çatdırılır. Xüsusilə də bildirilir ki, şəxsi sanitar-gigiyenik normalara əməl edilməsindən əlavə, insanlar mümkün qədər evdən çıxmamalı, kütləvi tədbirlərə, gəzintilərə getməməli, ictimai nəqliyyatdan istifadə, alış-veriş edərkən daha etibarlı qorunmalıdırlar. Reallıq budur ki, müxtəlif ölkələrin nümunəsində bütövlükdə dünya miqyasında xüsusi məhdudiyyətlər və qadağalar tətbiq olunur, sosial izolyasiya tədbirləri gücləndirilir. Avropa ölkələrinin timsalında da hava uçuşlarının dayandırılması, sərhədlərin bağlanması hallarının artması müşahidə olunur.
Azərbaycanda da koronavirus infeksiyası ilə bağlı vəziyyət ciddi nəzarət altındadır. Virusun ölkəmizdə geniş yayılmasının qarşısının alınması istiqamətində qabaqlayıcı və mübarizə xarakterli tədbirlər ardıcıl olaraq davam etdirilir. Eyni zamanda, müvafiq dövlət qurumları tərəfindən bütün lazımi işlər görülür, əhali arasında geniş maarifləndirmə işi aparılır. O da qeyd edilməlidir ki, ÜST-nin tövsiyələrini və beynəlxalq təcrübəni nəzərə alan, əhalinin sağlamlığının etibarlı qorunmasını daim diqqətdə saxlayan Azərbaycan hökuməti sözügedən təhdidlə mübarizə çərçivəsində reallaşdırılan tədbirlərin əhatə dairəsini daha da genişləndirib. Ölkəmizdə bir ay müddətində kütləvi tədbirlərin təxirə salınması, dövlət və özəl sektora aid qurumlar, vətəndaşlar üçün xüsusi qaydaların elan olunması və onlara ciddi riayət edilməsi üçün nəzarət mexanizminin formalaşdırılması və tətbiqinin qərara alınması bu baxımdan mühüm əhəmiyyət kəsb edir. Yeri gəlmişkən, ÜST koronavirusla bağlı göstərdiyi ciddi səylərə görə Azərbaycan hökumətinə minnətdarlıq edir.
Heç şübhəsiz, koronavirusun yayılmasına qarşı mübarizə milli təhlükəsizlik məsələsidir, hər bir fərdin və bütövlükdə cəmiyyətin sağlamlığının qorunmasına xidmət edir. Ona görə də vətəndaşlarımızın iştirakı və dəstəyi olmadan bu tədbirlərin effektivliyi lazımi nəticə verə bilməz. Bu səbəbdən həm Azərbaycanda, həm xaricdə olan vətəndaşlarımız bu çətin vaxtda fərdi məsuliyyət nümayiş etdirərək olduqları ölkədə tətbiq olunan karantin qaydalarına ciddi riayət etməlidirlər.
Əlbəttə, Azərbaycan hökuməti daim öz vətəndaşlarının qayğısına qalır, onların sağlamlığının qorunmasını diqqət mərkəzində saxlayır. Yeri gəlmişkən, İtaliyada təhsil alan azərbaycanlı tələbələrin Vətənə təxliyə edilmələri bunun bariz nümunəsidir. Onlar çarter reyslərlə təxliyə olunmalarının təşkil edilməsinə görə Azərbaycan Prezidentinə təşəkkür ediblər. Qeyd edək ki, İtaliyanın müxtəlif şəhərlərində təhsil alan tələbələrimizin hava limanlarına gətirilməsi də Azərbaycan hökuməti tərəfindən təşkil olunub.
NURLAN

Paylaş:

Baxılıb: 465 dəfə