Azərbaycan hökuməti koronavirus xəstəliyinin qarşısının alınması üçün müvafiq addımlar atır

Bakı:

27 °C

49 %

3 m/s

Əlaqə

AZ RU EN

Ana səhifə / Sosial / Azərbaycan hökuməti koronavirus xəstəliyinin qarşısının alınması üçün müvafiq addımlar atır

Azərbaycan hökuməti koronavirus xəstəliyinin qarşısının alınması üçün müvafiq addımlar atır

12.03.2020 [09:21]

Müayinə və laborator analizlər vasitəsilə infeksiyaya yoluxma faktı təsdiq edilməmiş və səhhəti şübhə doğurmayan 312 nəfər karantin müddətini başa vuraraq sərbəst buraxılıb
Ümumdünya Səhiyyə Təşkilatı (ÜST) yeni növ koronavirusla bağlı (COVID-19) son vəziyyəti açıqlayıb. Belə ki, 2019-cu ilin dekabrında Çində baş qaldırmış yeni koronavirus artıq 119 ölkəyə yayılıb. Dünya üzrə koronavirusa 119220 nəfər yoluxub (297 yeni yoluxma), 4299 nəfər ölüb (25 yeni ölüm), 66564 nəfər isə sağalıb (1400 yeni sağalan). Bununla yanaşı, Türkiyə, Boliviya, Konqo və Yamaykada da koronavirusa ilk yoluxma halları müəyyən edilib.
Vurğulandığı kimi, dünyada bu virusun yayılmasına qarşı mühüm tədbirlər həyata keçirilməkdədir. Azərbaycanın aidiyyəti orqanları da koronavirusla bağlı şəffaf, açıq və effektiv fəaliyyət göstərirlər. Belə ki, Azərbaycan hökuməti ölkədə koronavirusa ilk yoluxma halı müəyyənləşən kimi Ümumdünya Səhiyyə Təşkilatına müvafiq məlumat verdi, bir gün sonra isə mətbuat konfransı keçirilərək, bir saata yaxın müddətdə mətbuat nümayəndələrinin bütün sualları cavablandırıldı, bütün informasiyalar paylaşıldı.
Qeyd edilməlidir ki, Azərbaycan hökuməti bu mövzuya çox açıq yanaşdı və məlumat azlığının əhali arasında təşviş yarada biləcəyini nəzərə alaraq ÜST ilə yanaşı əhali də məlumatlandırıldı. Artıq bir müddətdir ki, sərhəd bölgələrinə fərqli rəsmi orqanların heyətləri göndərilib, orada mobil laboratoriyalar qurulub, tibb işçiləri prosesə ciddi şəkildə cəlb olunublar. Koronavirusun daha çox yayıldığı bildirilən İranla olan sərhəd bölgəsində ciddi nəzarət tədbirləri həyata keçirilir.
Yeri gəlmişkən, İran İslam Respublikasından qayıdan Azərbaycan Respublikasının 1960 və 1984-cü il təvəllüdlü iki vətəndaşında koronavirus infeksiyasına yoluxma faktı qeydə alınıb. Müvafiq qaydalara uyğun olaraq həmin şəxslər xüsusi rejimli xəstəxanalara yerləşdiriliblər. Nazirlər Kabinetinin yanında operativ qərargahdan verilən məlumata görə, hazırda pasiyentlərin səhhəti normaldır, vəziyyətləri sabitdir. Həmin şəxslərin müalicəsi ilə bağlı müvafiq tədbirlər həyata keçirilir. Bundan əvvəl koronavirus infeksiyasına yoluxduqları müəyyən edilmiş 1973, 1997 və 1998-ci il təvəllüdlü 3 Azərbaycan vətəndaşı xüsusi rejimli xəstəxanalarda müvafiq müalicə alaraq sağalıb və evə buraxılıb.
Qeyd etmək lazımdır ki, ölkəmizdə koronavirus (COVID-19) infeksiyasının yayılmasının qarşısının alınması və infeksiyaya yoluxma hallarının müəyyənləşdirilməsi məqsədilə müxtəlif xəstəxanalarda yaradılmış karantin zonalarına daxil olan şəxslərin müayinəsi də davam etdirilir. Ümumdünya Səhiyyə Təşkilatının tövsiyələrinə uyğun olaraq, karantinə alınan şəxslər müvafiq müayinədən keçirilir, o cümlədən onlardan laborator analizlər götürülür, səhhətləri nəzarət altında saxlanılır. İnfeksiyaya yoluxma faktı təsdiq olunan şəxslər dərhal xüsusi rejimli xəstəxanalara köçürülür, onların müalicəsi ilə bağlı müvafiq tədbirlər görülür. Artıq müayinə və laborator analizlər vasitəsilə infeksiyaya yoluxma faktı təsdiq edilməmiş və səhhəti şübhə doğurmayan 312 nəfər karantin müddətini başa vuraraq sərbəst buraxılıb.
Qeyd edildiyi kimi, Azərbaycan hökuməti koronavirus infeksiyasının qarşısının alınması, bu infeksiyanın kütləviləşməməsi üçün bütün vacib addımları atır. Nazirlər Kabineti yanında operativ qərargahdan verilən məlumata görə, ölkəmizdə bu xəstəliyə qarşı müvafiq profilaktik tədbirlər gücləndirilib. Bununla əlaqədar Bakı şəhərində və respublikanın müxtəlif regionlarında mart ayında keçirilməli olan ənənəvi Novruz şənlikləri ləğv edilib. Həmçinin adamların sıx toplaşdığı məkanlarda virusa yoluxma riski yüksək olduğundan qarşıdakı aylarda toy və bu cür məclislərin təxirə salınması, yas mərasimlərinin isə kütləvi keçirilməməsi tövsiyə edilib.
Pərviz SADAYOĞLU

Paylaş:

Baxılıb: 503 dəfə