“İrəli” İctimai Birliyi “Marş İrəli” layihəsinə start verib

Bakı:

22 °C

68 %

9 m/s

Əlaqə

AZ RU EN

Ana səhifə / Sosial / “İrəli” İctimai Birliyi “Marş İrəli” layihəsinə start verib

“İrəli” İctimai Birliyi “Marş İrəli” layihəsinə start verib

05.07.2019 [09:20]

Gənclər Fondunun və “İrəli” İctimai Birliyinin birgə təşkilatçılığı ilə Goranboy rayonunda “Marş İrəli” layihəsinin icrasına başlanılıb. Layihə “İrəli” İctimai Birliyinin təşəbbüsü ilə artıq ikinci dəfədir ki, həyata keçirilir.

AZƏRTAC-ın bölgə müxbiri xəbər verir ki, tədbir iştirakçıları əvvəlcə Azərbaycanın ərazi bütövlüyü və suverenliyi uğrunda canından keçmiş şəhidlərin məzarını və Heydər Əliyev Mərkəzinin qarşısında Ulu Öndərin abidəsini ziyarət ediblər.

Dövlət himninin səslənməsi ilə başlayan tədbirdə şəhidlərimizin xatirəsi bir dəqiqəlik sükutla yad edilib.

Goranboy Rayon İcra Hakimiyyətinin başçısı Məhərrəm Quliyev əsası ümummilli lider Heydər Əliyev tərəfindən qoyulmuş dövlət gənclər siyasətindən danışıb. Azərbaycan Silahlı Qüvvələrinin əsasının gənclərdən ibarət olduğunu deyən icra başçısı bildirib ki, Prezident, Ali Baş Komandan İlham Əliyevin diqqət və qayğısı sayəsində Azərbaycan ordusu həm maddi-texniki, nizam-intizam, həm də vətənpərvərlik baxımından dünyanın ən müasir ordularından birinə çevrilib.

Builki “Marş İrəli” layihəsinin təmas xəttinə yaxın bölgədə - Goranboy rayonunda keçirildiyini xatırladan “İrəli” İctimai Birliyinin sədri Mirhəsən Seyidov bunun heç də təsadüf olmadığını deyib. O bildirib ki, “İrəli” İctimai Birliyinin təşəbbüsü ilə 10 günə yaxın müddətdə keçiriləcək layihədə gender bərabərliyi qorunmaqla 17-25 yaş arasında 150-yə yaxın gənc iştirak edir. Bu gənclər layihədə iştirak əsnasında aktiv fiziki tapşırıq və oyunlarda həqiqi hərbi xidmətə öncədən hazırlaşacaq, fiziki dözümlülüyünü artıracaq, keçirilən motivasiya xarakterli görüşlər, seminarlar, simulyasiya oyunlarında mənəvi cəhətdən möhkəmlənəcək və xüsusi təlim modulları vasitəsilə daha çox maariflənə biləcəklər. Taktiki hazırlıq, qarovul hazırlığı, atəş hazırlığı, topoqrafiya, komandir hazırlığı və digər hərbi hazırlıqlar da layihə çərçivəsində həyata keçiriləcək fəaliyyətlərə aiddir.

Qeyd edilib ki, layihə çərçivəsində gənclər ekstremal şəraitdə qalaraq bir sıra sosial və idman fəaliyyətlərində yer alacaq, onlar üçün peşəkar mütəxəssislərin iştirakı ilə müxtəlif təlim-məşq toplanışları, fiziki və əqli tapşırıqlar, ekspert və qonaqlarla görüşlər və müzakirələr təşkil ediləcək. Həmçinin gənclər bir sıra fiziki, psixoloji və sosial fəaliyyətlərə cəlb olunacaq, nizam-intizamlı, bilikli və bacarıqlı bir vətəndaş kimi formalaşmaq yolunda təkan əldə edəcəklər. Hərbi simulyasiya formatında keçiriləcək düşərgə gənclərə hərbi mühitin aşılanması, milli ruhun formalaşması, həmçinin onların fiziki və mənəvi möhkəmlənməsi üçün şərait yaradacaq.

Paylaş:

Baxılıb: 571 dəfə