BSU-da yeni təlim-tədris mərkəzinin açılışı olub

Bakı:

19 °C

55 %

4 m/s

Əlaqə

AZ RU EN

Ana səhifə / Sosial / BSU-da yeni təlim-tədris mərkəzinin açılışı olub

BSU-da yeni təlim-tədris mərkəzinin açılışı olub

01.02.2019 [09:44]

Dünən Bakı Slavyan Universitetində (BSU) Avropa İttifaqının “ERASMUS+” proqramının “PETRA” (Azərbaycan universitetlərində tədrisin və təlimin təkmilləşdirilməsi) layihəsi çərçivəsində yaradılmış təlim-tədris mərkəzinin açılışı olub.
Açılış mərasimində BSU-nun rektoru, professor Nurlana Əliyeva Azərbaycanın qabaqcıl universitetlərində dünya təhsil sisteminə, xüsusən də Avropa təhsil məkanına inteqrasiya istiqamətində görülən işlərdən danışıb. Bildirib ki, tədris prosesinin təkmilləşdirilməsi məqsədilə qabaqcıl təcrübədən faydalanmaqla bir sıra uğurlu layihələr həyata keçirilir. Bakı Slavyan Universitetində hazırda reallaşdırılan belə layihələrdən biri də Avropa İttifaqının “ERASMUS+” proqramının “PETRA” layihəsidir: “Bu layihə çərçivəsində yaradılmış təlim-tədris mərkəzi Bakı Slavyan Universitetinin müəllimlərinin peşəkarlıq səviyyəsinin yüksəldilməsinə, onların müasir təlim metodları ilə işləmək bacarıqlarının, tədris prosesinin keyfiyyətinin və səmərəliliyinin artırılmasına xidmət edəcək”.
Rektor qeyd edib ki, mərkəz tərəfindən müəllim və tələbə heyəti üçün zəruri təlim-seminarlar, işə yeni başlayan müəllimlərin universitet həyatına adaptasiya olması, magistrant və doktorantlar üçün uğurlu elmi-tədqiqat işinin təşkili və yerinə yetirilməsi metodlarına aid kursların keçirilməsi təmin ediləcək. Avropa İttifaqının dəstəyi ilə təlim-tədris mərkəzini təchiz etmək üçün nəzərdə tutulan zəruri avadanlıq alınaraq lazımi qaydada quraşdırılıb.
BSU-nun elmi işlər üzrə prorektoru, professor Rafiq Novruzov layihənin mahiyyəti və gələcək planlar barədə məlumat verib. Bildirib ki, Bakı Slavyan Universiteti Avropa İttifaqının “ERASMUS+” proqramının “PETRA” layihəsinə tərəfdaş olaraq 2017-ci ilin iyul ayından qoşulub. R.Novruzov deyib: “Layihənin böyük hədəfi Azərbaycanda tədris və təlimdə mükəmməlliyin təşviq olunmasıdır. Başlanğıc, inkişaf, yayılma, istismar mərhələsindən ibarət olan layihə Azərbaycanın Bakı Slavyan Universiteti də daxil olmaqla 5 dövlət və 2 özəl universitetini təlim və tədrisin keyfiyyətinin təkmilləşdirilməsi üçün hədəf seçib. Universitetimiz layihə çərçivəsində başlanğıc mərhələsini keçib, hazırda inkişaf mərhələsindədir. Layihə üzrə nəzərdə tutulduğu kimi, işçi qrupu yaradılıb, onun tərkibi universitetin rektoru tərəfindən təsdiq edilib. Bu gündən isə yayılma, yəni mübadilə mərhələsi başlanır”.
Qeyd edilib ki, BSU layihəyə qoşulduğu müddətdə universitetin əməkdaşları Türkiyənin Qazi, Avstriyanın Vyana Tətbiqi Elmlər Universiteti, Finlandiyanın Yuvaskyla və İspaniyanın Valensiya Politexnik universitetlərində müvafiq təlim, seminar və konfranslarda da iştirak edərək Avropa universitetlərinin təcrübəsindən bəhrələniblər. Bundan əlavə, universitet əməkdaşları layihə ilə əlaqədar Xəzər Universitetində təşkil olunmuş seminar və konfransda iştirak ediblər.
Sonra BSU-nun ingilis filologiyası kafedrasının baş müəllimi, layihənin işçi qrupunun tədqiqatçısı Natavan Babayeva yeni yaradılmış təlim-tədris mərkəzinin qarşıya qoyduğu məqsəd, nəzərdə tutulan planlar, layihə çərçivəsində nəzərdə tutulmuş kurslar, treninqlər və seminarlar barədə ətraflı məlumat verib. Bildirib ki, mərkəzi təchiz etmək üçün nəzərdə tutulan zəruri avadanlıq - 10 ədəd personal kompüter, 10 ədəd planşet, 10 ədəd notbuk, proyektor və ağıllı lövhələr Avropa İttifaqının dəstəyi ilə alınıb və quraşdırılıb.
Tədbir iştirakçıları layihə çərçivəsində keçiriləcək seminar və treninqlər üçün müasir standartlara uyğun yaradılmış auditoriya ilə tanış olublar.
MÜŞFİQƏ

Paylaş:

Baxılıb: 492 dəfə