“AgTech and Green Energy” Beynəlxalq Forumu başa çatıb

Bakı:

31 °C

36 %

0 m/s

Əlaqə

AZ RU EN

Ana səhifə / Sosial / “AgTech and Green Energy” Beynəlxalq Forumu başa çatıb

“AgTech and Green Energy” Beynəlxalq Forumu başa çatıb

13.12.2018 [10:07]

Azərbaycanda ilk dəfə aqrar və yaşıl texnologiyalar üzrə keçirilən “AgTech and Green Energy” Beynəlxalq Forumu başa çatıb. ADA Universitetində 2 gün davam edən foruma dünyanın 15-dən çox ölkəsindən 40-dək xarici mütəxəssis və 1100-dən çox iştirakçı qatılıb.
Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsindən AZƏRTAC-a bildirilib ki, “Yaşıl gələcək üçün innovasiyalar” şüarı altında keçirilən tədbir dünyanın müxtəlif ölkələrindən aqrar və yaşıl texnologiyalar üzrə ixtisaslaşmış ən uğurlu startapların, şirkət sahiblərinin, elm xadimlərinin və tədqiqatçıların, vençur kapitalistlərin, ölkəmizdə artıq bu sahələr üzrə uğur qazanmış yerli mütəxəssislərin marağını cəlb edib.
“AgTech and Green Energy” forumunda energetika və aqrar texnologiyaların gələcəyi, yeni innovativ ekosistemlər və digər mövzularda panel müzakirələri aparılıb, informativ sessiyalar keçirilib. Tədbir çərçivəsində, həmçinin startaplar və fermerlər üçün seminarlar təşkil edilib.
Bağlanış mərasimində kənd təsərrüfatı naziri İnam Kərimov, energetika naziri Pərviz Şahbazov, ADA Universitetinin rektoru, xarici işlər nazirinin müavini, səfir Hafiz Paşayev, ABŞ-ın Stanford Universitetin prorektoru Paul Marca da iştirak ediblər.
Forumda çıxış edən ADA Universitetinin rektoru Hafiz Paşayev bildirib ki, aqrar texnologiyaların inkişafı zamanın tələbidir və Azərbaycanda bu forumun keçirilməsi yaşıl enerji və aqrar texnologiyaların inkişaf etdirilməsinə təkan verərək bəşəriyyətin üzləşdiyi qlobal problemlərin həllinə öz töhfəsini verəcək.
Rektor rəhbərlik etdiyi ADA Universitetində də hazırda yaşıl enerjinin tətbiqi üçün addımlar atıldığını qeyd edib.
Tədbirdə çıxış edən kənd təsərrüfatı naziri İnam Kərimov aqrar sahədə innovasiyaların tətbiqinin zəruri olduğunu vurğulayıb. Aqrar innovasiyalar istiqamətində görülən işlər fermerlər və kənd təsərrüfatı ilə məşğul olan sahibkarlar üçündür. İnnovasiyaların tətbiqi fermerlərin problemlərini həll etməyə və məhsuldarlığı artıraraq xərclərini azaltmağa imkan yaradır.
Nazir forumun keçirilməsinə verdiyi dəstəyə görə Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla xanım Əliyevaya, ADA Universitetinin rəhbərliyinə, beynəlxalq təşkilatlara, xarici və yerli tərəfdaşlara təşəkkür edib: “Bu tədbir, eyni zamanda təcrübə mübadiləsi aparmaq üçün yeni platforma rolunu oynayır. Hesab edirik ki, Azərbaycan aqrar sahədə innovasiyaların daha çox tətbiq olunduğu lider ölkələrdən birinə çevriləcək”.
Energetika naziri Pərviz Şahbazov isə bildirib ki, ilk dəfə bu cür tematik mövzuda keçirilən beynəlxalq forumda müasir dövrdə uğurla tətbiq olunan aqrar və yaşıl texnologiyalar, onların energetika sektoruna və aqrar sahəyə tətbiqinin yaratdığı üstünlüklərdən bəhs edilib.
Enerji effektivliyinə nail olmağın vacibliyini diqqətə çatdıran nazir bildirib ki, ölkədə bioresurslardan istifadə potensialı çox böyükdür, bu potensialdan, xüsusilə bərpaolunan və alternativ enerji mənbələrindən yararlanmaqla daha böyük fayda əldə etmək olar. Bu forum bioenerji layihələrinin təqdim olunması, startapların inkişafı baxımından yeni bir platforma rolunu oynamış olacaq.

Paylaş:

Baxılıb: 574 dəfə