Sona Mehdizadə: Arzum gələcəkdə dünyaca məşhur mühəndis olmaqdır

Bakı:

25 °C

69 %

9 m/s

Əlaqə

AZ RU EN

Ana səhifə / Sosial / Sona Mehdizadə: Arzum gələcəkdə dünyaca məşhur mühəndis olmaqdır

Sona Mehdizadə: Arzum gələcəkdə dünyaca məşhur mühəndis olmaqdır

10.08.2018 [08:47]

Azərbaycanda təhsilə, elmə göstərilən diqqət və qayğı öz bəhrəsini verməkdədir. Elə Dövlət İmtahan Mərkəzinin (DİM) ali məktəblərə keçirilən qəbul imtahanlarının nəticələri də deyilənləri təsdiqləyir. Belə ki, 2018-2019-cu tədris ili üçün I-IV ixtisas qrupları üzrə keçirilən birinci (yaz) və ikinci (yay) qəbul imtahanları başa çatıb. Öz bilik səviyyəsini sınaqdan keçirmiş və müsabiqədə iştirak etmək hüququ qazanmış abituriyentlər yığdıqları bala müvafiq olaraq ixtisas seçimi etməyə başlayıblar.
Xatırladaq ki, bu dəfə imtahanda I ixtisas qrupu üzrə 13, II ixtisas qrupu üzrə 3, III ixtisas qrupu üzrə 8, IV ixtisas qrupu üzrə isə 5 nəfər olmaqla, ümumilikdə 29 abituriyent onlara təqdim olunmuş bütün test tapşırıqlarına düzgün cavab verib və maksimum nəticə - 700 bal toplayıb. Bu da əvvəlki illərlə müqayisədə rekord göstəricidir. Beləliklə, ənənəyə sadiq qalaraq, bu il də 700 bal toplayan abituriyentləri oxucularımızla tanış edirik. Elə Bakı şəhəri 58 nömrəli tam orta məktəbin məzunu Sona Mehdizadə də bütün test suallarına düzgün cavab verərək adını rekordçular siyahısına yazdıra bilib. I ixtisas qrupu üzrə imtahan verən Sona may ayında keçirilən qəbul imtahanında 667 bal toplasa da, bu nəticə ilə qane olmayıb, növbəti imtahanda isə özünü yenidən sınayıb. Redaksiyamızın qonağı olan S.Mehdizadə imtahana necə hazırlaşmasından danışıb: “Birinci qəbul imtahanında çox stresli idim. Bilirdim ki, hamı məndən yüksək nəticə gözləyir. İkinci imtahana daha rahat getdim və yaxşı nəticə əldə etdim. Bildiyiniz kimi, I ixtisas qrupu üzrə bu il 13 abituriyent 700 bal toplayıb. Onlardan biri də mən oldum. Bu göstəricini sualların asan olmasına yox, ikinci imtahan şansının olmasına bağlayıram”.
Həkim ailəsində dünyaya gələn müsahibimiz gələcəkdə mühəndis olmaq istədiyini deyir: “Kiçik yaşlarımdan musiqi ilə məşğulam. Səid Rüstəmov adına 13 saylı musiqi məktəbinin piano sinfini bitirmişəm.
Onu da qeyd edim ki, atam həkim-kardioloqdur. Hər kəs ya musiqiçi, ya da atam kimi həkim olacağımı düşünürdü. Lakin özümü bu sahələrdə görmürdüm. Mühəndis olmaq istədiyimi bildirəndə atam seçimimə dəstək verdi. Bundan sonra məqsədim ali məktəbdə yaxşı təhsil almaq, bilik səviyyəmi yüksəltmək və xaricdə təhsilimi davam etdirməkdir. Gələcəkdə arzum dünyaca məşhur mühəndis olmaqdır”.
Əslən Zəngilandan olan, ürəyi yurd həsrəti ilə döyünən gəncimiz valideynlərinin doğulub boya-başa çatdığı torpaqlara qayıdacaqlarına ümid etdiyini deyir.
MÜŞFİQƏ

Paylaş:

Baxılıb: 737 dəfə