Selcan Məmmədli: İkinci dəfə də qəbul imtahanında iştirak etdim və qarşıma qoyduğum məqsədə çatdım

Bakı:

26 °C

57 %

1 m/s

AZ RU EN

Ana səhifə / Sosial / Selcan Məmmədli: İkinci dəfə də qəbul imtahanında iştirak etdim və qarşıma qoyduğum məqsədə çatdım

Selcan Məmmədli: İkinci dəfə də qəbul imtahanında iştirak etdim və qarşıma qoyduğum məqsədə çatdım

08.08.2018 [09:07]

Azərbaycanda daha bir imtahan həyəcanı geridə qalıb. Belə ki, 2018-2019-cu tədris ili üçün I-IV ixtisas qrupları üzrə keçirilən birinci (yaz) və ikinci (yay) qəbul imtahanları başa çatıb. Xatırladaq ki, bu dəfə imtahanda I ixtisas qrupu üzrə 13, II ixtisas qrupu üzrə 3, III ixtisas qrupu üzrə 8, IV ixtisas qrupu üzrə isə 5 nəfər olmaqla, ümumilikdə 29 abituriyent onlara təqdim olunmuş bütün test tapşırıqlarına düzgün cavab verib və maksimum nəticə - 700 bal toplayıb.
Beləliklə, ənənəyə sadiq qalaraq, bu il də 700 bal toplayan abituriyentləri oxucularımızla tanış edirik. Dövlət İmtahan Mərkəzi (DİM) tərəfindən respublikanın ali məktəblərinə keçirilən qəbul imtahanlarında 700 bal toplayan, yəni maksimum nəticə göstərən abituriyentlərdən biri də Gəncə şəhər İsrafil Məmmədov adına 27 saylı fizika-riyaziyyat-kimya təmayüllü məktəb-liseyin məzunu Selcan Məmmədlidir. DİM tərəfindən keçirilmiş birinci imtahanda 676 bal toplamış Selcan Məmmədli iyulun 26-da təşkil edilmiş ikinci imtahanda ən yüksək nəticə göstərib. Bu göstərici ilə Selcan Məmmədli həm bu il ali məktəblər üçün keçirilmiş qəbul imtahanlarında iştirak etmiş 70 min tələbə içərisində maksimum nəticə göstərən 29 abituriyentdən biri olmağı bacarıb, həm də Gəncə şəhərindən 700 bal toplayan yeganə abituriyent olub. Öz ailəsinə, doğulub boya-başa çatdığı şəhərə böyük sevinc bəxş etdiyinə görə Selcan Məmmədli xoşbəxt olduğunu və qürur hissi keçirdiyini deyir: “İlk gündən sinif yoldaşlarımız arasında sağlam rəqabət vardı. Birinci imtahanda onlar məndən daha yüksək nəticə göstərmişdilər. Mən isə 676 bal toplamışdım. Lakin bu, mənim üçün qaneedici deyildi. Bu rəqabət mənə, sanki, bir stimul oldu. Ona görə ikinci dəfə də qəbul imtahanında iştirak etdim və qarşıma qoyduğum məqsədə çatdım. İndi ən böyük arzum ADA Universitetində hüquqşünaslıq ixtisası üzrə təhsil almaqdır. ADA Universitetində təhsil mükəmməldir. Ona görə mən də mükəmməl olanı seçirəm. Gələcək illərdə ali məktəbə daxil olmaq istəyən gənclərə isə tövsiyəm budur ki, məqsədli olsunlar və öz aralarında daim sağlam rəqabət aparsınlar”.
Selcan bütün uğurlarına görə ona mənəvi dəstək olan valideynlərinə və elmin, təhsilin sirlərini öyrədən müəllimlərinə minnətdarlığını bildirir.
Məlumat üçün bildirək ki, Selcanın atası Mahil Məmmədov Aqrar Universitetin dosentidir. Onun sözlərinə görə, övladlarının ilk uğurları hələ çox kiçik yaşlarından, bağça illərindən başlayıb. İngilis dili təmayüllü bağçaya gedən Selcan erkən yaşlarından xarici dildə sərbəst danışmağı ilə hər kəsi təəccübləndirməyi bacarıb. Sonrakı illərdə də elmə, təhsilə həvəsli olan Selcan orta məktəbi əla qiymətlərlə oxuyub. Qızlarının təhsilə marağını hiss edən valideynlər övladlarının yaxşı təhsil alması üçün ona həmişə mənəvi dəstək olublar.
MÜŞFİQƏ

Paylaş:

Baxılıb: 634 dəfə