Elmar Rzayev: Dindar olaraq sosial şəbəkələrdə ölkəmizdə dini mühitlə bağlı yayılan yanlış fikirləri pisləyirik

Bakı:

23 °C

83 %

10 m/s

AZ RU EN

Ana səhifə / Sosial / Elmar Rzayev: Dindar olaraq sosial şəbəkələrdə ölkəmizdə dini mühitlə bağlı yayılan yanlış fikirləri pisləyirik

Elmar Rzayev: Dindar olaraq sosial şəbəkələrdə ölkəmizdə dini mühitlə bağlı yayılan yanlış fikirləri pisləyirik

01.08.2018 [09:31]

“Azərbaycan dünyəvi, tolerant dövlətdir. Ölkəmizdə bütün dinlərin, millətlərin nümayəndələrinə bərabər münasibət göstərilir”. Bu fikirləri “Yeni Azərbaycan” qəzetinə açıqlamasında Şəmkir məscidinin imamı Elmar Rzayev deyib.
E.Rzayev bildirib ki, dövlətimizin dini sahədə həyata keçirdiyi siyasət uğurludur. Onun sözlərinə görə, Ulu öndər Heydər Əliyev tərəfindən əsası qoyulan bu siyasət Prezident İlham Əliyev tərəfindən uğurla davam etdirilir: “Azərbaycanda bütün dinlərin nümayəndələrinə ibadətləri üçün lazımi şərait yaradılıb. Ölkəmizdə müstəqillik illərində yüzlərlə məscid tikilib və əsaslı təmir olunub, eləcə də digər dinlərin daşıyıcıları üçün məbədlər fəaliyyət göstərir. Yəni bu baxımdan, Azərbaycan dünya ölkələri üçün nümunədir”.
E.Rzayev qeyd edib ki, bəzi qüvvələr ölkəmizdəki bu gözəl mühitə kölgə salmağa çalışırlar. Sosial şəbəkələrdə son vaxtlar bu istiqamətdə yanlış fikirlərin yayıldığını deyən imamın fikrincə, bütün bunlar ölkəmizin inkişafını istəməyən qüvvələrin əməlləridir. “Biz bir sıra müsəlman ölkələrində qanlı toqquşmaların şahidiyik. Din pərdəsi altında insanları bir-birilərinə qarşı qoyan qüvvələr var. Burada dini radikalizm əsas rol oynayır. Şükürlər olsun ki, Azərbaycanda sabitlik hökm sürür. Bəzi xarici dairələri də məhz ölkəmizdəki sabitlik, inkişaf narahat edir. Ona görə də, sosial şəbəkələrdə təxribat xarakterli fikirlərlə insanları çaşdırmağa çalışırlar”, - deyən Şəmkir məscidinin imamı İslam dininin sülh dini olduğunu və radikalizmi rədd etdiyini söyləyib.
“Biz dini radikalizmin əleyhinəyik və sosial şəbəkələrdə ölkəmizdə dini mühitlə bağlı yayılan yanlış fikirləri pisləyirik. Biz insanlarla görüşlərimizdə də sağlam dini maarifləndirmənin aparılmasının vacibliyini qeyd edirik və onları yanlış məlumatlara uymamağa çağırırıq. İnsanların dini radikalizm, ekstremizm, fanatizm və mövhumat kimi mənfi meyillərin təsiri altına düşməməsi üçün maarifləndirmə işlərinin əhəmiyyəti böyükdür. Sevindirici haldır ki, Azərbaycan cəmiyyətində, o cümlədən Şəmkir rayonunda da insanlar radikalizmi rədd edirlər. Yenə də qeyd edirəm ki, sosial şəbəkələrdə Azərbaycanda guya müxtəlif dinlər üçün şəraitin olmadığı, dindarların sıxışdırıldığı haqda deyilən fikirlərin heç bir əsası yoxdur. Ona görə də cəmiyyətimizi belə yanlış fikirlərlə aldatmaq mümkün deyil. Azərbaycan vətəndaşları, o cümlədən dindarlar dövlətimizin bu istiqamətdəki siyasətini dəstəkləyirlər”, - deyə imam vurğulayıb.

Paylaş:

Baxılıb: 795 dəfə