Dövlət İdarəçilik Akademiyası ilə Maliyyə Bazarlarına Nəzarət Palatası arasında Anlaşma Memorandumu imzalanıb

Bakı:

23 °C

56 %

8 m/s

AZ RU EN

Ana səhifə / Sosial / Dövlət İdarəçilik Akademiyası ilə Maliyyə Bazarlarına Nəzarət Palatası arasında Anlaşma Memorandumu imzalanıb

Dövlət İdarəçilik Akademiyası ilə Maliyyə Bazarlarına Nəzarət Palatası arasında Anlaşma Memorandumu imzalanıb

08.12.2017 [10:02]

“Azərbaycan Respublikasında maliyyə xidmətlərinin inkişafına dair Strateji Yol Xəritəsi”nin vacib bölmələrindən biri olan ölkədə maliyyə sahəsində bilik və bacarıqların artırılması istiqamətində həyata keçirilən tədbirlər çərçivəsində dekabrın 7-də Azərbaycan Respublikasının Prezidenti yanında Dövlət İdarəçilik Akademiyası ilə Maliyyə Bazarlarına Nəzarət Palatası arasında Anlaşma Memorandumu imzalanıb.
AZƏRTAC xəbər verir ki, Memorandum Ulu öndər Heydər Əliyevin əsasını qoyduğu və Prezident İlham Əliyev tərəfindən uğurla davam etdirilən iqtisadi inkişaf strategiyasının davamlılığının təmin olunmasında iştirak, əhalinin, o cümlədən müvafiq ixtisas sahiblərinin maliyyə bazarları, onun məhsul və xidmətləri barədə maarifləndirilməsi, maliyyə bazarlarının inkişafına dair elmi tədqiqatların aparılması, orta və ali təhsil müəssisələrində maliyyə bazarları ilə bağlı biliklərin tədrisinə dəstək verilməsi, maliyyə bazarları üzrə yüksəkixtisaslı kadrların hazırlanması istiqamətində əməkdaşlıq məsələlərini əhatə edir. Sənədi Azərbaycan Respublikasının Prezidenti yanında Dövlət İdarəçilik Akademiyasının rektoru, akademik Urxan Ələkbərov və Maliyyə Bazarlarına Nəzarət Palatasının baş icraçı direktoru İbrahim Alışov imzalayıblar.
Memorandumun əsas prinsipi və mahiyyəti səmərəli əməkdaşlıq nəticəsində təhsil, elm, təlim-tədris və bu istiqamətdə inkişafyönümlü əməkdaşlığın genişləndirilməsi məsələləri üzrə müxtəlif sahələrdə müştərək proqramların hazırlanması və müvafiq layihələrin həyata keçirilməsi, habelə maliyyə dəstəyi və texniki dəstək göstərərək onların icra olunması istiqamətində müvafiq vəzifələrin həyata keçirilməsindən ibarətdir.
İmzalanma mərasimində çıxış edən Urxan Ələkbərov ölkəmizdə nadir idarəçilik texnologiyalarının tətbiqi, çevik dövlət idarəetmə sisteminin formalaşması, elmə əsaslanan innovativ inkişaf strategiyasının reallaşdırılması, dövlət quruculuğu və dövlət qulluğunun inkişafı proseslərində Ümummilli lider Heydər Əliyevin və Onun layiqli davamçısı Prezident İlham Əliyevin misilsiz xidmətlərini qeyd edib. Rektor vurğulayıb ki, ölkənin qısa müddətdə iqtisadi və sosial sahədə qazandığı yüksək nailiyyətləri, XXI əsrin çağırışlarının həllinə yönəlmiş dünya əhəmiyyətli təşəbbüsləri, ildən-ilə artan beynəlxalq nüfuzu Azərbaycanı bir çox istiqamətlərdə regional və qlobal liderə çevirib.
Qeyd edilib ki, son 10 ildə ölkəmizdə davamlı inkişaf üçün iqtisadi və elmi-texniki baza yaradılıb. Eyni zamanda, beynəlxalq təşkilatların rəsmi məlumatlarına əsasən, Azərbaycan son illərdə bir çox davamlı inkişaf göstəriciləri və sosial indikatorlara görə, dünya liderləri olan “Böyük İyirmilik” və “Böyük Yeddilik” ölkələrinin əksəriyyətini üstələyir. Rektor bu uğurların kökündə yalnız mükəmməl idarəçiliyin və dövlət institutlarının, vətəndaş cəmiyyətinin və özəl sektorun birgə fəaliyyətinin dayandığını bildirib. Hazırda milli iqtisadiyyatın şaxələndirilməsi, Strateji Yol Xəritəsindən irəli gələn vəzifələrin icrasının təmin edilməsi dövlət idarəçiliyi və icra hakimiyyəti orqanları üçün müvafiq ixtisaslar üzrə mütəxəssis hazırlığı səviyyəsindən birbaşa asılıdır. Rektor iki qurum arasında imzalanan Memorandumun bu məqsədə xidmət etdiyini söyləyib.
İbrahim Alışov bildirib ki, ölkədə idarəçilik sahəsində peşəkar kadrların yetişdirilməsinə xüsusi diqqət ayıran qabaqcıl aparıcı tədris, metodik, elm və analitik informasiya mərkəzi olan Dövlət İdarəçilik Akademiyası ilə birgə əməkdaşlıq Strateji Yol Xəritəsinin icrası istiqamətində atılan önəmli addımlardan biri kimi səciyyələndirilməlidir. O qeyd edib ki, Akademiya ilə birlikdə 500-dən çox tələbə, müdavim və dövlət qulluqçusunun maliyyə biliklərinin artırılmasında iştirak, birgə layihələrin, elmi-praktik konfransların, seminarların, simpoziumların təşkil edilməsi, burada təhsil alan tələbələrin Palatada istehsalat təcrübələri keçmələrinə şərait yaradılması, Palatanın əməkdaşları üçün uzunmüddətli və qısamüddətli kursların təşkil olunması və digər innovativ tədbirlər növbəti 5 il üçün nəzərdə tutulmuş fəaliyyət planına daxildir.

Paylaş:

Baxılıb: 511 dəfə