“Azərbaycan gəncliyi 2017-2021-ci illərdə” Dövlət Proqramının icrasına dair müzakirələr aparılıb

Bakı:

18 °C

88 %

6 m/s

Əlaqə

AZ RU EN

Ana səhifə / Sosial / “Azərbaycan gəncliyi 2017-2021-ci illərdə” Dövlət Proqramının icrasına dair müzakirələr aparılıb

“Azərbaycan gəncliyi 2017-2021-ci illərdə” Dövlət Proqramının icrasına dair müzakirələr aparılıb

25.10.2017 [10:04]

Oktyabrın 24-də “Azərbaycan gəncliyi 2017-2021-ci illərdə” Dövlət Proqramının icrası ilə əlaqədar tədbir keçirilib.
AZƏRTAC xəbər verir ki, tədbirdə çıxış edən gənclər və idman nazirinin müavini İntiqam Babayev ölkəmizdə gənclərlə iş üzrə əldə olunan nailiyyətlərdən, bu sahəyə göstərilən dövlət qayğısından danışaraq deyib: “Üçüncü dəfədir ölkəmizdə gənclər sahəsi üzrə Dövlət Proqramı qəbul olunub. Əvvəlki təcrübədən yararlanaraq bu Dövlət Proqramında da gənclərin maraqları tam təmin olunub. Hazırda bu sənədin icrası ilə bağlı müzakirələr aparılır və gənclər bu prosesdə fəal iştirak edirlər”.
Nazir müavini bildirib ki, gənclərin inkişafı, onların dünyagörüşünün artırılması, beynəlxalq arenaya inteqrasiyası dövlət siyasətinin prioritet istiqamətlərindən biridir. Bu, dövlətimizin başçısının gənclərə etimadının bariz nümunəsidir. Belə sənədlərin qəbulu və icrası həmişə gənclərin iştirakı ilə ictimai müzakirəyə çıxarılır. Bu da gənclərin maraqlarının tam təmin olunmasına hesablanıb. Azərbaycanda gənclərin inkişafı istiqamətində qanunlar, İnkişaf Strategiyası və Dövlət proqramları var. Bunların nəticəsində respublikamızda yeni alimlər, menecerlər, informasiya texnologiyaları üzrə mühəndislər, elm və incəsənət sahəsi üzrə peşəkar gənclər formalaşıb.
Milli Məclisin deputatı Şahin İsmayılov əsası Ümummilli lider Heydər Əliyev tərəfindən qoyulan gənclər siyasətinin hazırda Prezident İlham Əliyevin rəhbərliyi ilə uğurla davam və inkişaf etdirilməsi nəticəsində əldə olunan nailiyyətlərdən söhbət açıb. Diqqətə çatdırıb ki, ölkəmizdə bu sahədə qəbul olunan Dövlət proqramlarının yaratdığı imkanlardan bütün gənclərimiz bəhrələnirlər. Bu mühüm və çoxşaxəli proqramlarda vətənpərvərlik, azərbaycançılıq məfkurəsi, gənclərin beynəlxalq inteqrasiyası və dünyagörüşünün artırılması və s. məsələlər xüsusilə diqqət mərkəzində saxlanılır.
Gənclər və İdman Nazirliyi yanında Gənclərlə İş üzrə İctimai Şuranın sədri Nurəddin Mehdiyev ölkə gəncliyinin inkişafında Dövlət proqramlarının vacibliyini vurğulayıb. Bildirib ki, gənclərin inkişafına hesablanmış bu sənəd onlar üçün yeni imkanlar təqdim edir. Onlar bu müzakirələrdə yaxından iştirak etməklə Dövlət Proqramının icrasına töhfə verirlər.
Azərbaycan Respublikası Gənclər Təşkilatları Milli Şurasının sədri Seymur Hüseynov vurğulayıb ki, proqram gənclərin hərtərəfli inkişafı üçün əlverişli şəraitin yaradılmasını, azərbaycançılıq və dövlətçilik prinsipləri əsasında vətəndaşlıq və vətənpərvərlik tərbiyəsinin gücləndirilməsini və digər vəzifələrin yerinə yetirilməsini nəzərdə tutur. Sənəddə ölkə gənclərinin müasir texnologiyalara yiyələnmələri, beynəlxalq əlaqələrini gücləndirmələri təşviq olunur, Azərbaycan gəncliyini düşündürən bütün məsələlər ətraflı əksini tapıb.
“İrəli” İctimai Birliyinin sədri Mirhəsən Seyidov qeyd edib ki, proqramın qəbul olunması gənclərin inkişafına dəstək verməklə yanaşı, onların qarşısına bir çox mühüm vəzifələr qoyub. Dövlət Proqramında gənclərin vətəndaşlıq və vətənpərvərlik tərbiyəsi, gənc sahibkarların fəaliyyətinin stimullaşdırılması, gənclərin və gənclər təşkilatının fəaliyyətinin dəstəklənməsi, gənclərin hüquq və informasiya texnologiyaları sahəsində bilik və bacarıqlarının artırılması, xüsusi qayğıya ehtiyacı olan gənclərin cəmiyyətə inteqrasiyası və s. vacib məsələlər əksini tapıb. Yeni Dövlət Proqramının təsdiq olunması Prezident İlham Əliyevin Azərbaycanda gənclərin inkişafına, bu sahədə dövlət siyasətinə verdiyi önəmin göstəricisidir.
Tədbirdə gənclər arasında simulyasiya oyunlarının, görkəmli şəxsiyyətləri təbliğ edən sərgi və müsabiqələrin təşkili, inkişafda olan könüllülük hərəkatının beynəlxalq arenaya inteqrasiyası və s. layihələrin reallaşdırılmasının vacibliyi vurğulanıb.
Digər çıxışlarda da müxtəlif təkliflər səsləndirilib, müzakirələr aparılıb. Çıxışlarda Dövlət Proqramının icrası ilə bağlı aparılan ictimai müzakirələrdə gənclər təşkilatlarının nümayəndələrinin fəal iştirakının önəmi qeyd olunub. Konkret sahələr üzrə fəaliyyət istiqamətlərinin dəqiq müəyyənləşdirildiyi proqramın gənclərin inkişafına növbəti mühüm təkan olacağına əminlik ifadə edilib.

Paylaş:

Baxılıb: 521 dəfə