“Aveta” MMC: 50 kiloqramlıq un kisəsinin qiyməti daşınma xərcindən asılı olaraq pərakəndə satışda 23-24 manatdır

Bakı:

18 °C

63 %

2 m/s

AZ RU EN

Ana səhifə / Sosial / “Aveta” MMC: 50 kiloqramlıq un kisəsinin qiyməti daşınma xərcindən asılı olaraq pərakəndə satışda 23-24 manatdır

“Aveta” MMC: 50 kiloqramlıq un kisəsinin qiyməti daşınma xərcindən asılı olaraq pərakəndə satışda 23-24 manatdır

16.01.2016 [10:31]

Dünyanı bürüyən iqtisadi böhran Azərbaycandan da yan keçməyib. Xüsusən neftin qiymətinin kəskin şəkildə aşağı düşməsi “qara qızıl” ölkəsi olan respublikamızın büdcəsinə təsirsiz ötüşməyib. Manatın devalvasiyası bu gün istehlak bazarında qiymət artımını da qaçılmaz edib. Lakin təəssüflə qeyd olunmalıdır ki, bəzi işbazlar yaranan vəziyyətdən sui-istifadə edərək qiymətlərin süni şişirdilməsi hesabına daha çox qazanc götürməyə çalışırlar. Qiymət şişirtmələri nəinki yerli istehlak malları, habelə həssas sahə olan un bazarında da hiss edilib. Təsadüfi deyil ki, Prezident İlham Əliyev süni qiymət artımına yol verənlərə qarşı sərt cəza tədbirləri görülməsi ilə bağlı əlaqədar qurumların qarşısında konkret vəzifələr qoyub. Artıq bununla bağlı həyata keçirilən operativ tədbirlər öz nəticəsini verməkdədir.
Əlbəttə, qiymət artımı sahəsində şəffaflıq, istehlak bazarında mövcud vəziyyət və sair barədə ictimaiyyətin mütəmadi olaraq məlumatlandırılması olduqca zəruridir. Bu, şayiələrin, əsassız dedi-qoduların yaranmasının qarşısını alır.
AZƏRTAC-ın müxbiri “Karat Holding” şirkətinin Kürdəmirdəki filialı olan “Aveta” MMC-nin un istehsalı müəssisəsində olub və bazarda yaranan mövcud vəziyyət barədə ətraflı məlumat alıb. Sutkalıq istehsal gücü 500 ton olan müəssisə “Karmen” markası ilə un, habelə kəpək istehsal edir. Buradan Kürdəmirə və ətraf bölgələrə, əsasən Ağsu, Ucar, İmişli, İsmayıllı rayonlarının bazarlarına un göndərilir. MMC-nin icraçı direktoru Rəhim Nuğayev bildirib ki, manatın devalvasiyasından sonra yeni qiymət tərtib olunanadək rayonlarda bir sıra işbazlar yaranan vəziyyətdən istifadə edərək qiymətləri süni şəkildə artırmağa başladılar. Belə ki, bir sıra mağazalarda unun satışını dayandırdılar və ya 45-50 kiloqramlıq hər kisə üçün alıcılardan əlavə olaraq 5-7 manat pul tələb etdilər. Bu, əsl möhtəkirlikdir. Artıq bizdə pərakəndə satış qiymətləri dürüstləşdirilib. İndi hər 50 kiloqramlıq kisənin qiyməti topdansatış 22 manat 30 qəpik, pərakəndə satışda isə daşınma xərcindən asılı olaraq 23-24 manatdır. Həmçinin bildirmək istərdim ki, müəssisədə kifayət qədər taxıl ehtiyatı var.
Qeyd edək ki, manatın məzənnəsinin dəyişməsi ilə əlaqədar əhalinin, xüsusilə aztəminatlı ailələrin sosial müdafiəsini gücləndirmək məqsədilə Azərbaycan Respublikası Prezidentinin tapşırığına əsasən, buğdanın idxalı və satışı, buğda ununun və çörəyin istehsalı və satışı yanvarın 15-dən etibarən əlavə dəyər vergisindən azad olunub. Bunun nəticəsində unun topdansatış qiyməti əhəmiyyətli dərəcədə azalıb. Daşınma xərclərindən asılı olaraq 50 kiloqramlıq 1 kisə unun qiyməti 21 manat 50 qəpiklə 22 manat 50 qəpik arasında, pərakəndə satış qiyməti isə 23 manatla 24 manat arasında formalaşıb.
Unun yeni qiymətinə uyğun olaraq, 500 qramlıq çörək 30 qəpiyə, 700 qramlıq çörək isə 40 qəpiyə satılacaq. Unu və çörəyi göstərilən qiymətlərdən artıq qiymətə təklif edən şəxslərə qarşı ən ciddi məsuliyyət tədbirləri görüləcək.

Paylaş:

Baxılıb: 744 dəfə