“Alov Qoruyanlar”

Bakı:

23 °C

42 %

1 m/s

Əlaqə

AZ RU EN

Ana səhifə / Sosial / “Alov Qoruyanlar”

“Alov Qoruyanlar”

09.05.2015 [12:53]

Ölkəmizdə ilk Avropa Oyunlarının yüksək səviyyədə keçirilməsi üçün müvafiq hazırlıq işləri uğurla davam etdirilir. Artıq bu mötəbər yarışlara sayılı günlər qalır. Sevindirici haldır ki, ilk Avropa Oyunlarını ictimai təşkilatlarla yanaşı, gənclər, eləcə də, “Bakı-2015”in könüllüləri də dəstəkləyirlər. Həyata keçirilən ilk Avropa Oyunlarının könüllü proqramı gənclərin “Bakı-2015” birinci Avropa Oyunlarına qoşulmaları və beynəlxalq arenada Azərbaycanı dəstəkləmələri üçün gözəl imkan yaradacaq. Könüllülərin ilk Avropa Oyunlarında “Alov Qoruyanlar” kimi tanınmaları isə gənclərimizə ölkəmizin qonaqpərvərliyinə və idman entuziazmına töhfə verməkləri üçün yeni imkanlar yaradacaq.
Bildiyiniz kimi, artıq bir neçə gündür ki, “Yeni Azərbaycan” qəzeti “Alov Qoruyanlar” adlı yeni rubrikaya start verib. Bu rubrikada ilk Avropa Oyunlarında fəaliyyət göstərəcək könüllü gənclərimizi oxucularımıza təqdim edirik.
“Azərbaycanın bayrağını zirvələrə qaldıran bütün idmançılarla fəxr edirik”. Bunu “CNİM” Azərbaycan şirkətində operator vəzifəsində çalışan, “Bakı-2015”in könüllüsü Cəfər Yusifov deyib: “İdmana böyük marağım var. İdman oyunlarını da böyük həvəslə izləyirəm. İdmançılarımızın qazandıqları uğurlar isə hər bir gənc kimi, məni də sevindirir. Onlarla fəxr edirəm. İdmançılarımız beynəlxalq arenalarda ölkəmizi layiqincə təmsil edir, vətənimizin adını uca tuturlar. İlk Avropa Oyunlarının paytaxtımızda keçirilməsi isə olduqca sevindirici haldır. Bu mötəbər tədbiri səbirsizliklə gözləyirəm. Eşidəndə ki, bu Oyunlarda yaxından iştirak etmək imkanım olacaq çox sevindim. Dərhal müsabiqələrə qatıldım və “Bakı-2015”in könüllüləri sırasına qoşuldum. Mən fəxr edirəm ki, hazırda könüllülərin sırasındayam və az da olsa bu Oyunlara töhfə vermiş olacam”.
“İdman sağlamlığın təməlidir. Bu baxımdan, sağlam yaşamaq istəyənlər idmanla məşğul olmalıdırlar. Bunun üçün isə ölkəmizdə hər cür şərait var”. Bunu qəzetimizə açıqlamasında Dövlət İdarəçilik Akademiyasının III kurs tələbəsi, “Bakı-2015”in könüllüsü Aysel Əsədova deyib: “İlk Avropa Oyunlarının ölkəmizdə keçirilməsi, hesab edirəm ki, böyük bir tarixi hadisədir. Hər bir gənc kimi məni də istər son zamanlar idmançılarımızın qazandıqları nailiyyətlər, istərsə də Oyunlarda iştirakımız olduqca çox sevindirir. Güləş, boks, ağırlıqqaldırma üzrə bir sıra yaddaqalan nailiyyətlər əldə edirik. Atletlərimiz beynəlxalq arenalarda Azərbaycanın bayrağını ucaldır, himnimizi səsləndirirlər. Bu isə ölkəmizin daha da tanınmasına səbəb olur. Biz könüllülərin bu Oyunlarda iştirakı isə hesab edirəm ki, olduqca vacibdir. “Bakı-2015”in könüllüləri bununla fəxr edirlər”.
Vüsalə CAVANŞİR

Paylaş:

Baxılıb: 870 dəfə