Dünyaca məşhur məktəblər şəbəkəsi “Xəyal adası”nda

Bakı:

29 °C

54 %

2 m/s

Əlaqə

AZ RU EN

Ana səhifə / Sosial / Dünyaca məşhur məktəblər şəbəkəsi “Xəyal adası”nda

Dünyaca məşhur məktəblər şəbəkəsi “Xəyal adası”nda

10.04.2015 [09:58]

Abdolbari Goozal: “SABİS Sun” Beynəlxalq məktəblər şəbəkəsi Azərbaycan təhsilinin inkişafına mühüm töhfələr verəcək
Məlum olduğu kimi, Azərbaycanda dövlət tərəfindən özəl sektorun fəaliyyətinə yaradılmış münbit şəraitdən istifadə edən “Azərsun Holdinq” hər ötən gün ərzində öz fəaliyyət dairəsini bir az da genişləndirməklə yanaşı, ölkəmiz üçün yararlı olan yeni-yeni sahələrə kapital qoyur. Bunlardan biri də təhsil sahəsidir. Məlumat üçün bildirək ki, ötən ilin sentyabrında “Azərsun Holdinq” şirkətlər qrupu dünyanın ən məşhur məktəblər şəbəkələrindən biri olan, 18 ölkədə 60 məktəb ilə xidmət göstərən “SABİS” ilə müqavilə imzalayıb. Razılaşmaya əsasən, Azərbaycanda ilk dəfə olaraq məhz “Azərsun”a məxsus “Xəyal adası” yaşayış sahəsində “SABİS” məktəb kompleksinin yaradılmasına başlanılıb və bu ilin sentyabrında sözügedən təhsil ocağı ölkəmizdə ilk şagirdlərini qəbul edəcək.
Yeri gəlmişkən, hazırlıq işlərinin gedişatı ilə bağlı “SABİS Sun” Beynəlxalq məktəblər şəbəkəsinin Müşahidə Şurasının sədri xanım Leyla Saad və prezidenti Karl Bistani Azərbaycana səfər ediblər. Bu münasibətlə “Xəyal adası”nda KİV nümayəndələri ilə görüş keçirilib. Ölkəmizdə “SABİS Sun” Beynəlxalq məktəblər şəbəkəsinin fəaliyyətə başlaması üçün dəstək olan “Azərsun Holdinq”in Müşahidə Şurasının sədri Abdolbari Goozal görüşü giriş sözü ilə açaraq “Xəyal adası” layihəsi barədə jurnalistlərə geniş məlumat verib, “SABİS Sun” Beynəlxalq məktəblər şəbəkəsinin ümumilikdə Azərbaycan təhsilinin inkişafına mühüm töhfələr verəcəyini söyləyib: “SABIS” Azərbaycana adaptasiya olduqdan sonra Təhsil Nazirliyinə müraciət edəcəyik. Gəncədə, Lənkəranda, Şəkidə və s. regionlarda “SABIS”in idarə etdiyi məktəblərin olması millətimizin xeyrinə olar”.
Öz növbəsində, “SABİS Sun” Beynəlxalq məktəblər şəbəkəsinin prezidenti Karl Bistani jurnalistlər üçün təqdimat keçirərək adıçəkilən təhsil müəssisəsi barədə geniş məlumat verib və onların suallarını cavablandırıb. Bildirilib ki, təhsil müəssisəsi bağça və orta məktəbdən ibarətdir. Bağçaya körpələr iki səviyyə üzrə götürüləcəklər. Beynəlxalq standartlara tam cavab verəcək bu məktəb kompleksində təhsil ingilis dilində aparılacaq. Bundan əlavə, şagirdlərə Təhsil Nazirliyinin tələblərinə uyğun olaraq Azərbaycan dili və yerli əhəmiyyətli digər fənlər də tədris ediləcək. Həmçinin, şagirdlərə Azərbaycan və ingilis dilindən əlavə fransız və ya rus dilini öyrənmək imkanı da yaradılacaq.
Artıq şagird qəbuluna başlanıldığını deyən Karl Bistani onu da bildirib ki, “SABİS Sun” Beynəlxalq məktəb kompleksi müstəqil təhsil müəssisəsidir. Buranın daha bir özəlliyi isə öz düşərgəsinin olmasıdır. Təhsil ocağında müxtəlif fənlərin tədrisindən əlavə, idman məşğələlərinə də böyük diqqət ayrılacaq. Belə ki, burada təhsil alanlar üçün xüsusi idman kompleksinin inşası da nəzərdə tutulub “SABİS” beynəlxalq məktəblərində şagirdlərin intellektual səviyyələrinin yüksəldilməsi üçün həftəsonu tədbirləri, yay məktəbləri və digər tədbirlər həyata keçiriləcək.
Bundan sonra isə jurnalistləri ərazi ilə daha yaxından tanış etmək üçün tur təşkil edilib.
Nadir AZƏRİ

Paylaş:

Baxılıb: 1134 dəfə