Bakı Beynəlxalq Forumun iştirakçılarını heyran qoyub

Bakı:

12 °C

87 %

2 m/s

Əlaqə

AZ RU EN

Ana səhifə / Sosial / Bakı Beynəlxalq Forumun iştirakçılarını heyran qoyub

Bakı Beynəlxalq Forumun iştirakçılarını heyran qoyub

04.10.2014 [11:07]

Qonaqlar təəssüratlarını Bilik Fondunun əməkdaşları ilə bölüşüblər
Azərbaycan Respublikasının Prezidenti yanında Bilik Fondunun əməkdaşları IV Bakı Beynəlxalq Humanitar Forumunun müxtəlif ölkələrdən olan iştirakçıları ilə görüşüblər. Qonaqlar Azərbaycan barədə təəssüratlarını bölüşüblər.
Fiziologiya və tibb üzrə Nobel mükafatı laureatı (1991) Ervin Neher deyib ki, o, Azərbaycanda ilk dəfədir olur: “Bura gəlməmişdən əvvəl həyat yoldaşımla birlikdə ölkəniz haqqında məlumat toplayırdıq. Çox maraqlı bilgilər əldə etdik. Azərbaycanın inkişaf göstəriciləri, müxtəlif din və mədəniyyət nümayəndələrinin ölkənizdə bərabər şəraitdə yaşaması təqdirəlayiqdir. Sizin insanlarınız da fərqlidir. İstiqanlı, ağıllı və sülhpərvər”.
İtalyan yəhudilərinə yardım komitəsinin nümayəndəsi Victor Magiar da ilk dəfədir Azərbaycandadır. O, deyib ki, burada gördüyü mənzərə mətbuat və televiziyada izlədiklərindən qat-qat gözəldir: “Söz tapa bilmirəm... Müxtəlif memarlıq üslubları ilə tikilən binalar, şəhərin dəbdəbəsi, iqtisadi inkişafınız adamı sevindirir”.
Bilik Fondunun əməkdaşı ilə söhbətində V.Magiar onu da qeyd edib ki, belə fondların bütün Avropa ölkələrində yaranması intellektual inkişafa böyük təkan olar: “Sizin Fond eyni funksiyanı yerinə yetirən bütün qurumlarla əlaqəli şəkildə işləməlidir. Bunun üçün sizə hər bir dəstəyi verməyə hazırıq”.
Malayziyanin Bernama agentliyinin baş direktoru Yonq So Heonq Azərbaycanda olduğundan, beynəlxalq səviyyəli forumda iştirak etdiyindən məmnun qaldığını deyib. O, ölkəmizə ilk dəfə 6 il öncə səfər edib: “Çox böyük dəyişikliklər var. Altı il ərzində bu qədər irəliləyiş fantastik sıçrayışdır. Azərbaycanın güclü və ləyaqətli Prezidentinin olması sizin xalqın mükafatıdır. Forumdan çox razı qaldım. Olduqca gözəl təşkil olunub. Bilik Fondu barədə də burada məlumat aldım. Sizinlə daim əməkdaşlıq etməyə hazırıq”.
Azərbaycanda ilk dəfə olan qonaqlardan biri də serbiyalı jurnalist Jasminka Simicdir. Xanım jurnalist Bakıda gəzməyə vaxt tapmasa da, gördüklərindən heyrətlənib: “Bakının gecəsini görmək mənə nəsib oldu. Elə bil nağıla düşmüşdüm. Bundan sonra özümə söz verdim ki, şəhərinizi daha çox gəzəcəyəm. Məni Foruma dəvət edənlərə minnətdaram. İnternetdən tanıdığım ölkə ilə məni qovuşdurdular”.
J.Simicə də Bilik Fondu barədə məlumat verilib. Serbiyalı xanım jurnalist Fondla sıx əlaqələr quracağını deyib: “Düşünürəm ki, Bilik Fondu Azərbaycanı dünyaya tanıtdırmağa daha çox səy göstərməlidir. Bu işi görməkdə Serbiyadan sizə dəstək verməyə, hər hansı layihənizdə məmnuniyyətlə iştirak etməyə hazıram”.
Fizika üzrə Nobel mükafatı laureatı (2006) Corc Ficerald Smutt deyib ki, bu onun Azərbaycana üçüncü səfəridir: “Azərbaycanda gedən inkişaf göz önündədir. Forumda mövzular hər il dəyişir. Builki mövzu seçimini çox bəyəndim. Mənim üçün çox maraqlı keçdi”.
Amerikalı professor Jamaluddin Husain Azərbaycanda tolerantlıqdan xüsusi bəhs edərək bildirib ki, burada dini və milli dözümlülük yüksək səviyyədədir.
Meksikadan olan nümayəndə Miguel Angel Otero Jamayo da eyni fikirləri səsləndirib. O bildirib ki, Azərbaycanda çox sayda millətlərin yaşamasına baxmayaraq, hər birinin azad təhsil və azad ibadət hüququnun qorunması tolerantlığın göstəricisidir.
Cənubi Koreyanın KİAS İnstitutunun professoru Jaevan Kim Azərbaycanın regionun ən inkişaf etmiş ölkəsi olduğunu bildirib. Digər İslam ölkələrindən fərqli olaraq, burada tolerantlıq yüksək səviyyədədir. 2015-ci il Avropa Oyunlarının Bakıda keçirilməsi, Azərbaycanın belə ali beynəlxalq miqyaslı tədbirlərə ev sahibliyi etməsi onun inkişafından xəbər verir.
Qonaqlar forumda iştirak etməkdən məmnunluqlarını ifadə ediblər. Azərbaycanda multikulturalizmin, tolerantlığın canlı şahidləri olduqlarını deyiblər.

Paylaş:

Baxılıb: 1086 dəfə