Azərbaycan Respublikasının Prezidenti yanında Bilik Fondu “Dini abidələrdə tarixin izləri” adlı yeni layihəyə start verib

Bakı:

29 °C

54 %

9 m/s

AZ RU EN

Ana səhifə / Sosial / Azərbaycan Respublikasının Prezidenti yanında Bilik Fondu “Dini abidələrdə tarixin izləri” adlı yeni layihəyə start verib

Azərbaycan Respublikasının Prezidenti yanında Bilik Fondu “Dini abidələrdə tarixin izləri” adlı yeni layihəyə start verib

09.08.2014 [11:11]

Azərbaycan Respublikasının Prezidenti yanında Bilik Fondu layihələrə start verib.
Fondun ilk layihəsi “Dini abidələrdə tarixin izləri” adlanır. Fonddan verilən məlumatda bildirilir ki, layihə çərçivəsində Azərbaycan ərazisində yerləşən məscidlər, ziyarətgahlar, kilsələr, sinaqoqlar, məbədlər və imamzadələrdə tarixi-elmi tədqiqatlar aparılacaq, abidələr hərtərəfli öyrəniləcək, eləcə də Azərbaycan tarixi üçün faydalı məqamlar üzə çıxarılacaq, ehtiyac olduqda müəyyən bərpa işləri də görüləcək.
Layihənin həyata keçiriləcəyi ilk məkan Bərdə rayonunda yerləşən İmamzadə türbəsi olacaq. Azərbaycan ərazisində qədim abidələrdən olan və Bərdə İmamzadəsi adlanan kompleksin tarixinin dərindən öyrənilməsinə, daş kitabələrin oxunmasına, abidə üzərində bərpa işlərinin aparılmasına ehtiyac var.
Fondun informasiya təminatı sektoruna açıqlama verən Bərdə İmamzadəsinin axundu, Qafqaz Müsəlmanları İdarəsinin Qarabağ üzrə qazisi Ramazan Hüseynov lahiyənin əhəmiyyətini vurğulayıb: “Azərbaycandakı ziyarətgahlarda tarixin izləri gizlənib. Onları dəqiqliklə oxumaq, öyrənmək və gələcək nəsillərə çatdırmaq olduqca faydalı işdir. Bu layihənin həyata keçirilməsində biz tərəfdən nə köməklik lazımdırsa, hazırıq”.
Fondun “Dini abidələrdə tarixin izləri” layihəsinə Azərbaycan Milli Elmlər Akademiyasının müvafiq qurumları da cəlb olunacaq. İlk mərhələdə tarixçi alimlər, din xadimləri, Bərdə ziyalılarının iştirakı ilə “Bərdə İmamzadəsi keçmişdə və bu gün” mövzusunda “dəyirmi masa” keçiriləcək, elmi praktik konfrans təşkil olunacaq.
Layihənin əsas məqsədi Azərbaycan və Qafqazın digər bölgələrində yaşayan əhalinin maarifləndirilməsi, ziyarətgahlar barədə düzgün elmi, tarixi, dini biliklərin verilməsi, milli-dini dəyərlərimizin qorunub saxlanması və gələcək nəsillərə ötürülməsidir.
Vurğulamaq lazımdır ki, yaxın gələcəkdə Bilik Fondu müxtəlif istiqamətlərdə də layihələr həyata keçirməyi planlaşdırır. Bu layihələr içərisində “Ustad və şəyird”, “Azərbaycan elmi bu gün xaricdə”, “Dünya elmi bu gün Azərbaycanda”, “Docendo discimus”, “Fondun xarici nümayəndəliklərinin yaradılması”, “Epizodlar”, “Auditoriya +”, “Qardaşlaşmış məktəblər” yer alır.
Pərviz SADAYOĞLU

Paylaş:

Baxılıb: 1082 dəfə