Qax rayonunda tibbi müayinələr mütəşəkkil qaydada davam edir

Bakı:

10 °C

87 %

5 m/s

Əlaqə

AZ RU EN

Ana səhifə / Sosial / Qax rayonunda tibbi müayinələr mütəşəkkil qaydada davam edir

Qax rayonunda tibbi müayinələr mütəşəkkil qaydada davam edir

28.02.2014 [08:56]

Prezident İlham Əliyevin tapşırıq və tövsiyəsinə uyğun olaraq əhalinin tibbi müayinədən keçirilməsi aksiyası Qax rayonunda da mütəşəkkil qaydada davam edir.
Rayon əhalisi insanların sağlamlığının qorunmasına yönələn bu xeyirxah aksiyada fəal iştirak edirlər.
Rayon İcra Hakimiyyəti başçısının müavini Vəfa Heydərova AzərTAc-a bildirib ki, tibbi müayinələrin yüksək səviyyədə keçirilməsini təmin etmək üçün xüsusi komissiya yaradılıb, tədbirlər planı hazırlanıb. İlk növbədə müayinədən keçəcək insanların sayı müəyyənləşdirilib, cədvəl tərtib edilib. Aksiyanın keçirildiyi tibb müəssisələrində əhalinin qəbulu və müayinələrin aparılması üçün bütün lazımi şərait yaradılıb. Tibbi müayinələrdə rayon üzrə 18 yaşdan yuxarı 39 minə yaxın insanın iştirakı nəzərdə tutulur.
Bildirilib ki, fevralın 17-dən bu günədək 7 min nəfərə yaxın insan tibbi müayinədən keçib. Rayon əhalisi dövlətimizin başçısının bu xeyirxah təşəbbüsünü ürəkdən alqışlayır, tibb ocaqlarında yaradılan şəraitdən, həkim və tibb işçilərinin isti münasibətindən, onlara göstərilən qayğıdan razı qaldıqlarını bildirirlər.
Tibbi müayinələrin keçirildiyi rayon mərkəzi xəstəxanası 2010-cu ildə əsaslı təmir olunub, bütün şöbələr ən müasir tibbi avadanlıq və aparatlarla təchiz edilib.
Xəstəxananın baş həkimi Tərlan Əhmədzadə bildirib ki, tibbi müayinələr xəstəxananın poliklinika şöbəsi ilə yanaşı, Əlibəyli və Tasmalı kənd sahə xəstəxanalarında, həmçinin kəndlərdə fəaliyyət göstərən həkim məntəqələrində keçirilir. Müayinələrə təcrübəli, yüksək ixtisaslı mütəxəssislərdən ibarət həkim briqadaları cəlb edilib. Briqadaların tərkibinə terapevt, mama-ginekoloq, endokrinoloq, nevropatoloq, oftalmoloq, uroloq, kardioloq, cərrah və digər ixtisaslar üzrə peşəkar həkimlər daxil ediliblər. Həkim briqadaları bu məsul kampaniyaya çox ciddi hazırlaşıblar. Ultrasəs müayinəsi, elektrokardioqrafiya, rentgen-flüoqrafiya, laborator analizləri və digər müayinə kabinetlərində quraşdırılmış avadanlıq və aparatlar gün ərzində müayinəyə gələnlərə pulsuz xidmət göstərir.
Baş həkimin dediyinə görə, insanlar daha çox böyrək, ürək-damar, qan təzyiqi, onurğa sütununun fəqərə arası disk yırtığı və revmatik xəstəliklərdən əziyyət çəkdiklərini bildirirlər. Xəstəlik aşkar edilən vətəndaşlar müalicəyə cəlb olunurlar.
Bütün ölkə vətəndaşları kimi, Qax rayonunun əhalisi də tibbi müayinələrin keçirilməsini çox yüksək dəyərləndirir, bu xeyirxah təşəbbüsə görə Prezident İlham Əliyevə bir daha minnətdarlıqlarını bildirirlər.

Paylaş:

Baxılıb: 1051 dəfə