Hər köç yeni bir başlanğıcdır!

Bakı:

19 °C

68 %

3 m/s

Əlaqə

AZ RU EN

Ana səhifə / Sosial / Hər köç yeni bir başlanğıcdır!

Hər köç yeni bir başlanğıcdır!

08.07.2026 [08:54]

Böyük Qayıdış Zəfərin izlərini həyata çevirir...

Bir zamanlar həsrətin, ayrılığın və məcburi köçkünlük ağrısının simvoluna çevrilən işğaldan azad edilmiş ərazilərimizin yolları artıq sevinc, qürur və doğma torpaqlara qayıdışın ünvanına çevrilib. Demək olar ki, hər gün yola salınan köç karvanları illərlə öz doğma yurduna dönəcəyi günü səbrlə gözləyən ailələrin həyatında yeni bir səhifə açır, Azərbaycanın işğaldan azad olunmuş ərazilərində həyatın yenidən canlandığını bütün dünyaya nümayiş etdirir.

Hər yeni köç karvanı sadəcə insanların bir yaşayış məntəqəsindən digərinə köçürülməsi deyil, eyni zamanda dağıdılmış şəhər və kəndlərin yenidən nəfəs almasının, uzun illər susqun qalan küçələrin uşaq səsləri ilə dolmasının, boş qalan evlərin yenidən işıqlanmasının canlı nümunəsidir. Demək olar hər gün yola salınan köç karvanları göstərir ki, Böyük Qayıdış prosesi ardıcıl şəkildə davam edir. Azad edilmiş torpaqlarda həyatın bərpası sürətlə genişlənir, çünki hər qayıdan ailə özü ilə birlikdə yalnız şəxsi əşyalarını deyil, həm də doğma yurda olan sevgisini, gələcəyə inamını, zəhmətini və yeni həyat qurmaq əzmini aparır.

41 ailə yola salındı

İyulun 6-da Cəbrayıl rayonunun Şükürbəyli kəndinə köç karvanı yola salınıb. Şükürbəyli kəndində 223 nəfərdən ibarət 46 ailəyə mənzillərin açarları təqdim edilib. Ötən gün isə Xocavəndə növbəti köç karvanı yola salınıb. Bu mərhələdə Xocavənd şəhərinə 41 ailə olmaqla, 163 nəfər köçürülüb. Onlar respublikanın müxtəlif ərazilərində yataqxana, sanatoriya, düşərgə, yarımçıq tikililər və inzibati binalarda müvəqqəti məskunlaşmış ailələrdir.

Yeni köçən ailələr qarşılandıqdan sonra onlara ANAMA-nın əməkdaşları tərəfindən mina və partlamamış hərbi sursatların yaratdığı təhlükələr barədə ətraflı məlumat verilib. Ailələrə tanımadıqları naməlum əşya və cisimlərdən uzaq durmaları, belə hallarla qarşılaşdıqları təqdirdə isə aidiyyəti qurumlara məlumat vermələri tövsiyə olunub. Açarların təqdim olunması mərasimində Ağdam, Füzuli və Xocavənd rayonlarında Azərbaycan Respublikası Prezidentinin xüsusi nümayəndəliyinin, Qaçqınların və Məcburi Köçkünlərin İşləri üzrə Dövlət Komitəsinin əməkdaşları və digər rəsmi şəxslər iştirak ediblər. Ailələr açarları sevinclə qəbul edərək, evlərində məskunlaşıblar.

Doğma yurdlarına qayıdan keçmiş məcburi köçkünlər onlara göstərilən dövlət qayğısından böyük məmnunluq duyaraq, yaradılan müasir yaşayış şəraitinə görə ölkə rəhbərliyinə minnətdarlıqlarını ifadə ediblər. Sakinlər bu tarixi Qələbəni bizə bəxş edən, torpaqlarımızı işğaldan canı bahasına azad edən qəhrəman şəhidlərimizin əziz xatirəsini ehtiramla anıb, onlara Allahdan rəhmət diləyiblər. Eyni zamanda, döyüşlərdə şücaət göstərən qazilərimizə uzun ömür və cansağlığı arzulayan sakinlər, azad edilmiş ərazilərdəki dirçəlişin məhz bu fədakarlıq sayəsində mümkün olduğunu vurğulayıblar. Bildirilib ki, bu gün başlayan yeni həyat həm də şəhid və qazilərimizin bizə əmanət etdiyi Zəfərin bəhrəsidir.

Quruculuq işləri yalnız binaların tikintisi ilə məhdudlaşmır

İllərlə işğalın ağır izlərini daşıyan Xocavənd rayonu bu gün tamamilə fərqli bir dövrünü yaşayır. Burada həyata keçirilən genişmiqyaslı bərpa və yenidənqurma işləri nəticəsində dağıntılar tədricən inkişafla əvəz olunur, müasir infrastruktur yaradılır, yeni yaşayış məntəqələri formalaşdırılır. Doğma torpaqlarına qayıdan insanların rahat, təhlükəsiz və firavan həyat sürməsi üçün hərtərəfli şərait qurulur. Rayon ərazisində avtomobil yollarının yenidən inşa edilməsi, elektrik, içməli su, qaz və rabitə xətlərinin müasir tələblərə uyğun şəkildə çəkilməsi, sosial və kommunal infrastrukturun qurulması, eləcə də yaşayış məntəqələrinin bərpası Xocavəndin iqtisadi və sosial inkişafına yeni təkan verməklə yanaşı, bu torpaqlarda həyatın davamlı şəkildə bərpa olunduğunu da nümayiş etdirir.

Xocavənddə həyata keçirilən quruculuq işləri yalnız binaların və yolların tikintisi ilə məhdudlaşmır. Eyni zamanda gələcək nəsillərin keyfiyyətli təhsil alacağı məktəblərin, müasir tibbi xidmət göstərəcək səhiyyə müəssisələrinin, mədəniyyət və ictimai xidmət obyektlərinin yaradılması istiqamətində görülən işlər bölgənin uzunmüddətli inkişaf strategiyasının mühüm tərkib hissəsini təşkil edir.

Bu gün rayonda aparılan hər bir tikinti işi, salınan hər yeni yol, çəkilən hər yeni kommunikasiya xətti və yaradılan hər yeni yaşayış məkanı illərdir doğma yurd həsrəti ilə yaşayan insanların öz torpaqlarına inamla qayıtmasına xidmət edir. Çünki Böyük Qayıdış prosesi təkcə insanların evlərinə dönməsi deyil, həm də şəhər və kəndlərin əvvəlkindən daha müasir, daha dayanıqlı və daha inkişaf etmiş şəkildə yenidən qurulması deməkdir.

Xocavənddə davam edən bərpa və yenidənqurma işləri göstərir ki, bu qədim Azərbaycan torpağında həyat yenidən öz axarına qayıdır, əmək, quruculuq və inkişaf ruhu hər keçən gün daha da güclənir. Burada atılan hər addım gələcək nəsillərin firavan yaşayacağı, insanların rahatlıq və əmin-amanlıq içində həyat sürəcəyi güclü və davamlı bir gələcəyin formalaşmasına xidmət edir.

Yeganə BAYRAMOVA

Paylaş:

Baxılıb: 456 dəfə