Heydər Əliyev Fondunun təşəbbüsü ilə Xaçmaz rayonunun Palıdlı kəndində inşa edilmiş orta məktəb binası istifadəyə verilib

Bakı:

25 °C

78 %

8 m/s

AZ RU EN

Ana səhifə / Sosial / Heydər Əliyev Fondunun təşəbbüsü ilə Xaçmaz rayonunun Palıdlı kəndində inşa edilmiş orta məktəb binası istifadəyə verilib

Heydər Əliyev Fondunun təşəbbüsü ilə Xaçmaz rayonunun Palıdlı kəndində inşa edilmiş orta məktəb binası istifadəyə verilib

24.12.2013 [09:18]

Dekabrın 23-də Heydər Əliyev Fondunun təşəbbüsü ilə Xaçmaz rayonunun Palıdlı kəndində inşa edilmiş orta məktəb binası istifadəyə verilib.
AzərTAc xəbər verir ki, Heydər Əliyev Fondunun nümayəndələrinin, rayon ictimaiyyətinin təmsilçilərinin və kənd sakinlərinin iştirak etdikləri açılış mərasimində əvvəlcə Azərbaycanın dövlət himni səsləndirilib.
Heydər Əliyev Fondunun nümayəndəsi Elmir Bağırov iştirakçılara Azərbaycanın birinci xanımı, Fondun prezidenti Mehriban Əliyevanın salamlarını çatdırıb, dövlətimizin təhsilə göstərdiyi qayğıdan söhbət açıb. Bildirib ki, Heydər Əliyev Fondunun təşəbbüsü ilə Azərbaycanda və onun hüdudlarından kənarda indiyədək 350-dən artıq məktəb binası inşa edilib istifadəyə verilib. O, Heydər Əliyev Fondunun şagirdlərə verdiyi bu gözəl töhfədən yararlanaraq yaxşı oxumağı, Vətənə layiqli vətəndaş kimi yetişməyi tövsiyə edib.
Mərasimdə digər çıxış edənlər də əlamətdar hadisə münasibətilə müəllim və şagirdləri, valideynləri təbrik edib, məktəb binasının istifadəyə verilməsini Azərbaycan dövlətinin təhsilin inkişafına göstərdiyi qayğının bariz nümunəsi kimi dəyərləndiriblər. Natiqlər bu sevinci onlara bəxş edən Heydər Əliyev Fondunun prezidenti Mehriban xanım Əliyevaya dərin minnətdarlıqlarını bildiriblər.
Qeyd olunub ki, son illər ölkənin hər bir guşəsində olduğu kimi, Xaçmaz rayonunda da məktəb tikintisi geniş vüsət alıb. Son 10 ildə rayonda 32 yeni məktəb binası istifadəyə verilib. Hazırda daha 5 məktəb binasının tikinti işləri aparılır.
Binanın açılışını bildirən rəmzi lent kəsildikdən sonra iştirakçılar məktəbdə yaradılmış şəraitlə tanış olublar. İkimərtəbəli təhsil ocağında kompyuter otağı, fənn kabinələri, kimya, fizika və biologiya laboratoriyaları, emalatxana, tikiş və dərzi otaqları, bufet, akt zalı, idman zalı, kitabxana yaradılıb, məktəb ən müasir avadanlıqla təmin olunub. Binanı istilik və elektrik enerjisi ilə təmin etmək üçün burada qazanxana və transformator yarımstansiyası qurulub.
Binada su, kanalizasiya sistemləri qurulub, həyətində futbol meydançası yaradılıb. Buradakı bütün tədris avadanlığı da məktəbə Heydər Əliyev Fondu tərəfindən hədiyyə olunub.
Yeni məktəbdə Palıdlı kəndi ilə yanaşı, ətrafda yerləşən daha 5 kəndin şagirdləri də təhsil alacaqlar. Həmin yaşayış məntəqələrindən şagirdlərin məktəbə rahat gəlmələrini təmin etmək məqsədi ilə Heydər Əliyev Fondunun təşəbbüsü ilə məktəbə mikroavtobus verilib.
Məktəbin açılışından sonra tədbir iştirakçıları Palıdlı kəndində yerli sakinlər üçün tikilmiş 26 yeni yaşayış evinə də baxış keçiriblər.

Paylaş:

Baxılıb: 1498 dəfə