Sülh əlçatandır!

Bakı:

22 °C

60 %

3 m/s

Əlaqə

AZ RU EN

Ana səhifə / Siyasət / Sülh əlçatandır!

Sülh əlçatandır!

03.10.2023 [11:15]

MÜBARİZ

Cənubi Qafqaz regionu son üç onilllik ərzində təhdidlər və müharibə riskləri şəraitində yaşayıb. Bunun da əsas səbəbi Ermənistanın həyata keçirdiyi işğalçılıq siyasəti olub. Azərbaycan isə istər 44 günlük müharibəyədək olan mərhələdə, istərsə də postmüharibə dövründə həmişə sülh təşəbbüslərindən çıxış edib. Prezident İlham Əliyev sentyabrın 29-da BMT-nin Məskunlaşma Proqramının (UN-HABITAT) və Azərbaycan Respublikasının Dövlət Şəhərsalma və Arxitektura Komitəsinin əməkdaşlığı ilə keçirilən “Şəhərsalma Həftəsi 2023” tədbirləri çərçivəsində Zəngilanda “Davamlı şəhərlər iqtisadi inkişafın hərəkətverici və bərabərsizliklərlə mübarizə aparan qüvvəsi kimi” mövzusunda 2-ci Azərbaycan Milli Şəhərsalma Forumunun açılış mərasimindəki çıxışında ölkəmizin sülh istəyinə növbəti dəfə diqqət çəkib.

İki fərqli nümunə

Qalib Azərbaycanla məğlub Ermənistanın sülhə yanaşması həmişə daban-dabana ziddiyyət təşkil edib. Prezident İlham Əliyev Forumun açılış mərasimindəki çıxışında 44 günlük müharibə başlayanadək Ermənistanın nümayiş etdirdiyi davranışları xatırladıb. Özünü cəzasızlıq mühitində hiss edən Ermənistan ayrı-ayrı beynəlxalq təşkilatların ikili standartlardan çıxış etməsindən ruhlanaraq işğal məhsulu olan keçmiş status-kvonu sonsuzluğadək uzatmaq istəyir və BMT TŞ-nin 4 qətnaməsini yerinə yetirməyə tələsmirdi.

İşğalçı Ermənistandan fərqli olaraq torpaq itkilərinə məruz qalan respublikamız müharibəyə qədərki mərhələdə aparılan sülh danışıqlarında daim konstruktivlik ortaya qoyub. Azərbaycan postmüharibə dövründə də özünün sülh gündəliyinə sadiq qalmaqdadır. Əslində qalib Azərbaycanın müharibə başa çatandan sonra regionda sülhün və təhlükəsizliyin təmin olunması üçün nümayiş etdirdiyi davranışların dünya tarixində analoqu yoxdur. Döyüş meydanında düşməni diz çökdürən, onu kapitulyasiya sənədini imzalamağa məcbur edən respublikamız qarşısına bundan hansısa imtiyazlar qazanmaq məqsədi qoymayıb. Respublikamızın müharibə başa çatandan dərhal sonra hazırlayaraq qarşı tərəfə təqdim etdiyi beş bəndlik sülh paketində sırf beynəlxalq prinsiplər əsas götürülüb. Ölkəmizin sülh istəyinə diqqət çəkən Prezident İlham Əliyev vurğulayıb: “Azərbaycanda biz sülh istəyirik. Zəngilanda bu gün gördükləriniz onu sübut edir ki, biz sülh istəyirik, biz bu əraziləri bərpa etmək istəyirik, soydaşlarımızı vətəninə qaytarmaq istəyirik. Biz Qafqazda sülh və sabitlik istəyirik. Bu, mümkündür və seçim Ermənistanındır”.

Sülh əlçatandır

Azərbaycanın 44 günlük müharibənin və 23 saatlıq antiterror tədbirlərinin nəticəsində yaratdığı reallıqlar Cənubi Qafqaz coğrafiyasında sülhün və təhlükəsizliyin təmin olunması üçün ideal imkanlar yaradıb. İndiyədək sülh üçün əsas mane olan Qarabağdakı silahlı qüvvələr və separatçı rejim artıq ram edilib. Onlar ağ bayraq qaldırıblar. Separatçı rejim özünü buraxıb. Hazırda silahların tərkisilah edilməsi prosesi gedir. Beləliklə də, region sülhə heç vaxt olmadığı qədər yaxınlaşıb. “Biz 20 sentyabrda Qarabağdakı Ermənistan ordusuna bəyan etdik: silahlarınızı yerə qoyun və oraları tərk edin. Belə də oldu və bu, baş verdi. Yəni, biz sözümüzə, vədimizə əməl edirik, ona sadiqik. Əminəm ki, Ermənistan hökuməti bu hadisələri düzgün şəkildə təhlil etsə, “Qarabağ Ermənistandır!” bəyanatından sonra - 2019-cu ildə verilən bəyanatdan sonra 20 sentyabradək baş verənləri düzgün təhlil etsə, sülh əlçatandır. Bu, gələcəklə bağlı bizim baxışımızdır. Bu, regionun gələcəyi ilə bağlı baxışımızdır və hesab edirəm, beynəlxalq aktorlar və qonşular görəcəklər ki, bizim münasibətimiz konstruktivdir”, - deyə Prezident İlham Əliyev vurğulayıb.

Paylaş:

Baxılıb: 579 dəfə