Müsavat Partiyası yeni parçalanmanın astanasında

Bakı:

25 °C

61 %

5 m/s

Əlaqə

AZ RU EN

Ana səhifə / Siyasət / Müsavat Partiyası yeni parçalanmanın astanasında

Müsavat Partiyası yeni parçalanmanın astanasında

12.01.2012 [15:58]

Qruplaşma savaşına yenidən start verildi
Radikal müxalifət düşərgəsi yenidən şəxsi maraqların toqquşma meydanına çevrilib. Bir müddət öncə bir neçə partiya funksionerinin istefasından sonra Müsavat partiyasındakı sükut yenidən pozulub. Partiya sədri İsa Qəmbərin istefası və mart ayında keçiriləcək qurultay gündəmə gəlməklə yenidən qruplaşma davası alovlanır. Qeyd edək ki, partiya daxilindəki bu çəkişmələr həm də digər düşərgə təmsilçiləri tərəfindən qızışdırılır. Bu mənada bir sıra məqamlara açıqlıq gətirmək üçün gedən prosesləri ardıcıllıqla təhlil etmək lazımdır.
2010-cu il parlament seçkilərindən sonra Müsavat partiyasının bir neçə üzvünün-Sülhəddin Əkbərin, İbrahim İbrahimlinin, Qabil Hüseynlinin, Adil Qeybullanın istefası bu gün artıq közərməyə başlayan yeni savaşın qarşısını müvəqqəti almışdı. Həmin dövrdə öz istefasını guya müxalifətdaxili inteqrasiyanın reallaşmaması ilə əlaqələndirən S.Əkbər açıq şəkildə AXCP-nin maraqlarını qorumağa çalışırdı. Bəlkə də, AXCP-dən gələcəkdə məhz sədrlik məsələsində təminat aldığı üçün S.Əkbər özünü bu cür təqdim edirdi. Bəlli olan odur ki, hər zaman S.Əkbər və Vurğun Əyyub qruplaşmasına qarşı olan Arif Hacılı-Rauf Arifoğlu qruplaşması İ.Qəmbərin buna razılaşmasına imkan verməzdi. Və həmin dövrdə istefalar artıq bir-birilərinə qarşı açıq təhqir döyüşünə keçən tərəflərin sükuta üstünlük verməsinə şərait yaratdı...
Amma bu sükut yenidən pozulur. Qeyd edək ki, S.Əkbərin partiyadan çıxmasından sonra həmin qruplaşmanın əsas simasına çevrilən V.Əyyub məğlubiyyətlə barışaraq partiya işlərindən kənarlaşmışdı. İ.Qəmbərin martda sədrlikdən gedəcəyi məsələsi gündəmə gəldikdən sonra isə V.Əyyub yenidən fəaliyyətini diriltməyə çalışır. Uzun müddət idi ki, özünü KİV-dən uzaq saxlamağa çalışan V.Əyyub həbsdə olan Arif Hacılının sədrliyə namizədlik məsələsinə münasibət bildirib. O, deyib ki, Müsavata başqa bir tip və xarakterdə olan şəxs rəhbərlik etməlidir. Onun Arif Hacılıya bu mənada eyham vurmasının arxasında isə bəzi məqamlar dayanır. Qeyd edək ki, V.Əyyub A.Hacılını hər hansı bir səsvermədə rahat şəkildə üstələyə biləcəyinə arxayın kimi danışır. Digər tərəfdən, isə onun birdən-birə sədrliyə namizəd olmaq fikrinə düşməsi özü də maraqlıdır. Demək ki, V.Əyyub A.Hacılıya və ya həmin komandadan hər hansı başqa bir şəxsin rahat şəkildə sədr kürsüsünə əyləşməsinə imkan vermək istəmir. Hətta özünün namizəd olmayacağı təqdirdə isə “tərəfdarlarını” başqa bir namizədə səs verməyə çağıracağını da bildirir. Bu isə hər bir mənada qarşı komandadan olan namizədin seçilməsinə mane olmaq üçün bütün vasitələrdən istifadə olunacağına işarədir.
Təbii ki, A.Hacılı-Rauf Arifoğlu qruplaşması da yeni savaşa start verilməsindən xəbərdardır. Qeyd edək ki, R.Arifoğlu, əslində heç bir zaman sədrlik məsələsində A.Hacılıya güzəştə getməzdi. Amma bir problem mövcuddur ki, bu da onun Müsavat partiyasına sədrlik etməsinə imkan vermir. Xatırlamaq yerinə düşər ki, R.Arifoğlu Müsavat partiyasına özünün həmtəsisçisi olduğu “Yeni Müsavat” partiyası ilə gəlib və ötən illər ərzində müsavatçılar onu hələ də tam müsavatçı kimi qəbul etmirlər. Yəni, onun partiya daxilində heç vaxt qəbul olunmaması sədr olmasına əngəl yaradır. Bu səbəbdən də hazırda o, A.Hacılıya dəstək vermiş kimi görüntü yaratmaq məcburiyyətindədir.
Bütün bu proseslərin fonunda isə İ.Qəmbərin sükuta qərq olması artıq uzun müddətdir ki, Müsavat sədrinin proseslərə təsir imkanını itirməsindən xəbər verir. Hələ bir-iki il öncə partiyasında istefaların tüğyan etdiyi dövrdə onun qruplaşmaların əlində aciz qaldığı və öz təsir imkanlarını itirməsi bəlli olmuşdu. İndiki halda isə qruplaşmalar arasındakı qalmaqalın yenidən alovlanması, sadəcə Müsavatın qurultayından qabaq yeni bir parçalanma təhlükəsinin də yaranmasından xəbər verir. Əslində, bu parçalanma qurultaydan sonra qaçılmazdır. Yəni, hər hansı qruplaşmanın qalibiyyəti nəticəsində məğlub tərəf həmin komandayla işləmək istəməyəcək. Belə olan halda isə həmin qrupun partiyanı tərk etməsi labüddür...
Pərviz SADAYOÄžLU

Paylaş:

Baxılıb: 952 dəfə