Yeni Azərbaycan Partiyası ilə Tacikistan Xalq Demokrat Partiyası arasında Əməkdaşlıq haqqında Anlaşma Memorandumu imzalanıb

Bakı:

23 °C

44 %

2 m/s

AZ RU EN

Ana səhifə / Siyasət / Yeni Azərbaycan Partiyası ilə Tacikistan Xalq Demokrat Partiyası arasında Əməkdaşlıq haqqında Anlaşma Memorandumu imzalanıb

Yeni Azərbaycan Partiyası ilə Tacikistan Xalq Demokrat Partiyası arasında Əməkdaşlıq haqqında Anlaşma Memorandumu imzalanıb

24.12.2011 [21:20]

Dünən Yeni Azərbaycan Partiyası (YAP) ilə Tacikistan Xalq Demokrat Partiyası arasında Əməkdaşlıq haqqında Anlaşma Memorandumu imzalanıb. Memorandumu Yeni Azərbaycan Partiyası Sədrinin müavini-İcra katibi, millət vəkili Əli Əhmədov və Tacikistan Xalq Demokrat Partiyasının Sədr müavini Asror Latipov imzalayıblar. Mərasimdən əvvəl keçirilən görüşdə Əli Əhmədov Tacikistan nümayəndə heyətinin Bakıda “Modernləşmə siyasəti: yeni iqtisadi və sosial çağırışlar” mövzusunda keçirilmiş beynəlxalq konfransda iştirakından məmnunluğunu bildirib. Onun fikrincə, konfransda aparılan müzakirələr qlobal çağırışlara cavab vermək baxımından əhəmiyyətlidir. Əli Əhmədov bildirib ki, Tacikistan Xalq Demokrat Partiyasının təmsilçilərinin ölkəmizə səfəri və partiyalar arasında Anlaşma Memorandumunun imzalanması əməkdaşlığımızın gələcək inkişafı baxımından əhəmiyyətlidir.
Əli Əhmədov deyib ki, Azərbaycan ilə Tacikistan arasında əlaqələrin qədim tarixi var. Onun sözlərinə görə, hər iki ölkə özünün dövlət müstəqilliyini bərpa etdikdən sonra münasibətlərimiz yeni müstəvidə yüksələn xətlə inkişaf edib: “Dövlətlərimizin başçıları arasındakı yüksək səviyyəli siyasi dialoq, dostluq münasibətləri, eləcə də, ölkələrimiz arasında imzalanmış çoxsaylı sənədlər əməkdaşlığımız üçün geniş imkanlar açır, möhkəm hüquqi baza yaradır. Əlaqələrimizin siyasi partiyalar arasında da genişlənməsi dövlətlərimizin və xalqlarımızın münasibətlərinin daha da möhkəmlənməsinə xidmət edəcək”.
Əli Əhmədov YAP-ın yaranma tarixi, Azərbaycanın ictimai-siyasi həyatındakı rolu, beynəlxalq əlaqələri barədə qonaqlara ətraflı məlumat verib. O, 550 min nəfərdən çox üzvü olan Yeni Azərbaycan Partiyasının Avropanın və Asiyanın nüfuzlu partiyaları ilə geniş əlaqələrə malik olduğunu deyib: “İndi biz Asiya Siyasi Partiyaları Beynəlxalq Konfransının Daimi Komitəsində təmsil olunuruq. Gələn il bu təşkilatın 7-ci Baş Assambleyasının Bakıda keçirilməsi nəzərdə tutulub”.
Əli Əhmədov bunu ölkəmizin və Yeni Azərbaycan Partiyasının nüfuzu ilə əlaqələndirib.
Tacikistan Xalq Demokrat Partiyası sədrinin müavini Asror Latipov isə bildirib ki, Azərbaycanın inkişafı və uğurları göz qabağındadır: “Biz regionun ən inkişaf etmiş ölkəsi olan Azərbaycan və onun hakim partiyası ilə əlaqələrin inkişafında maraqlıyıq. Düşünürəm ki, “Modernləşmə siyasəti: yeni iqtisadi və sosial çağırışlar” mövzusunda beynəlxalq konfransın yüksək səviyyədə təşkili Azərbaycanın sürətli inkişafının və modernləşməyə verdiyi əhəmiyyətin göstəricisidir. Xüsusilə də qeyd etməliyəm ki, hər dəfə aktuallığı ilə seçilən yeni mövzuların müzakirəyə çıxarılması olduqca müsbət haldır. Hakim Yeni Azərbaycan Partiyası ilə Tacikistan Xalq Demokrat Partiyası arasında imzaladığımız Memorandum xalqlarımızın dostluq münasibətlərinin daha da dərinləşməsinə və inkişafına xidmət edəcək”.
“Düşünürük ki, Yeni Azərbaycan Partiyası ilə Tacikistan Xalq Demokrat Partiyası arasında imzalanmış Memorandum xalqlarımız arasında dostluq münasibətlərinin daha da dərinləşməsinə və inkişafına xidmət edəcəkdir”, - deyə qonaq qeyd edib. Asror Latipov təmsil etdiyi partiyanın fəaliyyəti ilə bağlı ətraflı məlumat verib.
Görüşdə Azərbaycan ilə Tacikistan arasında ikitərəfli, eləcə də, MDB çərçivəsində münasibətlər, siyasi partiyaların nümayəndə heyətlərinin qarşılıqlı səfərlərinin təşkili, siyasi və iqtisadi sahədə, xüsusən, modernləşmə ilə bağlı təcrübə mübadiləsi barədə geniş fikir mübadiləsi aparılıb.
Görüşün sonunda Asror Latipov YAP Sədrinin müavini Əli Əhmədova suvenir, Əli Əhmədov isə Tacikistandan gəlmiş qonağa müasir ölkəmizi özündə əks etdirən “Azərbaycan” kitabını hədiyyə edib.
Nardar BAYRAMLI

Paylaş:

Baxılıb: 1026 dəfə