Rumıniya Azərbaycanın ərazi bütövlüyünü birmənalı olaraq dəstəkləyir

Bakı:

27 °C

52 %

1 m/s

Əlaqə

AZ RU EN

Ana səhifə / Siyasət / Rumıniya Azərbaycanın ərazi bütövlüyünü birmənalı olaraq dəstəkləyir

Rumıniya Azərbaycanın ərazi bütövlüyünü birmənalı olaraq dəstəkləyir

12.07.2011 [07:20]

Yeni Azərbaycan Partiyasının (YAP) dəvəti ilə Rumıniyanın hakim Demokrat Liberal Partiyasının (PDL) nümayəndə heyəti Azərbaycana səfərə gəlib. Nümayəndə heyəti dünən Fəxri xiyabanda ümummilli liderimiz, müstəqil Azərbaycan dövlətinin memarı və qurucusu Heydər Əliyevin xatirəsini ehtiramla yad edib, məzarı önünə tər gül dəstələri qoyub. Sonra Şəhidlər xiyabanına gələn qonaqlar Azərbaycanın müstəqilliyi və ərazi bütövlüyü uğrunda mübarizədə canlarından keçmiş qəhrəman Vətən övladlarının əziz xatirəsini ehtiramla yad edib, məzarları üzərinə tər çiçəklər düzüblər. Qonaqlara Azərbaycanın qədim və müasir inkişaf tarixi, ölkəmizdə aparılan quruculuq işləri barədə geniş məlumat verilib.
Bu barədə jurnalistlərə açıqlama verən YAP İcra katibinin müavini, millət vəkili Mübariz Qurbanlı deyib ki, Rumıniyanın tanınmış elm, mədəniyyət, incəsənət xadimləri, yazıçıları, şairləri, akademikləri və siyasətçilərindən ibarət nümayəndə heyətinin səfərinin məqsədi iki ölkə arasında bütün sahələr üzrə əməkdaşlığın genişləndirilməsinə dair fikir mübadiləsi aparmaqdır: “Rumıniyadan dəvət olunan qonaqların proqramı olduqca zəngindir. Belə ki, səfər çərçivəsində qonaqlar Bakıda bir sıra görüşlər keçirəcəklər. Qonaqlarımız, eyni zamanda, Qubaya səfər edərək, oradakı soyqırımı məzarlığını ziyarət edəcəklər”.
Nümayəndə heyətinə Buxarest şəhərinin II sektorunun meri Nekulay Ontsanunun rəhbərlik etdiyini deyən Mübariz Qurbanlı daha sonra aşağıdakıları bildirib: “Bilirsiniz ki, Buxarest şəhərində Ulu öndər Heydər Əliyevin abidəsi qoyulub və Onun adına park salınıb. Həmin parkın salındığı ərazi, məhz, Nekulay Ontsanunun rəhbəri olduğu ərazidir. Onu da deyim ki, Nekulay Ontsanu artıq üçüncü dəfədir ki, rəsmi səfərlə Azərbaycana gəlir. Bundan əvvəl Heydər Əliyev Fondunun dəvəti ilə rumıniyalı qonaqlar 2006-cı və 2009-cu illərdə ölkəmizdə səfərdə olublar. Bu dəfə isə onlar YAP-ın dəvəti ilə Bakıya gəliblər”.
Yeni Azərbaycan Partiyası ilə Rumıniyanın hakimiyyətdə olan Demokrat Liberal Partiyası (PDL) arasında “Əməkdaşlıq haqqında Anlaşma Memorandumu”nun imzalandığını bildirən Mübariz Qurbanlı “Bütövlükdə YAP-ın beynəlxalq əlaqələri genişlənir və bu istiqamətdə biz ayrı-ayrı ölkələrin ictimai-siyasi təşkilatları ilə, o cümlədən, Rumıniyanın siyasi partiyaları ilə əlaqələrimizi gücləndirməkdəyik”, - sözlərini də əlavə edib.
Nümayəndə heyətinin rəhbəri, Buxarest şəhərinin II sektorunun meri, Rumıniya Bələdiyyələr Assosiasiyasının sədr müavini Nekulay Ontsanu isə jurnalistlərə açıqlamasında deyib ki, bu onun Azərbaycana üçüncü səfəridir: “Səfər zamanı bizim YAP-ın mərkəzi qərargahında cənab Əli Əhmədovla görüşümüz olacaq. Eyni zamanda, Milli Məclisdə, AMEA-da, AYB-də və digər qurumlarda görüşlər keçirəcəyik. Həmin görüşlərdə biz ölkələrimiz arasında bütün sahələrdə mümkün əməkdaşlıq perspektivləri barədə müzakirələr aparacağıq. Bildirmək istəyirəm ki, Azərbaycan bizim üçün dost, qardaş ölkədir. Hazırda Azərbaycanda gedən inkişaf bizi çox sevindirir. Bir az öncə Azərbaycan xalqının ümummilli lideri Heydər Əliyevin məzarını ziyarət etdik. Ulu öndər Heydər Əliyev yeni, müstəqil Azərbaycanın əsasını qoyub. Heydər Əliyevin həyata keçirdiyi siyasi kursu hazırda Prezident İlham Əliyev böyük uğurla davam etdirir”.
Jurnalistlərə açıqlamasında, həmçinin, “Bir şeyi də xüsusi olaraq vurğulamaq istəyirəm ki, bu gün Avropada maliyyə böhranı davam etdiyi halda Azərbaycan inkişaf yolunda uğurla addımlayır. Bu da bizi bir dost olaraq çox sevindirir” deyən Nekulay Ontsanu Bakıda 2006-cı və 2009-cu illərdə gördükləri ilə indi gördükləri arasında böyük fərqin olduğunu, paytaxtda həyata keçirilən irimiqyaslı layihələrdən heyrətə gəldiyini vurğulayıb: “Bizə xoş təsir bağışlayan bir də odur ki, Bakı həm qədimliyi, həm də müasirliyi özündə birləşdirir. Bu da ilk baxışdan çox gözəl təəssürat doğurur”.
Ermənistan-Azərbaycan, Dağlıq Qarabağ münaqişəsi barədə də danışan qonaq “Rumıniya Azərbaycanın dostu və müttəfiqidir. Rumıniya Azərbaycanın ərazi bütövlüyünü birmənalı olaraq dəstəkləyir və Dağlıq Qarabağı Azərbaycanın ərazisi olaraq tanıyır. Bu günə kimi Rumıniya dövləti, prezidentləri hər yerdə, istənilən beynəlxalq təşkilatda Azərbaycanı dəstəkləyib. Cənab Prezident İlham Əliyevin Buxarestə səfəri zamanı Rumıniyanın Prezidenti Trayan Besesku bir daha bəyan etdi ki, Rumıniya Azərbaycanın ərazi bütövlüyünü və rəsmi Bakının Ermənistan-Azərbaycan, Dağlıq Qarabağ münaqişəsinin həlli istiqamətindəki mövqeyini birmənalı şəkildə dəstəkləyir. Əmin ola bilərsiniz ki, biz həm Azərbaycan xalqının, həm də Azərbaycan dövlətinin sadiq dostlarıyıq” deyib.
Nadir AZƏRİ

Paylaş:

Baxılıb: 1100 dəfə