Xalq seçdiyi liderə sadiqdir

Bakı:

17 °C

82 %

5 m/s

Əlaqə

AZ RU EN

Ana səhifə / Siyasət / Xalq seçdiyi liderə sadiqdir

Xalq seçdiyi liderə sadiqdir

14.04.2023 [10:00]

Prezident Ərdoğanın uğurlu fəaliyyəti zəlzələ üzərindən təbliğat qurmaq cəhdlərini də boşa çıxardı

Türkiyədə mayın 14-də keçiriləcək prezident seçkilərində istifadə olunacaq seçki bülleteni YSK tərəfindən təsdiqlənib. YSK-nın AK Partiyalı nümayəndəsi Rəcəb Özəl prezident seçkilərində istifadə olunacaq bülletenlərin çapına başlanıldığını açıqlayıb. Sosial media hesabından paylaşım edən Özəl “YSK üzvlərimiz və siyasi partiya nümayəndələrimizlə birlikdə prezident seçkilərində istifadə olunacaq seçki bülletenlərinin çap olunduğu məkanda çap prosesində iştirak etdik”, deyə yazıb.

Qeyd edək ki, YSK ölkə xaricində də səsvermənin keçirilməsi qaydalarını açıqlayıb. Belə ki, səsvermə 74 ölkədə və 177 nöqtədə aparılacaq. Ölkə və şəhərlərə görə fərqlənən səsvermə tarixləri aprelin 27-si ilə mayın 9-u arasında dəyişir. Xarici nümayəndəliklərdə səsvermə saatları yerli vaxtla 09.00-21.00, baş konsulluqların yerləşdiyi ərazilərdə isə yerli vaxtla 09.00-18.00 müəyyən edilib. Səs verəcək Türkiyə vətəndaşlarının qəbula yazılmasına ehtiyac olmadığı bildirilib.

Ümumiyyətlə, seçki prosesi hazırda Türkiyə gündəminin ən aktual mövzusuna çevrilib. Qeyd edilməlidir ki, marafonun sonu yaxınlaşdıqca keçirilən sorğular hazırki Prezident Rəcəb Tayyib Ərdoğanın favorit olduğunu göstərir.

Məsələ ilə bağlı fikirlərini bölüşən Sosial Tədqiqatlar Mərkəzinin sektor müdiri, politoloq İlyas Hüseynov bildirib ki, son illərdə aparılan uğurlu daxili və xarici siyasət iqtidar komandasına cəmiyyətin etimadını daha da yüksəldib. Politoloqun fikrincə, bu məsələdə ən mühüm faktor bu ilin fevralında baş vermiş təbii fəlakətdən sonrakı mərhələdə Prezident Ərdoğanın rəhbərliyi altında həyata keçirilən uğurlu və təxirəsalınmaz tədbirlər olub: “Prezident Ərdoğan zəlzələ uzərindən ona qarşı əks-təbliğat kampaniyası həyata keçirməyə çalışanlara sadəcə folaraq fəaliyyəti ilə cavab verdi. Baş verənlərin qısa zamanda aradan qaldırılmasının mümkünsüzlüyünü iddia edənlər elə qısa zamanda əsaslı addımların şahidi oldu. Prezident Tayyib Ərdoğan hələ mart ayında bildirmişdi ki, zəlzələ fəlakətinin yaralarının sağalması, dağılan evlərin bərpası ilə bağlı mühüm layihələr nəzərdə tutulur. Qeyd edilmişdi ki, zəlzələdə 200 mindən artıq binaya zərər dəyib. Bölgədə təyin edilmiş dövlət personalının ümumi sayı 271 min, tikinti texnikasının sayı 15 min, təyyarələrin sayı 78, helikopterlərin sayı 115, gəmilərin sayı 38 olub. Dövlət başçısı bütün problemlərin qısa zamanda həll ediləcəyini, binaların tikiləcəyini vurğulamışdı. Eyni zamanda, demişdi ki, zəlzələ bölgəsində 392 min 350 bina, 75 min 681 kənd evi tikmək planlaşdırılır”.

İ.Hüseynovun fikrincə, Prezident Ərdoğanın uğurlu fəaliyyəti zəlzələ üzərindən təbliğat qurmaq cəhdlərini də boşa çıxardı. Türkiyə dövləti, Türkiyə Prezidenti hər zaman olduğu kimi xalqının yanında yer aldı. “Xalq isə seçdiyi hakimiyyətə, liderə sadiqdir - qarşılıqlı olaraq xalq-iqtidar etimadı Türkiyəni bütün çətinliklərdən qorumağa qadirdir. Hətta 2015-ci ilin 15 iyulunda çevriliş cəhdi zamanı Türkiyə xalqı öz liderinin ətrafında sıx birləşmişdi”, - deyə İ.Hüseynov əlavə edib.

SADİQ

Paylaş:

Baxılıb: 524 dəfə